மறந்து போகாத சில

தளிர்களின் சுமைகள் கவிதை நூல் வெளியீடு

2012-01-15T18:26:00.000-08:00

திருமதி.சுமதி குகதாசன் அவர்களின் 'தளிர்களின் சுமைகள்' கவிதை நூல்எதிர்வரும் ஞாயிறு வெளியிடப்படுகிறது.

இளைப்பாறிய ஆசிரியரான அவரது முதலாவது நூல் இது. இவர் வடபுல இடதுசாரி முன்னோடியான தோழர் கார்த்திகேசன் அவர்களது புதல்வி என்பது குறிப்பிடத்தக்கது. ஆசிரியரும், இடதுசாரி அரசியல்வாசியுமான கார்த்திகேசன் மாஸ்டர் ஒரு கவிஞரும் என்பதும் நினைவு கூரவேண்டியதாகும்.

கொழும்பு தமிழ்ச் சங்கத்தில் (7, 57வது ஒழுங்கை, வெள்ளவத்தை) எதிர்வரும் ஞாயிறு(21.01.2012) மாலை 5 மணிக்கு வெளியீட்டு விழா ஆரம்பமாகிறது.

திரு.க.சிவபுத்திரன் (ஆசிரியர்) தலைமையில் நடைபெறும் விழா நடைபெறும்.

நூல் வெளியீட்டுரையை திரு.சிவா சுப்பிரமணியம் (முன்னாள் தினகரன் ஆசிரியர்) ஆற்றுவார்.

கருத்துரைகள்

திரு.வீ.தனபாலசிங்கம் தினக்குரல் பிரதம ஆசிரியர்,
நெடுந்தீவு செ.மகேஸ் (இளைப்பாறிய ஆசிரியரும் கவிஞரும்),
டொக்டர்.எம்.கே.முருகானந்தன்

ஆகியோர் ஆற்றுவார்கள்.
நூலாசிரியை திருமதி.சுமதி குகதாசன் ஏற்புரையை நிகழ்த்துவார்.

இந் நூல் வெளியீட்டுக்கான ஏற்பாடுகள் முற்போக்கு கலை இலக்கிய மன்றத்தின் ஆதரவில் செய்யப்படுகி்னறன.

0.0.0.0.0.0

யாருடைய புதுவருட வாழ்த்து உங்களுக்கு இதமாக இருந்தது?

2012-01-05T00:17:00.000-08:00

புது வருட ஆரம்பக் கொண்டாட்டங்களும், குதூகலங்களும்
வெடியோசைகள் மெளனித்தித்தது போல போல அடங்கிவிட்டன.
திங்கள், செவ்வாய் என வேலை நாட்கள் தொடங்கிவிட்டதால்
எல்லோரையும் பிஸியாக்கிவிட்டிருக்கும்.

இந்த நேரத்தில் உங்களுக்கு கிடைத்த புதுவருட வாழ்த்துக்களை ஒருமுறை மனத்தில் நினைவூட்டிப் பார்க்கலாமே?

யாருடைய புதுவருட வாழ்த்து உங்கள் மனதிற்கு இதமாக இருந்தது?

அதிகாலை கண்விழிக்க முன்னரே காதருகே Happy New Year Darling கிசுகிசுப்புடன் புது வருடம் பிறந்திருக்குமே! மற்ற வேலைகளை எல்லாம் மறந்து வாழ்க்கைத் துணையைக் கணகணப்புடன் கட்டியணைக்க வைத்திருக்குமே. அந்த வாய்மொழி வாழ்த்து பிடித்ததா?

கன்னத்தில் முத்தமிட்டு "Happy New Year Dad" என உங்கள் செல்லக் குட்டி வாழ்த்தியிருக்குமே! இதைவிட வேறென்ன வேண்டும் என மனத்தை நெகிழ வைத்திருக்குமே.

டெலிபோன் கிணுகிணுக்க எரிச்சலுடன் தூக்கம் கலைந்து நேரத்தைப் பார்த்தால் அதிகாலை 5 மணி. இந்த நேரத்தில் யார் என ரிசீவரைத் தூக்குகிறீர்கள்.

"எல்லா செளபாக்கியங்களும் கிட்டி, இந்தப் புதுவருடத்திலும் இனி வரும் காலங்களிலும் நீ நல்லா வழ வேணும்.". காலையில் கோயிலுக்கும் போகும் அவசரத்திலும் மறக்காமல் வாழ்த்துச் சொன்ன அம்மாவின் வாழ்த்து உங்களை மகிழச்சியில் ஆழ்த்தியதா?

கிக்கீ கிக்கீ என குருவியின் அழைப்புப்போல விடாது இசையாக ஒலித்துக் கொண்டே நண்பர்களும் உறவுகளும் அனுப்பிய வாழ்த்துக்களால் நிரம்பி வழியும் SMS செய்திகள் பிடித்திருந்தனவா?

கணனியைத் திறந்தால் Facebook கிலும், Twitter, Google +, e mail கிலும் வந்திருக்கும் வாழ்த்துக்களும் செய்திகளும் உங்களுக்குப் பிடித்திருக்கும்.

இப்படிப் பல வாழ்த்துகள் கிட்டியிருந்தாலும் அதில் ஏதாவது ஒன்று உங்கள் மனதுக்கு நெருக்கமானதாக மகிழ்ச்சியில் ஆழத்துவதாக அமைந்திருக்கும். அது யாருடையது?

இதே போல எனக்கும் பல வாழ்த்துகள் கிடைத்திருந்தன.

குடும்பத்தினர், உறவினர்கள், நண்பர்கள், இலக்கிய வட்டத்தினர், ஊடகத் துறை நட்புகள் எனப் பல. பலவிதமாக, பல வடிவங்களில்..

பல நோயாளிகளிடமிருந்து கூட..

அதில் இவரது வாழ்த்து மடல் எனக்கு மிகவும் பிடித்திருந்தது. காரணம் அவர் ஒரு மிகவும் வயது முதிர்ந்தவர். 90 வயதை நெருங்கிக் கொண்டிருக்கிறார். சென்ற வருட கிருஷ்மஸ்க்கு அடுத்த நாள்தான் தனது 87வது பிறந்த தினத்தைக் கொண்டாடியிருந்தார்.

இந்த வயதிலும் தானே கடைக்குப் போய் இந்த வாழ்த்து மடலை எனக்கு வாங்கி அனுப்பியிருக்கிறார். இவர் தானே சென்று வாங்கிய விடயம் நேற்று அவரது மகள் தனது மகனை சிகிச்சைக்காகக் கொண்டு வந்தபோதுதான் தெரிந்தது.

"உங்கள் அப்பாவிற்கு எனது வாழ்த்தையும் அவரது வாழ்த்து மடலுக்கு நன்றியையும் தெரிவியுங்கள்" என்றேன்.

"தானாகவே போய் வாங்கிப் போட்டிருக்கிறார் போலை. அவர் அனுப்பியது எங்களுக்குத் தெரியாது. அப்படி ஒரு அன்பு அவருக்கு உங்கள் மேல்" என்றார்.

எனக்குப் புல்லெரித்ததது.

பணத்தினால் எல்லாவற்றையும் வாங்கிவிடலாம் என்ற மமதையுடைய காலத்தில் தனியார் மருத்துவனான என்னை நினைத்து புது வருட வாழ்த்து அனுப்பியிருக்கிறார். அதில் தனது நடுங்கும் கைகளால் வாழ்த்து எழுத எவ்வளவு சிரமமப்பட்டிருப்பார்.

வாழ்த்து மடலில் அவரது பெயரை மட்டும் மறைத்திருக்கிறேன்.

அவ்வளவு ஆழ்ந்த அன்பு அவருக்கு இருந்திருக்கிறது. சுமார் 32 வருடங்களாக அவர் மற்றும் அவரது குடும்பத்தினரின் மருத்துவானாக இருப்பதில் எனக்குப் பெருமையாக இருந்தது.

இப்படி எத்தனை மகிழ்ச்சிகள் குடும்ப மருத்துவனாக இருப்பதில்.

உங்கள் அனுபவங்கள் எப்படி?

0.0.0.0.0.0.0

ஆதவன் எழுந்தான் புத்தாண்டு பிறந்தது

2011-12-31T23:28:00.000-08:00

மார்கழித் திங்கள்
மதியொளி அடங்கி
காரிருள் மூழ்கி
புவியினை சூழ்வதைத் தடுக்க
ஆழியில் மிதந்து
அடிவானில் எழுந்து
நம் ஊரினில் மிதந்தான்
ஆதவன்
அன்றொரு நாள்.

வாழ்வினில் துன்பங்கள் அகலும்
நாளிது என்ற நம்பிக்கை ஊட்டும்
ஆண்டிது பிறக்கிறது 2012.

அனைவருக்கும் இனிய புத்தாண்டு
வாழ்த்துக்கள்

0.0.0.0.0

எம்.கே.முருகானந்தன்

சுவடு 2011 வெள்ளவத்தை இராமகிருஷ்ண வித்தியாலய மலர்

2011-12-27T01:17:00.000-08:00

கொழும்பில் தமிழ் மாணவர்களின் கல்வித் தேவைகளுக்காக பல பாடசாலைகள் அமைந்துள்ளன. இவற்றில் சில மிகவும் பிரபல்யமானவையாகும். மிக அதிகமான எண்ணிக்கையான மாணவர்கள் இவற்றில் கல்வி பயில்கிறார்கள்.

ஆனால் இதற்கு மாறாக பல பாடசாலைகள் பற்றி அதிகம் பேசப்படாதபோதும் அவை எமது பிள்ளைகளை அரவணைத்து கல்வியூட்டி வருகின்றன.

கொழும்பு வெள்ளவத்தையில் பாமன்கடைப் பகுதியில் இயங்கி வரும் இராமகிருஷ்ண வித்தியாலயம் அதில் முக்கியமானதாகும்.1924ம் ஆண்டு மிஷனர்மாரால் ஆரம்பிக்கப்பட்டு இன்று அரசாங்க பாடசாலையாக இயங்கி வருகிறது. கடந்த 87 வருடங்களாக அமைதியாகப் பணியாற்றி வரும் இப் பாடசாலை கடந்த செப்டம்பர் மாதம் தமது வருடாந்த பரிசளிப்பு விழாவையும் கலை விழாவையும் சிறப்பாக நடாத்தியது.

அத் தருணத்தில் சுவடு 2011 என்ற மலர் வெளியீடும் நடைபெற்றது.

மலர் மறைந்த பேராசிரியர் கா.சிவத்தம்பி அவர்களுக்கு இம் மலர் சமர்ப்பிக்கப்பட்டுள்ளது.

வழமையான ஆசிச் செய்திகளுக்கு அப்பால் பல அறிஞர்களின் கட்டுரைகளும் மாணவர்களின ஆக்கங்களும் மலரை அலங்கரி்கின்றன.

இன்றைய தமிழ் செல்ல வேண்டிய திசையைச் சுட்டுமாப்போல கணனியும், வீணையும், கால்பந்தும் பூவுடன் இணைந்து அட்டையை அலங்கரிக்கின்றன.

பாடசாலை நிகழ்வுகள் மற்றும் பல்வேறு மன்ற உறுப்பினர்களது புகைப்படங்களும் மலரை அலங்கரி்கின்றன.

அதிபரின் அறிக்கையானது மிகுந்த ஞானம் மிக்கதாக இருக்கிறது. இன்றைய கல்வி நிலை, அதன் தேவைகள், குறைபாடுகள், பெறுபேறுகளைப் பேசுவதுடன், தமது பாடசாலையின் நிலை பற்றியும் சொல்லிச் செல்கிறது.

சிறிய பாடசாலைகள் எதிர்நோக்குகின்ற ஒரு முக்கிய பிரச்சனையை அவர் தனது கட்டுரையில் சுட்டிக் காட்டுகிறார்.

ஆம் சிறிய பாடசாலைகள் பின்தங்கிய மாணவர்களை மிகுந்த சிரமத்துடன் கற்பித்து திறமையான மாணவர்களாக பொதுப் பரீட்சைகளில் சித்தியடையச் செய்யும்போது பெரிய பாடசாலைகள் திறமையுள்ள அத்தகைய மாணவர்களை தாம் விழுங்கி ஏப்பம் விடுகி்ன்றமை ஏமாற்றமும் கவலையும் அளிப்பதுமாகவே இருக்கிறது.

மலரில் வெளியாகியுள்ள சில முக்கிய அதிதிகள் கட்டுரைகள் ஆவன,

பேராசிரியர் சோ.சந்திரசேகரன் - பொதுப் பரீட்சைகளும் தேசியப் பாடசாலைகளும்
பேராசிரியர் சபா.ஜெயராசா - ஆசிரியத்துவமும் சமூக மெய்யியல் அணுகுமுறைகளும்
கலாநிதி கனகசபாபதி நாகேஸ்வரன் - கல்வியும் கல்லாமையும்
டொக்டர்.எம்.கே.முருகானந்தன் - ஒரு வகை லோ பிரஷர் - நிலை சார்ந்த குறை இரத்த அழுத்தம்.
தை.தனராஜ் - ஆசிரியர்களின் வாண்மைத்துவ மேம்பாடும் பொதுக் கல்வி மீதான புதிய கல்விச் சட்டமும்
பேராசிரியர் மா.கருணாநிதி - விளை திறனுள்ள கற்றல் கற்பித்தல் ஆரம்ப நிலை பற்றிய நோக்கு
டொக்டர்.சி.எஸ். நச்சினர்க்கினியன் - எமது மூளை அதை நான்தான் பாதுகாக்க வேண்டும்.

மாணவர் ஆக்கங்கள்

சிறுகதைகள், கட்டுரைகள், கவிதைகள், விடுகதைகள் என மாணவச் செல்வங்களின் படைப்புகளுக்கு மலர் நிறையவே இடம் அளித்து அவர்களை ஊக்குவித்திருப்பது மகிழ்ச்சியளிக்கிறது. சுமார் 50 பக்கங்கள் அவர்களது ஆக்கங்களுக்காக ஒதுக்கப்பட்டுள்ளது.

மிகச் சிறப்பாக இம்மலரை தயாரித்து அளித்த மலர்க் குழுவினர் பாராட்டுக்குரியவர்கள் ஆவர்.

0.0.0.0.0.0.0

கேளுங்கள் தரப்படும் தட்டுங்கள் திறக்கப்படும்...மணற்காடு சேர்ச்

2011-12-25T00:17:00.000-08:00

நண்பர்கள் அனைவருக்கும் எனது

இனிய நத்தார் தின நல்வாழ்த்துக்கள்

http://files.myopera.com/Joa-o/blog/35_merry_christmas.gif

இந்த மகிழ்ச்சியான நாளில் ஒரு இனிய கிறீஸ்தவ கீதம்.

எத்தனை முறை கேட்டாலும் மனத்தை நிறைக்கும் பாடல்

சென்ற ஆண்டு யாழ்ப்பாணம் சென்றபோது மணற்காடு கிராமத்திற்கு செல்லக் கிடைத்தது. சிறிய கரையோரக் கிராமம். பெரும்பாலும் கத்தோலிக்க கிறீஸ்தவர்கள். மிகவும் அன்பும், கனிவும் கொண்டவர்கள். கடற்தொழில்தான் பிரதான தொழில்.

மணற்காடு தேவாலயம்

கடற்கரைக்குச் சென்று திரும்பும்போது சேர்ச் அருகே வந்தோம். பிரமாண்டமான அழகிய தேவாலயம். எதிரே பெரிய மைதானம். அதில் இளைஞர்கள் அமர்ந்திருந்து பேசிக்கொண்டிருந்தனர்.

சென்ற தலைமுறையினர் எனக்கு நன்கு பழக்கமானவர்கள். ஆபிரகாம், பெனடிக்ட், திரேசா... இப்படி எத்தனையோ பெயர்கள் இன்றும் மனத்தில் நிறைந்து நிற்கிறது. இவர்களில் பெரும்பாலனவர்கள் இன்று இல்லை. அல்லது புலம்பெயர்ந்து சென்றுவிட்டார்கள்.

ஆயினும் சென்ற 10-15 வருடங்களாக பருத்தித்துறையில் நான் இருக்கவில்லை, மருத்துவப் பணியாற்றவில்லை. இதனால் அங்கிருந்த இளைஞர்களை என்னால் அடையாளம் காண முடியவில்லை.

தேவாலய முன்றலுக்கு வந்தோம். வாயிற் கதவு சாத்தியிருந்தது.

"கேளுங்கள் தரப்படும், தட்டுங்கள் திறக்கப்படும் .." பாடல் ஞாபகத்தில் வந்தது. ஆயினும் தட்டிப் பார்க்கவில்லை.

வெளியே நின்றபடியே சில படங்கள் எடுத்துக்கொண்டோம்.

இந்தப் புனிதமான இனிய நாளில் அந்தக் கோவிலும் அந்த மக்களும் மனதில் நிறைந்து நிற்கின்றனர்.

சுனாமியால் அந்த மக்கள் பலரும் பாதிக்கப்பட்டனர். பலர் மரணித்தனர். ஆயினும் அந்த மக்கள் துவண்டுவிடவில்லை. மீண்டு எழுந்தனர். தமது கிராமத்தை மீள அமைத்தனர். அந்த தேவாலயம் பாதிப்புறவில்லை.
இப்பொழுது புதிதாக வர்ணமடிக்கபட்டு கவர்ச்சியாக இருக்கிறது.

அவர்களுக்கும்

எனது அனைத்து நண்பர்களுக்கும்

இனிய நத்தார் தின வாழ்த்துக்களும்,

வரப்போகின்ற புத்தாண்டிற்கான

வாழ்த்துக்களும்.

0.0.0.0.0.0

பேராசிரியர் கைலாசபதி நினைவுப் பேருரை 2011

2011-12-14T01:31:00.000-08:00

ஈழத்தின் பெருமையை தமிழ் கூறும் நல்லுலகு எங்கும் நிலைநிறுத்திய பெருமை பேராசிரியர்.க.கைலாசபதிக்கு உண்டு. கடந்த 5 - 6 தசாப்தங்களுக்கு மேலாக அவரது பெயர் தமிழ் இலக்கிய விமர்சன உலகில் தொடர்ந்து பேசப்பட்டுக் கொண்டே இருக்கிறது.

அழகியலுக்கு அப்பால் சமூகப் பிரக்ஞையுடைய படைப்புகளுக்கு முக்கியத்துவமும், மார்க்சிய அடிப்படையிலான விமர்சனங்களுக்கு முன்னோடியாகவும் விளங்கியவர் அவர்.

அவர் பற்றியும் அவரது படைப்புகள், எழுதிய நூல்கள் பற்றிய விபரங்கள் தமிழ் விக்கிபீடியாவில் இவ்வாறு கூறப்படுகிறது
க. கைலாசபதி

அவர் மறைந்து 29 ஆண்டுகளுக்குப் பின்னரும் தொடர்ந்து என்றும் நினைக்கப்படுபவராக எம்மிடையே தனது ஆளுமையை நிலைநிறுத்திக் கொண்டு காலத்தோடு இணைந்து நடக்கிறார்.

கடந்த பல வருடங்களாக இலங்கை முற்போக்கு கலை இலக்கிய மன்றம் கைலாசபதி நினைவுக் குழுவுடன் இணைந்து கைலாசபதி நினைவுப் பேருரைகளை நடாத்தி வருகிறது.

இவ்வாண்டிற்கான நினைவுப் பேருரை எதிர்வரும் மார்கழி 18ம் திகதி 2011 ல் ஞாயிறு ஒழுங்கு செய்யப்பட்டுள்ளது.

இலங்கை முற்போக்கு கலை இலக்கிய மன்றத்தின் ஆதரவில் வெள்ளவத்தை தர்மாராம வீதியில் உள்ள பெண்கள் கல்வி ஆய்வு நிறுவனத்தில் மாலை 4.30 மணிக்கு நடைபெறும்.

தலைமை:- திரு.எம்.வாமதேவன் (முன்னாள் செயலாளர் தோட்ட வீடமைப்பு உட்கட்டமைப்பு மற்றும் சமூக அபிவிருத்தி அமைச்சு)

பேருரை:- திரு.ஏ.எஸ்.சந்திரபோஸ் (சிரேஷ்ட விரிவுரையாளர் இலங்கை திறந்த பல்கலைக் கழகம்)

குறித்த நேரத்திற்கு நிகழ்ச்சிகள் ஆரம்பமாகும் எனவும் அனைவரையும் அன்புடன் அழைப்பதாகவும் நிகழ்ச்சி அமைப்பாளர்கள் அறிவித்துள்ளனர்.

சென்ற ஆண்டிற்கான நினைவுப் பேருரை கொழும்பு பல்கலைக் கழகத்தில் விரிவுரையாளராகக் கடமையாற்றும் அவரது மகளான கலாநிதி பவித்ரா கைலாசபதி அவர்களால் ஆற்றப்பட்டமை குறிப்பிடத்தக்கது.

அதற்கான இணைப்பு

கணவன் மனைவி இருவரும் உழைக்கும் குடும்பத்தில் நன்மைகள் பிரச்சனைகள்.- கைலாசபதி நினைவுப் பேருரையில்

பேராசிரியர் கைலாசபதி பற்றி திரு லெனின் மதிவானம் எழுதிய 'பேராசிரியர் க.கைலாசபதி சமூக மாற்றத்திற்கான இயங்காற்றல்'என்ற நூல் வெளியீடு பற்றி இணைப்பு

பேராசிரியர் க.கைலாசபதி சமூக மாற்றத்திற்கான இயங்காற்றல்

0.00.0.00.0

பேராசிரியர் கலாநிதி சபா ஜெயராசா பாராட்டுவிழா

2011-12-13T01:58:00.000-08:00

பேராசிரியர் கலாநிதி சபா ஜெயராசா இலங்கைத் தமிழ் கல்விப் பாரம்பரியத்தின் மிக முக்கியமான ஒரு புலமையாளர் ஆவார். யாழ் பல்கலைக்கழக கல்வியியல் பீடத்தின் பேராசிரியாரான இவர் நுண்கலைப்பீடத்தின் தலைவராகவும் இருந்தமை குறிப்பிடத்தக்கது. கிழக்குப் பல்கலைக்கழகத்திலும் தனது விரிவுரைகளை ஆற்றி வருகிறார்.

கல்வி, இலக்கியம், நுண்கலை எனப் பல்துறைகளிலும் தனது ஆழமான தடத்தைப் பதித்திருக்கிறார். அவர் எழுதிய நூல்களுக்கான தொடுப்பு நூலகம் இணையத் தளத்திலிருந்து

ஜெயராசா, சபா." பகுப்பிலுள்ள கட்டுரைகள்

கலைச்சொல் ஆக்கத்தில் இவரது பங்களிப்பு முக்கியமானது. பல ஆங்கிலச் சொற்களுக்கான சிறப்பான தமிழ் சொற்களைத் தனது கட்டுரைகளிலும், உரைகளிலும் பயன்படுத்திவருகிறார்.

மொழி தேங்கியதாக இருக்கக் கூடாது. அது காலத்தோடு இணைந்து மாற்றங்களுக்கு இசைந்தும், புதிய தேவைகளுக்காக வளைந்தும், வளர வேண்டியது அவசியம். இதற்கு ஆங்கில மொழியில் வழங்கப்படும் பல அறிவியல் சமூகவியல் சார்ந்த சொற்களுக்கு அவர் ஆக்கிப் பயன்படுத்தும் பல அற்புதமான கலைச்சொற்களை கண்டு நான் வியந்திருக்கிறேன். என்னால் முடிந்தவரை உபயோகி்க்கவும் முயல்கிறேன். அதற்காக எனது மனமார்ந்த நன்றியைத் தெரிவித்துக் கொள்ளவும் செய்கிறேன்.

இது பற்றிய அவரது கருத்தை நவம்பர் ஞானம் இதழுக்கு வழங்கிய நேர்காணலில் காணலாம்.

தொடர்ந்து படியுங்கள்..

அண்மையில் சாஹித்திய இரத்தினம் விருது வழங்கிக் கெளரவிக்கப்பட்டுள்ளார். தகுதியுள்ள ஒருவருக்கு கிடைத்த பொருத்தமான விருது. அவருக்கு எனது வாழ்த்துக்களைத் தெரிவித்துக் கொள்கிறேன்.

'சாஹித்திய இரத்தினம்' விருது பெற்றமைக்காக ஞானம் கலை இலக்கியப் பண்ணை நடாத்தும் பாராட்டு விழா எதிர்வரும் ஞாயிறு 18-12-2011 மாலை 5 மணிக்கு கொழும்பு தமிழ்சங்க மண்டபத்தில் (இல. 07, 57ஆவது ஒழுங்கை), வெள்ளவத்தையில் நடக்க இருக்கிறது.

தலைமை:- கல்விப்பீடம், கொழும்புப் பல்கலைக்கழகம்,
பேராசிரியர் மா. கருணாநிதி

நிகழ்ச்சி நிரல்

5.00 : மங்கல விளக்கேற்றல்
5.10 : தமிழ்மொழி வாழ்த்து
- திருமதி ஹேமவதி கபிலதாஸ்
- திருமதி நீதிமதி யோகராஜன்
5.20 : வரவேற்புரை - சமூகச்செம்மல் ஆழ்வாப்பிள்ளை கந்தசாமி
(உப தலைவர், ஞானம் கலை இலக்கியப் பண்ணை)
5.30 : தலைமையுரை
5.40 : வாழ்த்துரை - திரு. மு. கதிர்காமநாதன் (தலைவர், கொழும்புத் தமிழ்ச்சங்கம்)
5.50 : பாராட்டுரைகள்-
திரு. அந்தனி ஜீவா (ஆசிரியர், 'கொழுந்து' சஞ்சிகை)
திரு. கே. எஸ். சிவகுமாரன்
(இலக்கியத் திறனாய்வாளர்)
திரு. தெ. மதுசூதனன்
(ஆசிரியர், 'ஆசிரியம்' சஞ்சிகை)
6.30 : ஒளிப்படம் - பேராசிரியர் சபா ஜெயராசா
அவர்களின் வாழ்வும் பணியும்|
6.40 : 'சாஹித்திய இரத்தினம்' பேராசிரியர் சபா ஜெயராசா
அவர்களுக்கான கௌரவம்
ஞானம் சஞ்சிகையின் வாழ்த்துப்பா
கவிதை ஆக்கம் : காப்பியக்கோ ஜின்னஹ் ஷரிபுத்தீன்
வாசித்தளிப்பவர் : ப.க. மகாதேவா,
(தமிழ்ச்சங்க ஆட்சிக்குழு உறுப்பினர்)
6.55 : ஏற்புரை - சாஹித்திய இரத்தினம் பேராசிரியர் சபா ஜெயராசா
7.15 : நன்றியுரை - தி. ஞானசேகரன் பிரதம ஆசிரியர், ஞானம்| சஞ்சிகை
பேராசிரியர் சபா ஜெயராசா அவர்கள்

விருது பெற்றமைக்காக ஞானம் கலை இலக்கியப் பண்ணை நடாத்தும்
பாராட்டு விழாவிற்கு அனைவரையும் அன்புடன் அழைக்கின்றார் ஞானம் கலை இலக்கியப் பண்ணையின் செயலாளரான ஆர். பி. ஸ்ரீதரசிங்.

0.0.0.0.0.0.0

பட்டிப் பூ

2011-12-09T01:26:00.000-08:00

"உதவாக்கரை.

உதையேன் வளர்க்கிறாய்

உள் வீட்டில்."

புறுபுறுத் தாங்கவில்லை!

"அப்பாவி போலப் பால் வெள்ளை

அதெல்லாம் வெளிவேசம்.

உள்ளெல்லாம் பெரு நஞ்சு.

குடல் பிரட்டும்

பெரு நாத்தம்

புடுங்யெறி வெளியாலை"

பொக்கையால்

எச்சில் பறக்கப்

பொரிகின்றாள்.

கேட்க மனம் பதறுகிறது

தெரியாது அவளுக்கு

இதன் பெருமை.

குறுஞ்செடியாய் பரந்திருந்து

பால்நிறமும் ஊதாவுமாய்

மலர் சொரிந்தது

என் வீட்டு முற்றத்தில்.

சிறுவயதில் அளைந்ததில்

என்னுடலும் உரமாயிற்று

நோய்நெடி அணுகாது.

பீநாறி, சுடுகாட்டு மல்லியென

இழித்தாலும்

நித்திய கல்யாணியென

மங்களமாயும் விழிப்பர்;

மலையாளச் சோதரர்கள்.

பயனுள்ள சிறு செடி

ஒளிந்திருந்து உயிர் காவும்

மறைநோயாம் குருதிப் புற்றுக்கு

இதன் சாற்றில் பொடித்தெடுத்த

வின்கிரிஸ்டின் அருமருந்தாம்

வெளிநாட்டார் கண்டறிந்தார்.

நீரிழிவுக்கு சொன்ன மருந்தென

எம்மூர்ப் பரியாரியும்

பகருகிறார்.

என்னளவில் என்றென்றும்

பட்டிப்பூ

அழித்தொழிக்கவொண்ணாது.

பட்டி தொட்டியெங்கும்

பரப்ப வேண்டிய

சிறப்பான மூலிகைதான்.

எம்.கே.முருகானந்தன்

வீரகேசரி ஞாயிறு இதழில் வெளியான எனது கவிதை

0.0.0.0.0.0.

அமிர்தம் மருத்துவ மாணவர்களின் இலக்கியத் தேடல் இதழ்

2011-12-03T02:15:00.000-08:00

தமிழ் மருத்துவ மாணவர்கள் அறிவுத் தேடலுக்கு அப்பால் தமது இன, மத, பண்பாட்டு அம்சங்களில் அக்கறையும் ஈடுபாடும் காட்டுவது மரபாக இருக்கிறது.

நான் மருத்துவ மாணவனாக காலத்தில் (1970-75) மருத்தவ பீட இந்து மாணவர் சங்கத்தின் தலைவராக இருந்தபோது வாராந்த வழிபாடுகளையும், வருடாந்தம் சரஸ்வதி பூசைகளை ஒழுங்கு செய்ததும் ஞாபகத்திற்கு வருகிறது.

அவ்வகையில் சிறி ஜயவர்த்தனபுர பல்கலைக் கழக மருத்துவ பீட மாணவர்கள் ஆண்டுதோறும் கலைவிழாவை நடாத்தி வருகின்றனர். இவ்வருடமும் அவ்வாறான விழா 'இந்திர விழா' என்ற பெயரில் சில காலத்திற்கு முன் நடைபெற்றது.

அதனைச் சிறப்பிக்கு முகமாக 'அமிர்தம்' என்ற மலரும் வெளியிடப்பட்டது.

நாகேந்திரம் ஹரிவல்லவன் அவர்களை இதழாசிரியாரகக் கொண்டு வெளியான இந்த மலரில் நல்ல பல கட்டுரைகள் இடம் பெற்றுள்ளமை குறிப்பிடத்க்கது. அவற்றில் ஆன்மீகத்தை அறிவியலில் உள்வாங்கும் பாங்கு காணப்பட்டதை சிறப்பாகக் கூறிப்பிடலாம்.

சிறி ஜயவர்த்தனபுர பல்கலைக் கழக விரிவுரையாளரான கலாநிதி சிறி பிரசாந்தன் அவர்களது 'திருக்குறளிளல் மருத்துவக் கூறுகள்' என்ற கட்டுரை முதற் கட்டுரையாக வெளியாகியுள்ளது.
Telsa and Swami Vivekananda- K.Soruban
பேர்மனம்- Dr.P.மனோகரன் மனத்தின் ஆற்றலை எடுத்துக் காட்டும் சிறப்பாக கட்டுரை. நாம் அதன் ஆற்றலை உணராது விரயமாக்குவதைச் சுட்டிக் காட்டி சரியான வழியில் திசை திருப்ப வழிகாட்டுகிறது. மனிதனின் மனமானது பரிணாம வளரச்சியின் உச்சத்தில் இருப்பதாகவும், இனி அதன் வளர்ச்சி மனம் சார்ந்ததாகவே இருக்கும் என Julian Huxly கூறியதை நினைவூட்டுகிறார்.
நம்மைத் தேடி- நூலசிரியர் ஹரிவல்லவன்அவர்களது கட்டுரை. இனிய தமிழில் சுவைக்கவும் சிந்திக்கவும் வைக்கிறது.
பிரபஞ்சமும் அனுபவமும்- சுவாமி விவேகானந்தர்.
மாதவிலக்கு மதச் சடங்குகள் சில சிந்தனைகள். Dr.M.Kமுருகானந்தன்
பிராண சிகிச்சை எனும் மாற்று மருத்துவ முறை- திரு.கதிர்காமராஜ்
புலவர் இட்ட மாலை- கம்பவாருதி இ.ஜெயராஜ்
ஆனந்த தாண்டவமிடும் நடராஜர்- Janarthani Logitharaj Lecturer Dept Microbiology
அறிவுலகமும் ஆன்மீகமும் ஒன்றுபடும்- டாக்டர்.ஏ.பி.ஜே.அப்துல் கலாம்.
அண்ணலும் அவளும்- கவிதை- பிரசன்னா வருண் லோகேந்திரன்

ஆகியவை இடம் பெற்றுள்ளன.

கட்டுரைகள் தரமானவையாக இருப்பதுடன் வாசிப்புக்கு இலகுவாகவும் இருக்கின்றன.

அட்டைப்படம் தமிழரின் கட்டிடக் கலை நுட்பத்திற்கு சான்றாக உள்ள தஞ்சைப் பெருங்கோவிலை கொண்டுள்ளது. ஆயினும் நம் நாட்டுக் கோவில் ஒன்றை அல்லது கரகம் காவடி போன்ற வழி பாட்டு முறையை சித்தரித்திருக்கலாம் என எனக்குத் தோன்றியது.

இந்த மலரை வெளியிடப் பாடுபட்டு உழைத்த இந்து மன்ற உறுப்பினர்கள் பாராட்டுக்கு உரியவர்கள்.

0.0.00.0.0

இலட்சிய இளைய சமூதாயம் நோக்கிய இளைஞனின் புனைவுகள் 'மீண்டும் துளிர்ப்போம்'

2011-11-30T03:26:00.000-08:00

பரணீதரனின் சிறுகதைத் தொகுதியை அண்மையில் படிக்கும் வாய்ப்புக் கிட்டியது.

பதின்மூன்று சிறுகதைகளை உள்ளடக்கிய அழகான நூல். இதழ் விரித்து நிற்கும் மலரொன்று அழகிய அட்டைப்படமாக சிலிர்த்து நிற்கியது. வடிவமைத்த மேமன் கவியின் கவிநயம் துலங்குகிறது.

தொகுப்பிலுள்ள 'யதார்த்தம'; என்ற சிறுகதை என்னை மிகவும் கவர்ந்ததாக இருந்தது. இதற்குக் காரணம் அதிலுள்ள சமூகப் பெறுமானம்தான். எமது சமூகத்தில் முதுமை வாழ்வு பற்றி இன்னும் தளாராமல் இருக்கும் ஒரு கருத்தை இக்கதை மறுபரிசீலனை செய்கிறது. நோகாமல் தவறெனச் சுட்டிக் காட்டுகிறது. இது என்னுள் பல சிந்தனை ஊற்றுக்களை திறந்து விட்டது. அதனைப் பகிர்ந்து கொள்வதுடன் நூலில் உங்களையும் அழைத்துச் செல்லலாம் என எண்ணுகிறேன்.

தனது சொந்தக் காலில் நிமிர்ந்து நிற்கும் வரை முதுமை வாழ்வு என்பது துன்பமானது அல்ல. சொந்தக் கால் என்பது பொருளாதார ரீதியானதைக் குறிக்கவில்லை. நடமாடித் திரிந்து தனது சொந்த அலுவல்களை தானே செய்யக் கூடியதாக இருக்கும் வரை அது தொல்லை கொடுப்பதாக இருக்கமாட்டாது.

வயதிற்கு மதிப்பிருக்கிறது இங்கு. வயது முதிர்ந்தவர்களைக் கௌரவிக்கும், அவர்களது அனுபவபூர்வமான ஆலோசனைககளுக்கு காது கொடுக்கும் சமூகப் பாரம்பரியமும் எம்முடையது. அத்தகைய பண்பாட்டுச் சூழல் இன்னமும் ஒழிந்து விடவில்லை. அதன் காரணமாகவே முதுமை மகிழ்ச்சியளிப்பதாக இருக்கிறது எனக் கூறினேன்.

ஆனால் படுக்கையில் வீழ்ந்துவிட்டால்....? அறளை பெயர்ந்து விட்டால் என்ன நடக்கும்?

வயது முதிர்ந்த நேரத்தில் அதிலும் முக்கியமாக நோயும் இயலாமையும் துன்புறுத்தும்போது தமது தாய் தகப்பனை அல்லது பாட்டன் பாட்டியை தமது வீட்டில் வைத்துப் பராமரிக்க வேண்டியது தமது கடமை என்பதாகவே இன்னமும் பெரும்பாலானவர்கள் கருதுகிறார்கள். கூட்டுக் குடும்ப வாழ்க்கை முற்றிலும் தொலைந்து விடாத சமூகமாக இருப்பதன் பலன் அது.
ஆனால் படுக்கையில் வீழ்ந்து விட்டபின் ஒரு புதிய பிரச்சனை தலை தூக்குகிறது. ஆழமான அன்பு, பொருளாதார வசதி ஆகியன இருந்தாலும் இப்பிரச்சனையை எதிர்கொள்வது சிரமம்.

மலையகத்தைக் களமாகக் கொண்ட கதை. மண்வாசனைக் கதையல்ல.
கைக் குழந்தையாக இவன் இருந்தபோதே மலைச்சரிவு இவனது தந்தையைக் காவு கொண்டுவிட்டது. அதன் பின்னர் இவனைப் பிள்ளை மடுவத்தில் விட்டு விட்டு, கொழுந்து பறித்து அவனை வளர்தெடுத்தது அந்த அன்னைதான். பல்கலைக்கழகம் வரை படிக்க வைத்து ஆசிரியன் ஆக்குகிறாள். தான் உழைக்கத் தொடங்கியதும் தாயை வேலை செய்வதை நிறுத்தி வீட்டில் ஆறுதலாக இருக்கச் செய்கிறான். தாய் பேரக் குழந்தைகளைப் பராமரிப்பதில் மகிழ்ச்சியடைகிறாள். பாசம் நிறைந்த குடும்பம்.

இந்நிலையில் திடீரெனப் பக்கவாதம் வந்து படுக்கையில் தாயை விழுத்திவிடுகிறது. எவ்வளவுதான் தான் பாசம் இருந்தாலும் கணவன் மனைவி இருவரும் வேலைக்குப் போக வேண்டியிருப்பதால் தாயைப் பராமரிப்பது பெரும் சுமையாகிறது. இந்த நிலையில் அவர்கள் என்ன செய்ய முடியும். முதியோர் இல்லத்தில் விடுவதுதான் வழி. ஆனால் தாய் மீதான பாசம், பாரமரிப்பு நிலையில் விடுவது பற்றிய குற்ற உணர்வு, ஊர்ப்பழி, போன்ற குடும்ப ரீதியானதும் சமூக ரீதியானதும் காரணங்கள் தடையாக இருக்கின்றன.

இவை பற்றி அலசும் சமூக விழிப்புணர்வுக் கதையாக இருக்கிறது. மகன் சரியாக முடிவெடுக்கிறான். பாராட்டத்தக்கது. ஆனாலும் கதையின் முடிவோடு என்னால் ஒத்துப் போக முடியவில்லை. தாயின் இயற்கை மரணத்தில் முடிப்பதைத் தவிர்த்திருக்கலாம் எனத் தோன்றுகிறது.
ஆனால் பரணீதரன் ஏனைய படைப்புகள் பலவும் இதற்கு மாறாக தீர்க்கமாக கருத்துக்களைத் முன் வைக்கிறன. சமூக முன்னேற்றதில் அக்கறையுள்ள படைப்பாளியால்தான் தெளிவான கருத்துக்களை முன்வைக்க முடியும். அழகியலுக்குள் தன்னை மறைத்துக் கொண்டு பேடித்தனமான படைப்புகளை வழங்கும் சிறுமை இவரிடம் காணப்படவில்லை.

கருத்து ரீதியாக 'யதார்த்தம்' என்னைக் கவர்ந்த கதையாக இருந்தபோதும் நூலின் முகப்புச் சிறுகதையான 'உயிரினும் மேலானது' நல்லதொரு படைப்பு எனலாம். இக்கதையில் படைப்பாளியின் ஆளுமை சிறப்பாக வெளிப்படுகிறது. காதல், போரின் அவலம், விடுதலைப் போராட்டதின் மறுபக்கம், அதிகாரிகளின் சுயநலம் என எமது நிகழ்கால வாழ்வின் பல பக்கங்களைத் தொட்டு சுவார்ஸயமாகச் சொல்லப்படுகிறது. ஆனால் அதிர்வு தருவதாக இருப்பது சதீயத்திற்கும் குடும்ப கௌரத்திற்கு எதிராக மனிதாபிமானத்தின பக்கம் நிற்கும் இளைஞனின் உறுதிதான்.

பாலியல் பிறழ்வுகளும் வக்கிரங்களும் கொண்ட ஒருவனின் மனைவியாக வாழ்வதின் துன்பத்தை 'விடுதலையாகி நிற்பாய்' பேசுகிறது. பெண்ணியம் இழையோடுகிறது. அவனது செயற்பாடுகள் உளவியல் பிரச்சனையின் வெளிப்பாடு என்பதைச் சுட்டிக் காட்டுவதுடன், உள ஆற்றுப்படுத்தல் அதிலிருந்து மீள உதவும் என்கிறது.

'எனக்கு விசர் எண்டு சொல்லுறியோ'

இது தனது தன்மானம் பாதிக்கப்பட்ட அந்த ஒற்றைக் கணவனின் எதிர்வினைத் தனிக்குரல் என்று மட்டும் என்னால் கொள்ள முடியவில்லை. மனநோய்கள், உள ஆற்றுப்படுத்தல் போன்றவை பற்றி இன்னும் தவறானக் எண்ணக் கருக் கொண்ட எமது சமூக பண்பாட்டுத் தளத்தின் குரலாகவே ஒலிக்கிறது.
உளவியில் கல்வியறிவு கொண்ட இவரையொத்த இளம் படைப்பாளிகள் தமது எழுத்தாண்மையால் அதை மாற்ற வேண்டிய கடமை உள்ளது.

இத்தொகுதியில் உளவியிலை நேரடியாகப் பேசும் குறைந்து மூன்று கதைகளாவது இருப்பதானது பரணீதரன் செய்வார் என்பதை உறுதிப்படுத்துகிறது. 'மாறுதல்;, 'பகிடி வதை', 'விடுதலையாகி நிற்பாய்' என்பன அவை.

இன்றைய இளைய சமூதாயத்தின் போக்கில் விரக்தியுற்றவர்களாக பல பழைய தலைமுறையினர் இருக்கிறார்கள். சிந்தனைகளிலுள்ள வேறுபாடுகளுக்கு தலைமுறை இடைவெளிதான் காரணம். இதனால் மனதில் தாக்கம் ஏற்பட்டு விரக்தியடையும் ஓரு முதியவரை 'மாறுதல்' சிறுகதையில் காண்கிறோம். தனது வீட்டிலேயே தமிழ் பண்பாடு, கலாசாரம், மொழி ஆகியவற்றில் ஏற்படும் மாற்றம் அவரை நிலை குலைய வைக்கிறது. உள ஆற்றுப்படுத்தலை (கவுன்சிலிங் ) நாடி வருகிறார்.

'உங்கடை நண்பர்கள் ஆறு ஏழு பேர் வீட்டைபோய் அவர்களோடை, பிள்ளைகளோடை கதைச்சுப் போட்டு நாளைக்கு வாங்கோ... தொடர்ந்து கதைப்போம்.'

பிரச்சனையை விளக்கி ஆறுதல் கொடுக்கும் கவுன்சிலிங் செய்வதற்குப் பதிலாக இந்த விடை கிடைக்கிறது. ஆனால் உண்மையான கவுன்சிலிங் இதுதான். தானே மற்றவர் அனுபவங்களுடன் கலந்துணர்ந்து சமூகத்திலிருந்தே கற்றுக் கொள்ள வழிசெய்கிறது. கதையோடு கதையாக உள ஆற்றுப்படுத்தல் பற்றிய பல விபரங்கள் வாசகனுக்குச் சொல்லப்படுவது இக்கதையை மேலும் முக்கியப்படுத்துகிறது.

'விடுதலையாகி நிற்பாய்' சிறுகதையில் பிறழ்வு நடத்தையின் அறிகுறிகள் பட்டியலிடுவது போலச் சொல்லப்பட்டதற்குப் பதிலாக சம்பவங்களின் ஊடாக நகர்த்தியிருந்தால் வாசகனிடத்தில் கூடியளவு விழிப்புணர்வை ஏற்படுத்தியிருக்கும் என எண்ணத் தோன்றுகிறது. நூலாசிரியரின் வேறு பல படைப்புகளையும் சேர்த்து நோக்கும்போது, ஆசிரியர் கூற்றாக நேரடியாக கதையைச் சொல்லிச் செல்லும் பண்பு இவரிடத்தில் அதிகம் இருப்பதாக என் மனதில் பட்டது. இது தன் கருத்தை ஆணித்தரமாகப் பதிப்பதற்கு அவசியமான போதும் ரசனையான வாசிப்பிற்கு துணைபுரியும் எனத் தோன்றவில்லை.

ஆயினும் கட்டுடைத்துப் புதிய இலக்கிய வடிவங்களை தேடிப் பயணிக்கும் இன்றைய இலக்கியச் சூழலில் கதை, கட்டுரை, கவிதை, நாடகம் போன்ற வழமையான வடிவங்களை மீறியும், ஒன்றுக்குள் ஒன்று சங்கமிப்பதுமான மாறுபட்ட வடிவங்கள் ஏற்புடையனவே.

இவரது படைப்புகளில் காணும் மற்றொரு பண்பு வாழ்வில் பற்றுதலை ஊட்டுவதாகும்.

சலிப்பு, எதிர்காலம் மீதான நம்பிக்கை வரட்சி ஆகியவற்றை விடுத்து
நல்மனத்தோடு விடாமுயற்சி செய்து முன்னேறும் பாத்திரங்களைப் பல படைப்புகளில் காண்கிறோம்.
தகப்பனை அல்லது தாயை இழந்த மகன், மகள் குடும்பத்திற்காக உழைத்து, முன்னேற்றுவதான குறிக்கோளுடன் இயங்குகிறார்கள்.
குடி, புகைத்தல், பகிடிவதை போன்றவற்றிலிருந்து தப்பித்த
இலட்சிய வாழ்வுப் பாத்திரங்கள் சமூக விடிவிற்கான உதாரணங்களாக நிற்கிறார்கள்.

பொதுவாக இலட்சிய இளைய சமூதாயம் நோக்கிய இளைஞனின் புனைவுகளாக இருக்கின்றன.

தெணியானின் 'உளவியல் பார்வை இழையோடும் படைப்புகள்' என்ற விரிவான அணிந்துரையும்,
பேராசிரியர். சபா.ஜெயராசாவின் நுணுக்கமான 'முன்வாயில்' ம் நூலுக்கு அணி செய்கின்றன.
பின் அட்டையில் பேராசிரியர் எஸ்.சிவலிங்கராஜா பரணீதரனை அறிமுகப்படுத்தி வைக்கிறார்.

சஞ்சிகை வெளியீட்டில் தனது தனித்துவத்தைப் பதித்த ஜீவநதி சஞ்சிகையின் மற்றொரு வளர்ச்சியான ஜீவநதி வெளியீடு வந்துள்ளது. இரண்டிலும் தனது தகமையை வெளிக் கொணர்ந்த பரணீதரனைப் பாராட்டுகிறேன்.

ஞானம் சஞ்சிகையில் வெளியான எனது விமர்சனக் கட்டுரை.

எம்.கே.முருகானந்தன்.

0.0.0.0.0.0

தினக்குரல் 'டிஜிட்டல் யுகம்' நேர்காணல்

2011-11-25T01:42:00.000-08:00

தினக்குரல் தனது பத்திரிகையில் இணைக்கும் வழமையான அனுபந்தங்களுடன் இன்று புதிதாக 'டிஜிட்டல் யுகம்' என்பதை வெளியிட்டுள்ளது.

இதில் எனது வலைப்பதிவு அனுபவங்கள் பற்றிய சுருக்கமான நேர்காணலை இணைத்துள்ளார்கள்.

'கண்டங்களை தாண்டிய வாசகர்களைக் கூட சில நிமிடங்களுக்குள் அடைய முடிகிறது' என்ற தலைப்பில் வெளியாகியுள்ளது.

இதில் எனது 5 வலைப்புக்களையும் படங்களுடன் அறிமுகப்படுத்தியுள்ளார்கள்.

முழுமையான நேர்காணல்

1.கடந்த வருடத்தின் சிறந்த தமிழ் வலைப்பதிவாளராக நீங்கள் தெரிவு செய்யப்பட்டிருந்தீர்கள். அத்துடன் 5 வலைப்பதிவுகளையும் நீங்கள் மேற்கொண்டுவருகின்றீர்கள். ஒரு மருத்துவராகவும், எழுத்தாளராகவும் உள்ள நீங்கள் வலைப்பதிவுகளை மேற்கொள்ள வேண்டும் என்று எவ்வாறு ஈர்க்கப்பட்டீர்கள்?

கணனியை காணாத கிடைக்காத போர்பிரதேசத்தில் 1996 வரை வாழ்ந்ததால் அதில் ஒரு அபரிதமான மோகம் இருந்தது. அதனால் கொழும்பு வந்ததும் கணனியை வாங்கி அதில் தட்டுத்தடுமாறி கீபோட் கொண்டு சுயமாக எழுதப் பழகினேன். பின் நோயாளர்களின் விபரங்களைப் பேணுவதற்காக கணனியை நான் உபயோகிக்கத் தொடங்கியபோது இலங்கையில் அவ்வாறு பேணுவதில்; ஒரு முன்னோடியாக இருந்தேன் எனலாம்.

தொடர்ந்து தமிழில் கீபோட்டில் மிகச் சிரமத்துடன் பாமினி பொன்டில் எழுதப் பழக நேர்ந்தது. பதிவுகள் இணைய இதழுக்காக மருத்துவ இலக்கிய கட்டுரைகளை எழுதுவதற்கு அது அவசியமாக இருந்தது. இது சுமார் 10-12 வருடங்களுக்கு முன்னராகும்.

இவ்வாறு கணனியிலும் இணையத்திலும் எழுதி வந்தபோதும் வலைப்பதிவளானக வேண்டும் என்ற சிந்தனை இருக்கவேயில்லை. ஆனால் அதற்கான ஆர்வத்தை தூண்டிவிட்டது நண்பர் மேமன் கவிதான்.

2. வலைப்பதிவை மேற்கொள்ளும் ஒரு எழுத்தாளர் எதிர்கொள்ளம் முக்கியமான பிரச்சினையாக இருப்பது தொழில்நுட்பப் பிரச்சினை. குறிப்பாக வலைத்தளத்தை அமைத்துக்கொள்வது பதிவேற்றம் செய்வது, தமிழ் யுனிகோட் எழுத்துருவைப் பயன்படுத்துவது என்பவையே அவை. இந்தப் பிரச்சினைகளை நீங்கள் எவ்வாறு வெற்றிகொண்டீர்கள்?

மருத்துவனான எனக்கு கணனி ஒரு சாவாலாகவே இருந்தது. வலைத்தளத்தை அமைப்பது எப்படி என்று தெரியாத நிலையில் வலையில் தேடிதேடி வாசித்துக் கற்றே முதலாவதை கற்றுக்குட்டி போல அமைக்க முடிந்தது.

படிப்படியாக அதை அழகுபடுத்தவும், விளக்கப் படங்களுடன் தெளிவாக்கவும் கற்றுக் கொண்டேன். இப்பொழுதும் வலைப் பதிவு சம்பந்தமாகக் பல புதிய விடயங்களை வலையிலேயே கற்று என்னை முன்னேற்ற முயல்கிறேன்.

ஆனால் அடிப்படைக் கணனி அறிவு எனக்கு இல்லாதது ஒரு குறையாகவே படுகிறது. நான் ஆரம்பத்தில் blogspot.com வைப் பயன்படுத்தினேன். இப்பொழுது wordpress.com லும் எழுதுகிறேன். இவை இரண்டுமே அதிக கணனி அறிவு இல்லாதவர்களும் இலகுவாக தமக்கென சுலபமாக வலைப் பதிவுகளை (புளக்) அமைக்க கை கொடுக்கின்றன.

அவற்றின் தளத்திற்கு சென்றால் படிமுறையாக புளக் அமைக்க வழி காட்டுகின்றன. ஆங்கில அறிவு அதிகம் இல்லாதவர்கள் தமிழிலும் செய்யக் கூடியதாக இவை அண்மைக்காலமாக தமிழிலும் கிடைப்பது மற்றொரு சிறப்பாகும்.

Keyman மென்பொருளை உபயோகிப்பதால் பாமினியில் டைப் பண்ணுவதுபோலவே டைப் பண்ண முடிகிறது. அது எனக்குச் சிரமமாக இருக்கவில்லை.

3. உங்களுடைய தொழில் மற்றும் பத்திரிகைகளுக்கு எழுதுவது என்பவற்றுக்கு மத்தியிலும், இவ்வாறு ஐந்து வௌ;வேறான வலைத்தளங்களை வைத்து உங்களால் எவ்வாறு பராமரிக்க முடிகின்றது. அதற்கான நேரத்தை எவ்வாறு பெற்றுக்கொள்வீர்கள்?

முதலில் எனது சினிமா விமர்சனங்கள் இலக்கிய கட்டுரைகளை பகிர்வதற்காக மறந்து போகாத சிலஆரம்பித்தேன்.
ஹாய் நலமா?என மருத்துக் கட்டுரைகளை தினக்குரலில் கீலமாக (பத்தி) எழுத ஆரம்பித்ததும் அதே தலைப்பில் வலைப்பதிவை ஆரம்பிக்க நேர்ந்தது.
இவ்வாறே மருத்துவ அனுபவங்களைப் பகிர Steth இன் குரல்
எனது ஆரம்பப் பாடசலைக்கான மேலைப்புலோலி சைவப்பிரகாச வித்தியாலய பழைய மாணவர் ஒன்றியம் என ஆரம்பித்து,
எல்லாவற்றையும் இணைக்கும் முருகானந்தன் கிளினிக்
சில தினங்களுக்கு முன் புகைப்படங்களைப் பகிர முருகானந்தன் கிளிக்குகள் எனத் தொடர்கிறேன்.

வலைத்தளத்திற்கு என நான் தனியாக எழுதுவது குறைவு. எற்கனவே பத்திரிகை சஞ்சிகையில் வெளியான எனது கட்டுரைகளையே வலைத்தளத்தில் பகிர்கிறேன்.

இருந்தபோதும் பல வலைப் பதிவாளர்கள் போல என்னால் தினமும் பதிவேற்ற முடியவதில்லை. வாரத்திற்கு ஒரு முறையாவது மருத்துவப் பதிவு ஒன்றையும், இலக்கிய படைப்பு ஒன்றையும் பகிர முயல்கிறேன். பெரும்பாலும் இரவில் நேரங்கெட்ட நேரம்வரை முழித்திருந்தே இவற்றைச் செய்ய நேர்கிறது.

4. இவ்வாறான வலைப்பதிவுகளை மேற்கௌ;வதன் மூலமாக எவ்வாறான நன்மைகளை நீங்கள் பெற்றுக்கொண்டிருக்கின்றீர்கள்? அதாவது இதன் மூலமாக உங்களுக்குக் கிடைத்த பலன்தான் என்ன?

வயது என்பது புதிய தொழில் நுட்பங்களைக் கற்கவும் பயன்படுத்தவும் தடையாக இருக்கக் கூடாது. அதைத் தாண்ட வேண்டும் என்ற சவாலை எதிர்கொள்வதே எனது முதல் இலக்காக இருந்தது. ஆனால் காலம் செல்லச் செல்ல எனது மருத்துவ அறிவை பத்திரிகைகள், சஞ்சிகைகளுக்கு அப்பால் ஒரு பரந்த தளத்திற்கு நகர்த்த வேண்டும் என்ற அவாவை நிறைவேற்றிய திருப்தி கிட்டியது.

கண்டங்களைத் தாண்டிய வாசகர்களைக் கூட சில நிமிடங்களுக்குள் அடைய முடிவதும், அவர்களது விமர்சனங்களையும் கருத்துகளையும் உடனடியாகவே பெற முடிவதும் மகிவும் மகிழ்சி அளிப்பதாகும். பல பழைய நட்புக்களைப் புதிப்பிக்கவும், புதிய நட்புகளை பெற முடிவதும் உற்சாகம் அளிக்கிறது.
எனது படைப்புகளை பலர் வௌ;வேறு தளங்களில் பகிர்ந்து கொள்கிறார்கள். அதனால் இன்னமும் பரவலாக வாசிக்கப்படுகிறது. இவற்றால் எழுத்தளான் என்ற முறையில் கிட்டும் ஆத்ம திருப்தியைத் தவிர வேறு என்ன கிடைக்க முடியும்.

5. தமிழில் வலைப் பதிவுகளை மேற்கொள்பவர்களுக்கு நீங்கள் சொல்லக் கூடிய ஆலோசனை என்ன?

தெளிவான இலக்குகளுடன் பதிவிட வேண்டும். யாருக்காக எழுதப் போகிறேன், எவ்வாறு எழுதப் போகிறேன் எனத் தெளிவுடன் எழுத வேண்டும்.
எதை வேண்டுமானாலும் எழுதலாம் ஆனால் யாருக்காவது பயன்படுவதாக இருக்க வேண்டும். சீரியசான விடயமாகத்தான் எழுத வேண்டும் என்றில்லை. சற்று ரிலக்ஸ்சாக மற்றவர்களுடன் பொழுதுபோக்கிறாக எழுதுவதாலும் இருப்பதில் தவறில்லை.

மற்றவர்களைக் கவரும் விதத்தில் எழுதுவது அவசியம். சிலரது தலைப்பு மட்டுமே கவர்ச்சியாக இருக்கும் உள்ளடக்கம் சப்பென்று இருக்கும். அவ்வாறான எழுத்துகளால் வாசகர்களைத் தக்க வைத்திருக்க முயடிhது.

0.0.0.0.0.0.0

அக்டோபர் புரட்சியும் பெண்களும்.

2011-11-12T01:14:00.000-08:00

மகத்தான அக்டோபர் புரட்சி நினைவாக பேருரை செல்வி திருச்சந்திரன் அவர்களால் நிகழ்த்தப்பட்டது.

நிகழ்வுக்கு திரு.பி.பி.தேவராஜ் தலைமை தாங்கினார்.

"பூகம் போல யுகப்புரட்சியாக அக்டோபர் புரட்சி எழுந்தது. புதிய எண்ணங்கள், புதிய சிந்தனைகள் என உலக சரித்திரத்தில் ஒரு புதிய திருப்புமுனையாக எழுந்தது. தொழிலாளர்கள், அறிவியலாளர்கள், பெண்கள் என அனைவரும் வீறு கொண்டு எழுந்தனர்.

அன்று எழுந்த சிந்தனைகள் மறந்தொழிந்து போகவில்லை. காலங் கடந்தவையாக மறந்தும் போகவில்லை. இன்றைய வாழ்வின் ஒவ்வொரு அம்சங்களிலும் ஊடுருவி நிற்கின்றன.

பெண்களின் விடுதலைக்கு இதுவே அடித்தளமாக அமைந்தது" என்றார் திரு.பி.பி.தேவராஜ் தலைமை தனது தலைமையுரையில்.

கூட்டத்திற்கு திரு.பி.பி.தேவராஜ் தலைமை வகித்தார்

இன்று வெளியிடப்பட உள்ள நூலான 'வடபுலத்தில் இடதுசாரி முன்னோடிகள்' பற்றியும் குறிப்பிட்டார்.

"உன்னத மனிதர்கள் பற்றிய நூல் இது. தமக்காக வாழாது சமூக முன்னேற்றத்திற்காக வாழ்ந்த மாமனிதர்கள் பற்றிய அருமையான நூல்" என்றார்.

நிகழ்வில் அடுத்ததாக செல்வி திருச்சந்திரன் தனது பேருரையை நிகழ்த்தினார்.

செல்வி திருச்சந்திரன் பேருரை ஆற்றினார்

" அக்டோபர் புரட்சி- பெண்களின் பங்களிப்பு - பெண்கள் மீது புரட்சியின் தாக்கம்' என்ற தலைப்பில் அது நிகழ்ந்தது.

'அக்டோபர் புரட்சி பல பரிமாணங்களை உடையது' என ரொட்ச்கி கூறியுள்ளதுடன் ஆரம்பித்தார். ஆனால் அதன் அடித்தளமான முடியாட்சி வெற்றி கொள்ளப்பட்டது பெப்ருவரி புரட்சியில் ஆகும். இதில் பல பெண்களும் பங்கு பற்றினார்கள். வாக்குரிமை, அரசு உத்தியோகம் எனப் பல பெண்களுக்குக் கிட்டின.

போல்ஸ்விக் கட்சி பெண்களுக்கான தனி அலகை ஆரம்பித்தது. வீட்டில் முடக்கபட்டிருந்த பெண்கள் வீறு கொண்டு எழுந்தனர். நாமம் கெட்டிருந்த பெண்கள் உயிர்த்தெழுந்து புரட்சிப் பாதையில் நடந்தனர்.

கொடிக்குப் பின்னால் தலையில் சிவப்புத் துணி கட்டி, மேற்சட்டையுடன் நலிந்த பாவாடைகளுடன் பெண்கள் வந்ததானது மத்திய வர்க்கத்திலிருந்து தொழிலாளர் சார்ந்ததாக மாறியதற்குச் சான்றாக இருந்தது."

புரட்சியில் பங்கு பற்றிய பல பெண்களைப் பற்றியும் அவர்கள் ஆற்றிய பணிகள் பற்றியும் விரிவாகப் பேசினார்.

ஆனால் அதற்கு முன்னர் பெண்களின் நிலைமை மிக மோசமாக இருந்தது. கடும்கோட்பாளர்களின் இறுங்குப் பிடியில் பெண்கள் சுதந்திரம் அடங்கிக் கிடந்தது. பெண்களுக்கு சொத்துரிமை இல்லை. அவர்கள் விரும்பியபடி திருமணம் செய்ய முடியாது. ஆண்களுக்குக் கீழ்படிந்து அடிமைகள் போல வாழ நேர்ந்தது.

திருச்சபையும் அதற்கு ஆதரவாக இருந்தது. பெண்கள் வீட்டுக்கு உரியவர்கள் விட்டுக் குடுக்க வேண்டியவர்கள் என அவர்கள் போதித்தார்கள்.

கே.விஜயன், ரவீந்திரன், தயாபரன், வசந்தி தயாபரன் போன்ற பலரும் கலந்து கொண்டனர்

ஆனால் புரட்சிக்குப் பின்னர் 1918ல் Code of marriage சட்டம் இயற்றப்பட்டது. அதில் கணவனுக்கும் மனைவிக்கும் சமஉரிமை கொடுக்கப்பட்டது. அதில் சமயச் கிரியைகள் இல்லாத திருமணங்கள் வரவேற்கப்பட்டன. அரசில் அறிவு, தொழில் அறிவு போன்ற யாவும் பெண்களுக்கும் புகட்டப்படன. கருக்கலைப்பு சட்ட ரீதியாக அங்கீகரிக்கப்பட்டது.

கூட்டத்தை ஒழுங்கு செய்த முற்போக்கு கலை இலக்கிய மன்ற முக்கிஸ்தர் நீர்வை பொன்னையன், அருகே திரு.ரீ.ஆர் அரியநாயகம்

பிள்ளை பராமரிப்பு நிலையங்கள் அமைக்ப்பட்டன. பெண்களின் வேலைப்பளு குறைக்கப்பட்டது."

பெருமளவு விடயங்களை சுருக்கமாக நடையில் அழகான தமிழில் சொல்லிய உரையாக இருந்தது. இப் பேருரையின் முழு வடிவத்தை முழமையாக பெற்று இங்கு பதிவேற்ற எண்ணியுள்ளேன்.

பேராசிரியர்.சி.தில்லைநாதன் நூல் வெளியீட்டுரையை நிகழ்த்தினார்.

பேராசிரியர்.சி.தில்லைநாதன் நூல் வெளியீட்டுரை ஆறறினார்.

வடபுலத்தில் இடதுசாரி முன்னோடிகள் பற்றிய இந் நூலில் உள்ள கட்டுரைகளை ஆக்கியோர் முற்போக்கு இயக்கத்தில் நேரடியாக ஈடுபட்டவர்களாவர். அதனால் பல சுவார்ஸமான விடயங்களை இந் நூல் உள்ளடக்கியுள்ளது.

திரு அந்தனி ஜீவா தனது கருத்துக்களைப் பகிர்ந்து கொண்டார்

தம்மையும் தமது சொந்த வாழ்க்கை முன்னேற்றத்தையும் பற்றிச் சிந்திக்காது சமுதாய மாற்றம் பற்றி எண்ணியவர்கள் பற்றிய நூல் இது. ஆரோக்கியமான அரசியல் உணர்வு வடபுலத்தில் ஏற்படுவதற்கு காலாக இருந்தவர்கள் இவர்கள். பூரண சுதந்திரம், இருமொழி ஆட்சி, தாய்மொழிக் கல்வி போன்றவை இவர்களது இலட்சியமாக இருந்தது" என்றார்.

இவரது உரை இயல்பானதாகவும் நிறைய உதாரணங்கள் அனுபவங்கள் செறிந்ததாகவும் சுவார்ஸமாகவும் அதே நேரம் நிறையத் தகவல்களை உள்ளடக்கியதாக இருந்தது குறிப்பிடத்தக்கது. கலைவாணர் என்.எஸ்கிருஷ்ணன், கவிஞர் பட்டுக்கோட்டை கல்லாணசுந்தரம், பாரதி போன்ற பலரிலிருந்து மேற்கோள்களை அனாயசமாகச் சிதறவிட்டார்.

முதற்பிரதியை பெற்றவர் திரு.ரீ.ஆர் அரியநாயகம் அவர்களின் புதல்வனான டி.ஆர்.அரியநாயகம் ஆவார்.

முதற்பிரதியை டி.ஆர்.அரியநாயகம்பெறுகிறார்

தொடர்ந்த கலந்துரையாடலில் திரு.தயாபரன், தோழர் கார்த்திகேசனின் மகளான சுமதி குகதாசன், எம்.கே.முருகானந்தன், அந்தனி ஜீவா போன்ற பலரும் கருத்துக்களை முன் வைத்தனர்.

திருமதி.சுமதி குகதாசன் கருத்துரை

முற்போக்கு கலை இலக்கிய மன்றம் ஒழுங்கு செய்திருந்து இக் கூட்டம் நவம்பர் 6ம் திகதி 2011 ஞாயிறு மாலை 4.30 மணிக்கு வெள்ளவத்தை 58, தர்மரா வீதியில் அமைந்துள்ள பெண்கள் கல்வி ஆய்வு நிறுவனத்தில் நடைபெற்றது.

0.0.0.0.0.0.0.0

தெளிவத்தையின் யாழ் பயணம் தெணியான்

2011-11-09T08:14:00.000-08:00

வண்ண வானவில் சஞ்சிகையின் இலக்கிய வானவில் பகுதியில் 'நானும் என் யாழ் பயணங்களும்' என்ற தலைப்பில் நண்பர் தெளிவத்தை ஜோசப் ஒரு தொடர் எழுதி வருகிறார்.

அதில் வடமராட்ச்சிப் பயணத்தில் நண்பர் தெணியான் பற்றி விரிவாக எழுதியுள்ளார்.

அதில் எனது காரை இலக்கிய வாகனம் எனப் பெயரிட்டு எழுதுவது எனக்கும் பெருமையாக இருக்கிறது.

வாகனத்தில் ஓட்டுனராக முன் ஆசனத்தில் தெணியான், பின்னால் சந்திரசேகரன், அந்தனி ஜீவா, தெளிவத்தை...

பயணத்தில் நீங்களும் வாருங்களேன்.

கட்டுரையில் டொமினிக் ஜீவா, முருகபூபதி, சிவலிங்கராஜா, எஸ்.பொ போன்ற பலர் பற்றிய விடயங்களும் வருகின்றன.

தெளிவாகப் படிக்க படத்தின் மிது கிளிக் பண்ணுங்கள்.

0.0.0.0.0.0.0

தேசத்தின் விடிவுகாகக் காத்திருக்கும் தலைவர் "குண்டும்"

2011-11-05T02:29:00.000-07:00

தனது தேசத்திற்கு என்றாவது ஒரு நாள் விடிவு கிடைக்கும் எனக் காத்திருக்கும் தலைவர்

Kundum 'குண்டும்' ஆங்கில சினிமா

ஒரு துறவியைப் பற்றிய சினிமாவைப் பார்ப்பதற்கு உங்களுக்கு பொறுமையும் ஆவலும் இருக்குமோ தெரியாது. ஆனால் எனக்கு இருந்தது. ஏனெனில் அவர் வெறும் துறவி மட்டுமல்ல. ஒரு அரசின் தலைவரும் கூட. ஆனால் நாட்டை விட்டுப் பிரிந்து பிறதேசத்தில் புகலிடம் பெற்று வாழ்பவர். தனது சொந்த நாட்டிற்றுப் போவதற்காக நாலு தசாப்தங்களாக ஏக்கத்துடன் காலத்தைக் கழித்துக் கொண்டிருப்பவர்.

'மதம் ஒரு நஞ்சு' ஒரு துறவியான அவரது முகத்திற்கு நேரே நிர்த்தாட்சண்யமாகச் சொல்லப்படுகிறது. 'மதத்தினால் உங்கள் மக்கள் நஞ்சூட்டப்பட்டிருக்கிறார்கள். அதனால் உங்கள் மக்கள் தரம் குறைந்தவர்கள்.' அதிகாரத் திமிரின் எள்ளல் வார்த்தைகள்.

முகத்திற்கு நேர் அவமதிக்கும் இந்தக் கடுமையான வார்த்தைகளைப் பொறுத்துக் கொண்டார். தனக்காக அல்ல, தனது மக்களுக்காக. போர் வேண்டாம். தனது மக்கள் போரினால் துன்பப்படாமல் மகிழ்ச்சியோடு வாழவேண்டும் என்பதற்காக தனது சுயமரியாதையையும் பொருட்படுத்தவில்லை. சமாதானமாகப் போக முயன்றார். போரைத் தவிர்க்கவும் செய்தார். போரைத் தவிர்த்து சாத்வீகமாக இயங்கியும் அந்த மக்களது சுதந்திரம் பறிக்கப்பட்டது. அவரது சொல்லைக் கேட்காது கொரில்லா தாக்குதலில் ஈடுபட்டவர்களாலும் சுதந்திரத்தையும் தன்மானத்தைக் காப்பாற்ற முடியாது போயிற்று.

ஐ நாவும் உலக நாடுகளும் கண்களை மறு பக்கம் திருப்பிக் கொண்டு ஏதும் அறியாத அப்பாவிகளாக பாவனை பண்ணினார்கள். நேச அணிகள் என நம்பியவையும் சுயலாபத்திற்காக வாய் மூடி மௌனித்தன. ஆயுத பலமும், இனத் திமிரும் ஆக்கிரமிப்பு எண்ணமும் கொண்டவர்கள் முன் நல்லெண்ணத்தால் மாத்திரம் சுதந்திரத்தைக் காப்பாற்ற முடியாது என்ற கசப்பான பாடங்கள் அவர்களுக்காயிற்று.

மதம் ஒரு நஞ்சு என்று சொன்ன தலைவர் சீனாவின் பெரும் தலைவர் மாஸேதுங் அவர்கள். அவமானப்பட்டு நாடு துறந்தவர் திபேத்திய ஆன்மீகத் தலைவர் தலாய்லாமா.

மலையும் பனி மூட்டமும் குளிரும் நிறைந்த வளமான பிரதேசம். தீபெத்தின் வடக்குப் பகுதியில் சீனாவிற்கு அண்மையான ஒரு சிறு கிராமத்தில் படம் சுவார்ஸமாக ஆரம்பமாகிறது. எளிமையான குடும்பம். விவசாயம் செய்யும் தந்தை. தாய். 3 அல்லது 4 குழந்தைகள் சரியாக ஞாபகம் இல்லை. சூட்டிகையான கடைக்குட்டி. சாப்பாட்டு மேசையில் தந்தைக்குப் பதில் தனக்கு அந்த இடம் வேண்டும் என அடம் பிடிக்கிறது. தான்தான் குடும்பத்தின் முதல்வன் என்கிறது. எல்லாக் கடைக்குட்டிகளும் போலவே இதுவும் செல்லம் மிக்கது என எண்ணுகிறோம்.

இரவில் ஒரு துறவி கதவைத் தட்டுகிறார். அவர் லாமா என அழைக்கப்படும் பௌத்த துறவிகளில் ஒருவர். தொலைப் பிரயாணம் செய்பவர். களைப்பில் உதவி கேட்கிறார். விருந்தோம்பும் பண்புள்ள குடும்பத்தாய் அவரை வரவேற்று அவருக்கு உணவும் அளிக்கிறாள்.

அவரது கழுத்தில் இருந்த ஊருத்திராட்ச மாலையைத் அது தனது எனக் குழந்தை உரிமை கொண்டுகிறது. துறவி ஆச்சரியப்படவில்லை. தனது தேடலுக்கு முடிவு வந்துவிட்டது என மகிழ்ச்சிப்படுகிறார். ஆம் அவர் திபேத்திய மடாலயத்தைச் சேர்ந்தவர். தமது ஆன்மீகத் தலைவர் மறுபிறப்பு எடுத்துவிட்டார் என்பதை உணர்ந்து 14வது தலாய்லாமாவைத் தேடிக் கண்டுபிடிக்கும் முயற்சியில் மாறுவேடத்தில் இருந்தவர். குழந்தையின் செயலைக் கண்டு அதுதான் அடுத்த தலாய்லாமா என உணர்கிறார்.

ஆனால் அதை உறுதிப்படுத்த குழந்தைக்குப் பரீட்சை வைக்கிறார்கள். முன்னைய தலாய்லாமா உபயோகித்த கைத்தடி, கைமணி, மூக்குக் கண்ணாடி ஆகியவற்றை அதேபோன்ற வேறு பொருட்களுடன் கலந்து வைத்தபோது குழந்தை இவை என்னுடையவை எனச் சிலவற்றைத் தேர்ந்தெடுத்து உரிமை பாராட்டுகிறது. அவை சரியாக இருந்ததால் இதுதான் மறுபிறப்பு என்பது உறுதியாகிறது.

இது எதிர்பாராத சம்பவங்களும், கிளர்ச்சியூட்டும் காட்சிகளும் கொண்ட சினிமா அல்ல. வரலாற்றுச் சித்திரமாகும். 1937 முதல் 1959 ஆண்டுவரையான காலப்பகுதியின் பதிவாகும். ஆனால் வரட்சியான ஆவணப்படமல்ல. சீனா, இந்தியா ஆகிய களங்கள் ஆங்காங்கே வந்தபோதும் திபெத்தை மையமாகக் கொண்டது.

திபெத்தின் அமடா (Amada) மாகாணத்தில் இருந்த குழந்தையும் பெற்றோர்களும் லகசாவில் Lhasa உள்ள பொட்டாலா Potala மாளிகைக்கு அழைத்து வரப்படுகிறார்கள். அங்கு எதிர்காலத்தில் ஆன்மீகத் தலைமையையும், நாட்டின் தலமையையும் பொறுப்பேற்பதற்கான பயிற்சிகள் அளிக்கப்படுகின்றன. தலாய்லாமாக்களின் வரலாறும், அவர்களது படங்கள் சிலைகள் போன்றவை காட்டப்படுகிறன.

திரைக் கதையை எழுதியவர் மெலிசா மத்தீசன் தலாய்லாமை அவரது ஆசீர்வதத்துடன் சந்தித்து, பல முறை நடாத்திய நேர்காணல்கள் ஊடாக திரைக்கதை எழுதப்பட்டது. எனவே அதன் உண்மைத்தன்மை நிச்சயம் தலாய்லாமாவின் பக்கம் சார்ந்ததாக இருக்கும் என்பதை மறுக்க முடியாது. சம்பவங்கள் திபேத்திலும், சீனாவிலும், இந்தியாவிலும் நடந்திருந்த போதும் படப்பிடிப்பு முற்று முழுதாக அமெரிக்காவிலேயே செய்யப்பட்டது. பௌத்த ஆச்சிரமக் காட்சிகள் சில நியூயோர்க்கில் உள்ள கர்மா த்ரியன தர்மசக்கர ஆச்சிரமத்தில் எடுக்கப்பட்டதாகத் தெரிகிறது.

கலையும் கமராவும் அற்புதமாகக் கைகொடுத்ததால் களத்திலேயே எடுக்கப்பட்டது போன்ற உணர்வைக் கொடுக்கின்றன. கமரா RogerDeakins. திபெத்திய கலாசார வீடுகள், அவர்கள் உபயோகிக்கும் பொருட்கள், ஆடை அலங்காரம் யாவும் அந்தச் சூழலைக் கொண்டு வருகின்றன. இசை PhlipGlass. உள்ளத்தை ஈரலிக்கும் இசையும், காட்சியமைப்புகளும் அற்புதமானவை.

படத்தின் நெறியாள்கை MartinScorsese. The Last temptation of Christ என்பது இவரது மற்றொரு நல்ல படமாகும்.

5000 வீர்ர்களை மட்டுமே கொண்ட திபெத்திய இராணுவத்தால் உலகின் அதிகளவு சனத்தொகை கொண்ட மிகப் பெரிய நாடான சீனாவை என்ன செய்ய முடியும். சுலபமாக ஆக்கிரமிக்கப்படுகிறது. ஆரம்பத்தில் நன்மை செய்வதாகக் காட்டிக் கொண்டாலும் ஆக்கிரமிப்பு இராணுவத்தின் சுயரூபம் படிப்படியாக திபேத்தியர்களைச் சுரண்டவும், அவமானப்படுத்தவும் செய்கிறது. பொறுக்க முடியாத தலாய்லாமா சீனா சென்று சீனத் தலைவரைச் சந்திக்கிறார். அந்தச் சந்திப்பின்போது தான் ஆரம்பத்தில் குறிப்பிட '....மதத்தினால் உங்கள் மக்கள் நஞ்சூட்டப்பட்டிருக்கிறார்கள். அதனால் உங்கள் மக்கள் தரம் குறைந்தவர்கள் ..' என்ற நீதி வசனத்தைச் சொல்லியருளினார்.

நாடு திரும்பிய தலாய்லாமா நாட்டு நிலமை இன்னமும் மோசமாகி இருப்பதை உணர்கிறார். அவரது நெருங்கிய சகாக்களே சீன ஆட்சியின் கீழ் இருக்க முடியாது வெளியேறுகின்றனர். சீன இராணுவம் தனது பிடியை இறுக்குகிறது. விளைச்சல்களை அள்ளிச் சென்று மக்களைப் பட்டினி போட முயல்கிறது. தலாய்லாமா சீன அதிகாரிகளின் அதிகாரப் போக்கினால் கோபமுறுகிறார். கோபமுற்ற சீன அரசு தலாய்லாமாவைக் கொல்லவும் முயற்சி எடுக்கின்றது. அவரது சொந்தச் சகோதரரைனையே அந்தப் பாதகச் செயலைச் செய்யுமாறு தூண்டுகின்றனர். ஆனால் அவர் உண்மையை தலாய்லாமாவிடம் சொல்லிவிடுகிறார்.

அவர் நாட்டை விட்டு வெளியேற வேண்டிய தருணம் வந்து விட்டதை எல்லோரும் வலியுறுத்தவே, குறி சொல்பவரின் கருத்தையும் அறிய விளைகிறார் தலாய்லாமா. குறியாட்டம் ஏற்பாடு செய்யப்படுகிறது. அலங்கார ஆடையணிகலங்களுடன் மலையாள நடனத்தை நினைவுபடுத்தும் குறியாட்டம். உருவேறிய மனிதர் குறி சொல்கிறார். பாதுகாப்பான பயணம் குறியால் உறுதியாகிறது.

சீன ராணுவம் சுற்றி நிற்கிறது. தப்பிச் செல்ல வழியில்லை. தனது வழமையான ஆடம்பர உடைகளைக் கைவிட்டு குடியானவனாக உருமாறுகிறார். அவரை இனம் காட்டும் மூக்குக் கண்ணாடியையும் களைந்து வீதியில் ஆர்ப்பரித்து நிற்கும் சனங்களிடையே கலந்து வெளியேறுகிறார்.

கடுமையான பயணம். இருளின் துணையில் சுதந்திர ஒளிக்கான ஏக்கத்துடனான பயணம். சலசலத்தோடு நீரோடை, சறுக்கும் பாறை, கவியும் இருள், ஆனால் உறுதியான மனம் திடமாகக் கால் வைக்கிறார். நடந்து, குதிரையேறி, மயங்கி விழுந்தும் விழாமலும் நீண்ட ஆயாசப்பட வைக்கும் பயணம் தொடர்கிறது.

மலைச் சாரல், சாரலாக மழைத் தூறல், அமைதியின் ஆட்சி. சிறு மூங்கிலிலான வளைவு. எட்டாத் தூரத்தில் உள்ள சிறு இராணுவச் சாவடி. தொப்பிகளும் சம்பாத்துகளும் அணிந்த கூர்கா சிப்பாய்கள். காயப்பட்டு இரத்தம் வடிந்த குதிரை. அதில் நோயுற்று சோர்ந்து குதிரையின் கழுத்தில் தன் உடல் போர்த்தி சோர்ந்து கிடக்கும் மனிதன். அடக்கு குறை இராணுவம் போலல்லாது கையால் அணைத்து அவன் இறங்க உதவும் இராணுவ வீரன்.

'நீங்கள் யார்' மிகுந்த மரியாதையுடன் கேட்கிறான்.

'நீ காண்பது ஒரு மனிதன். சாதாரண துறவி' என்கிறார், இயலாமையையும் மீறும் சிறு முறுவலுடன்.

'நீங்கள் கௌதம புத்தரா'

சிறு மௌனத்தின் பின் சலனமற்ற மென் குரலில் 'நான் பிரதிபலிப்பு என எண்ணுகிறேன். நிலவு நீரில் தெரிவதுபோல...'

ஆம் அது ஒரு புண்ணிய ஆத்மா. நன்மையே நாடும் ஆத்மா. தனக்கு மட்டுமல்ல தன்னைச் சுற்றியுள்ளவர்களுக்கும் தனது எதிராளிக்கும் கூட.

இறுதிக் காட்சி. இந்திய மண்ணில் ஒரு எளிமையான அறை. தலாய்லாமா தனது டெலஸ்கோப்பை எடுக்கிறார். சரியாகப் பாகங்களைப் பொருத்துகிறார். தன் கண்ணை வைத்து தொலை தூரம் பார்க்கிறார். தனது தேசத்தை, அதற்கும் அப்பால், அப்பாலுக்கும் அப்பால் முழு உலகமும் அவரின் தரிசனத்தில் நனைகிறது.

கறுத்த திரை சோகமாக விரிகிறது. அதில் வாசகங்கள்.

'தலாய்லாமா இன்னும் திபெத்திற்குத் திரும்பவில்லை.'

'ஒரு நாள் அதற்கான பிரயாணம் கை கூடும் என்ற நம்பிக்கையோடு இருக்கிறார்.'

அவரது ஏக்கம் எம்மையும் பற்றிக் கொள்ள கனவுகளில் பயணிக்கிறது எம் மனம்.

எம்.கே.முருகானந்தன்

ஞானம் சஞ்சிகையில் வெளியான எனது கட்டுரை

0.0.0.0.0.0.0

திக்கவயல் தர்மகுலசிங்கம்

2011-11-04T02:56:00.000-07:00

திக்கவயல் தர்மகுலசிஙகம்

சுவைத்திரள் பத்திரிகையின் ஆசிரியரும், முதுபெரும் எழுத்தளருமான திக்கவயல் தர்மகுலசிங்கத்தின் மறைவு பற்றி அறிவோம்.

இன்று அவரது மனைவியுடன் பேசக் கிடைத்தபோது துயர் பெருக்கியது.

"வீட்டிலை நானும் அவரும்தான். எதோ எழுதிக் கொண்டிருந்தார். திடீரென 'இங்கை ஓடி வாரும்' என என்னைக் கூப்பிட்டார். நெஞ்சிற்குள் ஏதோ செய்கிறது என்றார். தலையணையை எடுத்து அவரைது தலையை உயர்த்தி அணைத்துப் பிடித்தபோது வாந்தி வந்தது. அவ்வளவுதான். சாய்ந்து விட்டார்"

"டொக்டர் வந்து பார்த்தபோது தூக்கிய கை வழுகி வீழ்ந்துவிட்டது." என்றார். டொக்டர் அருகில்தான் இருக்கிறாராம். தாமதமின்றி உடனடியாகவே வந்துவிட்டதாகக் கூறினார்.

எவ்வளவு துயரம் அந்த அம்மையாருக்கு. நோய்நெடி எனப் படுத்ததில்லையாம். கொலஸ்டரோல், பிரஸர் ஒன்றும் கிடையாதாம். டொக்ரட்டையே போகாத மனுசன் இப்படி திடீரெனப் போய்விட்டார் என அழுதார்.

இலக்கியத்தையும், இலக்கிய நண்பர்களையும் எந்நேரமும் நினைவு கூரும் அவரது இழப்பு அளப்பரியது என்பதில் சந்தேகம் இல்லை.

ஊர்விட்டுப் பிரிந்தபோதும், மரணத்திற்கு ஓரிரு நாட்களுக்கு முன்புவரை தொடர்பில் இருந்த ஆழ்ந்த நட்புடையோன்.

ஓரு தடவை சிரித்திரன் டொக்டரின் டயறி தொடருக்கு நான் கொடுக்க வேண்டிய கட்டுரை தாமதாமாகிவிட, வீடு தேடி வந்து, நான் கட்டுரை எழுதி முடிக்கும் வரை காத்திருந்து வாங்கிச் சென்ற கடமையுணர்வை மறக்க முடியாது.

சிரித்திரனிலும், சுந்தரிலும் அளப்பரிய பற்றும் நன்றியுணர்வும் கொண்டவர். சிரித்திரனில் எழுதிய எழுத்தாளர்களைப் பற்றியும், அவர்களது படைப்புகள் பற்றியும் தான் எழுதி வரும் நூலுக்காகத்தான் மறைந்த அன்று கூடஎழுதிக் கொண்டிருந்தார். முதல் நாளும் ஒரு பகுதியை அச்சகத்திற்குக் கொடுத்துவிட்டு வந்ததாகத் துணைவியார் கூறினார்.

அவருக்கு எனது அஞ்சலிகள்.

நவம்பர் 2, 2011 இறைவனடி சேர்ந்தபோது அவருக்கு வயது 64 ஆகும். அவரது இறுதிக் கிரியைகள் மட்டக்களப்பு கள்ளியங்காடு இந்து மயானத்தில் நடைபெற்றது. இலக்கியவாதிகள், ஊடகவியலாளர்கள், எழுத்தாளர்கள் எனப் பலர் கலந்து கொண்டதாகவும், பேராசிரியர் செ.யோகராசா மற்றும் ஊடகவியலாளர் ரீ.எல்.ஜவ்பர்கான் போன்ற பலரும் இரங்கலுரை ஆற்றியதாக தமிழ்மிரர் செய்தி வெளியிட்டிருந்தது.

அவர் எழுதிய நூல்களாக கானாபிரபா குறிபிட்டுள்ளவை

தத்துவப்படகு 1985
வரலாற்றில் தமிழும், தமிழரும் 1999
சிந்தனைப் போராளி சிவஞானசுந்தரம் 2003
திருவள்ளுவர் திடுக்கிடுவார் 2004
மட்டக்களப்பில் கண்ணதாசன் 2003
தமிழன் நினைவு கவிதைத் தொகுதி 2002
சிந்தனையைக் கிளறிய சிரித்திரன் மகுடி 2004
நாட்டுக் கருடன் பதில்கள் 2005

தொடுப்புகள்:-

முன்பு நான் சுவைத்திரள் பற்றி எழுதிய கட்டுரை சுவைத்திரள்

மடத்துவாசல் பிள்ளையாரடியில் கானா பிரபா எழுதிய மறைவு அஞ்சலி கட்டுரைக்குத் தொடுப்பு

படைப்பாளி திக்கவயல் சி.தர்மகுலசிங்கம் - அஞ்சலிப்பகிர்வு

விக்கிபீடியாவில் அவர் பற்றி சி. தர்மகுலசிங்கம்

0.0.0.0.0.0

அக்டோபர் புரட்சி நினைவாக பேருரை நூல் வெளியீடு

2011-10-31T01:26:00.000-07:00

அக்டோபர் புரட்சி பற்றி அறியாத முற்போக்குக் கருத்துடையோர் இருக்க முடியாது. இது ரஷ்யப் புரட்சியின் இரண்டாம் கட்டமாகும்.1917ம் ஆண்டில் நடந்தது. இரண்டாவது அக்டோபரில் நிறைவுற்றது. முதலாவது 1917 பெப்ரவரியில் நிகழ்ந்தது.

மார்க்ஸின் கருத்துக்களின் அடிப்படையில், இருபதாம் நூற்றாண்டில் இடம்பெற்ற முதலாவது பொதுவுடைமைப் புரட்சி இதுவாகும். 1922ல் சோவியத் ஒன்றியம் உருவாவதற்கு முன்னோடியாக அமைந்தது இதுவெனலாம்.

இந்த மகத்தான நிகழ்வின் நினைவாக இலங்கை முற்போக்கு கலை இலக்கிய மன்றம் பேருரையும் நூல் வெளியீடும் செய்வதற்கு ஒழுங்கு செய்திருப்பதாக அறியத் தந்திருக்கிறார்கள்.

எதிர்வரும் நவம்பர் 6ம் திகதி 2011 ஞாயிறு மாலை 4.30 மணிக்கு வெள்ளவத்தை 58, தர்மரா வீதியில் அமைந்துள்ள பெண்கள் கல்வி ஆய்வு நிறுவனத்தில் நடைபெற உள்ளது

தலைமை:- திரு.பி.பி.தேவராஜ்.

பேருரை:- செல்வி திருச்சந்திரன்

பொருள்:- அக்டோபர் புரட்சி- பெண்களின் பங்களிப்பு - பெண்கள் மீது புரட்சியின் தாக்கம்.

நூல்:- வடபுலத்தில் இடதுசாரி முன்னோடிகள்

நூல் வெளியீட்டுரை:- பேராசிரியர்.சி.தில்லைநாதன்.

நூலில் அடங்கியுள்ள படைப்புகள் ஆவன

மு.கார்த்திகேசு - சண்முகம் சுப்பிரமணியம்(கனடா)
ஹன்டி பேரின்பநாயகம் - சபா.ஜெயராசா
அ.வைத்திலிங்கம் - இராமச்சந்திரா
ஐ.ஆர்.அரியரட்ணம் - நீர்வை பொன்னையன்
M.C.சுப்பிரமணியம் - வீ.சின்னத்தம்பி
டொக்டர்.சீனிவாசகம் - நீர்வை பொன்னையன்
இராமசாமி ஐணர் - நீர்வை பொன்னையன்
S.K.கந்தையா - த.ந.பஞ்சாட்சரம்
பூபாலசிங்கம் - சிவா சுப்பிரமணியம்
அப்துல் காதர் - M.G.பசீர்
ஜெயம் தர்மகுலசிங்கம் - C.தர்மராசன்
பொன் கந்தையா - M.குமாரசாமி

கூட்ட ஒழுங்கமைப்பு

அனைவரும் அன்புடன் அழைக்கப்படுகிறார்கள்.

0.0.0.0.0.0.0

பேராசிரியர் க.கைலாசபதி சமூக மாற்றத்திற்கான இயங்காற்றல்

2011-10-13T02:40:00.000-07:00

தமிழ் கலை இலக்கியப் பரப்பில் 'பேராசிரியர் க.கைலாசபதி மிக முக்கியமான ஆளுமைகளில் ஒருவர் என்பதில் சந்தேகமில்லை. அவர் மறைந்து சுமார் 30 ஆண்டுகள் ஆகிவிட்டபோதும் அவரது பெயர் குறிப்பிடப்படாத அரங்கு இல்லை எனச் சொல்லுமளவிற்கு இன்றும் பேசப்படுகிறார். விமர்சனங்கள் அவருக்கு ஆதரவாகவும் எதிராகவும் எழுப்பப்பட்டபோதும் அவரது பெயர் தொடர்ந்தும் உச்சரிக்கப்படுகிறது. அவரது எழுத்துகளிலிருந்து உதாரணங்கள் காட்டப்படுகின்றன. அவரது நூல்கள் பாடப் புத்தகங்களாகவும் பயிலப்படுகின்றன.

ஆயினும் அவரை நேரடியாகத் தெரியாத, அல்லது அவரது காலத்தில் வாழ்ந்திராத இளம் எழுத்தளார்களும் ஏனைய மாணவர்களும் இருக்கிறார்கள். இன்றைய தலைமுறையினருக்கு 'பேராசிரியர் க.கைலாசபதி பற்றிய ஒரு சிறிய ஆனால் காத்திரமான அறிமுகத்தைத் தருவதற்கான ஒரு நூல் தேவை என உணரப்பட்டது.

இந்நிலையில் திரு லெனின் மதிவானம் எழுதி குமரன் புத்தக நியைத்தின் வெளியீடாக ஒரு நூல் வெளிவந்துள்ளது.

'பேராசிரியர் க.கைலாசபதி சமூக மாற்றத்திற்கான இயங்காற்றல்' என்ற லெனின் மதிவானம் அவர்களின் இந் நூல் ஆய்வு விழா 09.10.2011 ஞாயிறு மாலை நடைபெற்றது.

இலங்கை முற்போக்கு கலை இலக்கிய மன்றத்தின் ஆதரவில் வெள்ளவத்தை தர்மாராம வீதியில் உள்ள பெண்கள் கல்வி ஆய்வு நிறுவனத்தில் மாலை 4.30மணிக்கு ஆரம்பமாகியது.

கூட்டத்திற்கு தலைமை தாங்கியவர் திரு சிவா சுப்பிரமணியம் அவர்களாகும்.

" சமூகவியல் நோக்கிச் சிந்திப்பதற்கும் எழுதுவதற்கும் வழிகாட்டியவர் அவராகும். இலக்கியப் படைப்பானது மனிதநல மேம்பாட்டிற்காக இருக்க வேண்டும் என்பதை வலியுறுத்தியவர் அவர்.

பத்திரிகைத்துறை, பல்கலைக்கழம், விமர்சனம் என பல்துறைகளில் தனது ஆளுமையை அவர் பதித்தார். இதனால்தான் 50 வருடங்கள் மட்டுமே வாழ்ந்து ஆற்றிய பணி சந்ததி சந்ததியாக பயன்படுத்தப்பட்டும் முன்னெடக்கப்ட்டும் வருகிறது.

மிகக் கடுமையான விமர்சனங்களுக்கு அவர்ஆளானார். காய்த்த மரம் கல்லெறிபடுவது போல அவர் கல்லெறிபட்டார். அவர் வாழ்ந்த காலத்தில் மட்டுமின்றி மறைந்து பல காம் ஆன பின்னரும் அவர் மீதான விமர்சனங்கள் தொடர்கின்றன. இந்த விமர்சனங்கள் பெரும்பாலும் கோட்பாட்டு ரீதியாகவே எழுப்பப்பட்டது. தனிப்பட்ட விமர்சனங்கள் குறைவு எனலாம்" என திரு சிவா சுப்பிரமணியம் தனது ஊரையில் குறிபிட்டார்.

ஆய்வுரையை திரு ந.இரவீந்திரன் ஆற்றினார்.

"வாழ்க்கைப் பின்னணி, எழுத்துக்கள், பத்திரிகைத்துறை, பல்கலைக்கழகம், அரசியல், இலக்கிய அடைப்புகள், விமர்சனங்கள், நிறைவுரை ஆகிய தலைப்புகளில் நூல் பிரித்து எழுதப்பட்டுள்ளது. பின்னிணைப்பாக

கைலாசபதி பற்றிய முக்கிய தகவல்கள்
கைலாசபதியின் எழுத்துக்கள் வெளிவந்த பிரசுரங்கள்
உலகத் தமிழாராச்சி மாநாடு: பின்னணியும் பின்நோக்கும் - க.கைலாசபதி
ஈழத்துத் தமிழ் இலக்கியம் - க.கைலாசபதி
சோஷலிசத்திற்கான பாதை பற்றி பேராசிரியர் கைலாசபதி

ஆகிய முக்கிய கட்டுரைகள் அடங்குகின்றன.சுமார் 103 பக்கங்களிலுள்ள நூலில் இப் பின்னிணைப்புகள் 40 பக்கங்களை அடக்குகின்றன.

50களில் முற்போக்கு எழுச்சி எற்பட்டது. பின்னர் ரஷ்ய, சீனா எனப் பிரிந்தது. இவர் உறுதியாக சீன தளத்தை எடுத்துக் கொண்டார் இருந்தபோதும் மாற்றக் கருத்தினர் மீது பகைமை பாராட்வில்லை. இதனால் முற்போக்கு எழுத்தாளர் சங்கம் உடையாமல் இயங்க முடிந்தது. சீனா சார்பாக மாற்றுக் கருத்துக்களை எதிர்த்து கடுமையாக கட்டுரைகளை எழுதியுள்ளார். சோஷலிச சமூதாயம் நோக்கியதாகவே அவரது பார்வை இருந்தது.

1974ல் தேசிய கலை இலக்கியப் பேரவை ஆரம்பித்தது. தாயகம் சஞ்சிகையை முதன் முதலாக நெல்லியடியிலிருந்து வெளியிட்டு வைத்தது அவர்தான்.
விமர்சனங்களைவிட ஆய்வக்கட்டுரைகளிலேயே அதிக நேரம் செலவழித்தார். அவர் தன் அணிசார்ந்தவர்களைத் தூக்கிப்பிடித்து முற்றவர்களை மதிக்கவில்லை என்ற குற்றச்சாட்டு அவர் மீது வைக்கப்படுகிறது. ஆனால் மக்கள் சார்ந்தவற்றை, அவர்களை வழிப்படுத்தும் பார்வைகளை ஆதரித்தார் என்பதே உண்மை.

மஹாகவியை இருட்டித்தார் என்று சொல்வது தவறு. அவர் பற்றி அவர் சில இடங்களில் சொல்லியிருக்கிறார். ஆனால் மக்கள் இலக்கியம் எனப் பார்க்கும்போது மஹாகவியிடம் முற்போக்கான சில கருத்துகள் இருந்தபோதும் முற்போக்கு இயக்கத்தோடு சேர்ந்து இயங்கியவர் அல்ல. கைலாசபதி தான் சார்ந்த கருத்துள்ள படைப்புகளுக்கு முக்கியத்துவம் அளித்தாரே ஒழிய ஏனையவற்றை ஒதுக்கவில்லை.

மக்கள் சாதீயத்திற்கு எதிராக உக்ரமாகப் போரடிக் கொண்டிருந்தபோது தேரும் திங்களும் என்ற கவிதையில் மஹாகவி தேர்வடம் பிடிக்க கெஞ்சி மன்றாடும் புலம்பலை வெளிப்படுத்தினார்.ஆனால் சுபத்திரன் நெருப்பாக வீராப்போடு எழுதினார். அதை இவர் பாராட்டினார்.

உள்நாட்டு நிலவரங்கள் பற்றி பல கட்டுரைகள் எழுதியுள்ளார். அவற்றையும் நூலாக வெளிக்கொணர வேண்டும்." என்றார் ந.இரவீந்திரன் தனது உரையில்.

மற்றொரு ஆய்வுரையைத் தர இருந்த பேரசிரியர் சபா ஜெயராசா சமூகம் அளிக்கவில்லை. தான் அவசர வேலையாக வவுனியா சென்றிருப்பதால் கலந்து கொள்ள முடியவில்லை எனச் செய்தி அனுப்பியிருந்தார்.

வாசகர் கருத்தரங்கில் கே.விஜயன் மற்றும் கே.எஸ்.சிவகுமாரன் ஆகியோர் கருத்துரைத்னர்.

லெனின் மதிவானம் தனது ஏற்புரையை காலம் கடப்பதை அடுத்து சுருக்கமாகச் செய்தார்.

கைலாசபதி தனது காலத்திற்கு முந்தியவர். அவரை நேரச் சந்தித்ததோ பழகியதோ இல்லை. தனது தந்தையும் அவரது நண்பரான திருகணேசலிங்கனுாடகவுமே அவரது பெயர் முதல் அறிமுகமானது. அவரை பற்றிய நூலைத் தந்து படிக்கவைத்தவரும் அவர்தான். ஹைலண்ட்ல் கற்பித்த ஆசிரியர் ஒருவர் கைலாஸ்சின் பார்வை பற்றி எப்பொழுதும் சொல்லுவார். இவை அவர் பற்யி ஆரிவத்தை எழுப்பின.

90களில் தேசியகலை இலக்கியப் பேரவை ஊடாக பார்வை விரிந்தது. இந்த நூலை எழுத வேண்டும் என்ற ஆவல் ஏற்பட்டது. இந் நூலை எழுதுவதற்கான பல தகவல்களை ரவீந்திரன், நீர்வை பொன்னையன், நந்தினி சேவியர், இருதயராஜா ஆகியோர் வழங்கினர். அவர்களுக்கு நன்றி என்றார்.

கைலாசபதி பற்றியும் அவரது ஆக்கங்கள் பிரசுரங்கள் பற்றிய பட்டியல் பூரணமானது அல்ல. இன்னமும் பலவற்றைச் சேகரிக்க வேண்டும். அவற்றை பின்னர் இணைப்பேன் என்றார்.

கூட்டம் 7மணியளவில் நிறைவு பெற்றது.

0.0.0.0.0.0.0

பவளவழா நாயகன் கே எஸ்சிவகுமாரனின் சினமா

2011-09-30T19:28:00.000-07:00

இது எமது இனிய நண்பர் கே.எஸ்.சிவகுமாரன்
அவர்களின் பவளவிழா ஆண்டு.
01.10.2011 ல் அவர் தனது 75 வயதில்
காலடி எடுத்து வைக்கிறார்.

0.0.0.0

எல்லோர்க்கும் இனியவர் சிவகுமாரன்
என்றும் அவர் இளங்குமரன்

எதிரிக்கும் மங்காத புன்னகை
அவரது ஆயுதம்.
பூவிற்கும் நோகாத மென்மை
எழுத்திலும்..
மென்மையை நோகடிக்கும்
உள்ளத்தின் மென்மை.

படைப்பினைக் கொல்லாத
பதமான விமர்சனம்
பிறமொழிப் புத்தாக்கங்களை
தமிழுக்குப் பரிமாறும் வித்தையில் வல்லவன்.

சீரிய சினமா இதுவெனக் காட்டியவர்
சினமா ரசனையைச் சிக்கெனப் புகட்டியவர்
சினமா பார்க்கச் சென்னைக்கும் பறப்பவர்.

நீண்டு நிறையணும் அவரது வாழ்வு
நாளும் ஒளிவிளக்காக
வழிகாட்டணும் எமக்கெல்லாம்
வாழி வாழி.

0.0.0.0.0.0.0

பவளவிழா நாயகனுக்கு வாழ்த்துக்கள்.

சரியாகப் பத்து ஆண்டுகளுக்கு முன்னால் 2001 ல் அவரது அசையும் படிமங்கள் என்ற சினிமா பற்றிய நூல் வெளிவந்தது. அந்தக் கூட்டத்தில் நான் ஆற்றிய உரையை இங்கு பகிர்ந்து கொள்கிறேன்.

நூல் வெளியீட்டு உரை

அண்மையில் கே.எஸ்.சிவகுமாரன் அவர்கள் எழுதிய அசையும் படிமங்கள் என்ற நூல் வெளியிடப்பட்டுள்ளது. இது இலக்கிய உலகில் நன்கறியப்பட்ட மூத்த எழுத்தாளரான கே.எஸ்.சிவகுமாரனின் 13வது நூல்.

இந்த நூல் வெளியீடு இலங்கை இலக்கிய உலகைப் பொறுத்தவரையில் ஒரு மிக முக்கியமான நிகழ்வு என்று கருதுகிறேன். ஏனெனில் இது ஒரு முன்னோடி நிகழ்வு. ஈழத்து இலக்கியப் பரப்பில் புதிய துறை சார்ந்த நூல். நிறைந்த தகவல்களுடன், நுணுக்கமும் பரந்த தேடலும் கொண்ட ஒருவரின் பல்லாண்டு கால முயற்சிகளின் அறுவடையாக மலர்ந்துள்ளது.

இலங்கையைப் பொறுத்த வரையில் சினிமா சம்பந்தமான நூல்களின் வரவு இல்லையென்று சொல்லுமளவிற்கு குறைவாகவே இருக்கிறது. தம்பியையா தேவதாஸ் எழுதிய இலங்கைத் தமிழ்ச் சினிமா, சிங்களச் சினிமா பற்றிய இரு நூல்கள் தவிர வேறு எதுவும் வந்ததாக ஞாபகத்தில் இல்லை. இவை இரண்டும் முக்கியமாக வரலாற்று ஆவணங்கள் போன்றவை. பேராசிரியர் சிவத்தம்பி எழுதிய தமிழ்ச் சமூகமும் சினிமாவும் என்ற நூல் சினிமா, தமிழ்ச் சமூகத்தில் ஏற்படுத்திய தாக்கம் பற்றிய சமூக ஆய்வியல் நூல். சில்லையூர் செல்வராஜனின் தணியாத தாகம் திரைப்படச் சுவடி.

கே.எஸ்.சிவகுமாரன் அவர்களது நூல் அவற்றிலிருந்து முற்றிலும் வித்தியாசமானது. திரைப்படக் கலை, அதனை அறிவு பூர்வமாக நுகர்தல், அதன் தயாரிப்பில் உள்ள நுணுக்கங்கள் மற்றும் திரைப்படத் திறனாய்வு பற்றிய முன்னோடி நூல் என்பதில் இரு கருத்துக்கள் இருக்க முடியாது. இது திரைப்படக்கலை பற்றிய நுணுக்கமான தரவுகள் கொண்ட நூலாக இருப்பதுடன் திரைப்படத் திறனாய்வையும் உள்ளடக்கியுள்ளது. அத்துடன் திரைப்படக் கலையின் உலகளாவிய ரீதியான வளர்ச்சியின் சரித்திரம் ஆகியவற்றையும் உள்ளடக்கியுள்ளது.

இலங்கையில் திரைப்படம் பற்றிய நூல்கள் இல்லாதிருப்பது மட்டுமின்றி திரைப்படங்கள் பற்றிய நல்ல ஆரோக்கியமான கட்டுரைகளும் வெளிவருவதில்லை. வாராவாரம் பத்திரிகைகளில் வெளிவரும் திரைப்படம் பற்றிய கவர்ச்சியான பக்கங்களை இங்கு குறிப்பிட முடியாது. அவை திரைப்படம் பற்றிய செய்திகளையும், நடிக நடிகர் பற்றிய கிசுகிசுக்களையும், மலினமான விமர்சனங்களையும் வெளியிடுகின்றனவே அல்லாமல் திரைப்படத்தை ஒரு கலையாகப் பார்ப்பது இல்லை. சினிமா என்பது வெறும் பொழுது போக்கு என்ற எண்ணமும், ஜனரஞ்சகத் தன்மை கொண்ட பொழுதுபோக்கு ஊடகம்; என்ற பார்வையும்தான் உண்டு.

சினிமா என்ற காத்திரமான கலை பற்றிய தெளிவான உணர்வு கிடையாது. அதனுடைய கலை அம்சம் பற்றிய அக்கறையும் கிடையாது.
உண்மையில் சினிமா என்பது ஒரு காட்சி ஊடகம். ஓவ்வொரு படமும் ஆயிரக்கணக்கான பிரேம்களைக் கொண்டது. அது ஒரு தனிமனித முயற்சி அல்ல. கதை, கட்டுரை, போட்டோ, ஓவியம் போல ஒரு தனிக் கலைஞனின் படைப்பும் அல்ல. ஆயிரக் கணக்கானவர்களின் ஒருங்கிணைந்த முயற்சியில் உருவாவது.

அதில் நம்பத்தகுந்த இயல்பான கதை இருக்க வேண்டும், ஒவ்வொரு பாத்திரமும் தனித்துவமாக ஆக்கப்பட்டிருக்க வேண்டும். இயல்பான நடிப்பு, காட்சிகளோடு இசைந்து செல்லும் பின்னணி இசை இருக்க வேண்டும். வசனங்களால் அன்றி நுணுக்கமான காட்சிப்படுத்தும் பண்பினால் படம் நகர்த்தப்பட வேண்டும். அதன் தயாரிப்பிற்கு இத்தகைய விடயங்கள் பற்றிய அறிவு தேவை. அதை ரசிப்பதற்கும் எமக்கு சில அடிப்படை அறிவு தேவை. இந்நூல் அதனை எமக்கு வழங்குகிறது.

ஏன் பெரும்பாலான தமிழ் இயக்குனர்களுக்கும், திரைப்படக் கலைஞர்களுக்கும் கூட இக்கலை பற்றிய ஆழ்ந்த அறிவு கிடையாது. அந்த ஊடகத்தின் தனித்துவமான இயல்புகள் பற்றிய தெளிவு கிடையாது. இப்பொழுதுதான் திரைப்படக் கல்லூயில் படித்த பாலு மகேந்திரா, நாஸர், பார்;திபன், போன்ற சில கலைஞர்களின் பங்களிப்பு தமிழ்ச் சினிமாவிற்குக் கிடைத்து வருகிறது. ஏனையவர்களுக்கு நாடகம், சினிமா ஆகிய இரண்டு ஊடகங்களுக்கு இடையே உள்ள வித்தியாசம் தெளிவாகப் புலப்படுவதில்லை. இதற்குக் காரணம் தமிழ்ச் சினிமாவின் ஆரம்பமே நாடகத்தின் மறுவார்ப்பாக இருந்ததுதான்.

ஆனால் சினிமாவின் ஆரம்பமான மேற்குலகில் சினிமா என்பது ஒரு வித்தியாசமான மொழி என்ற உணர்வு ஆரம்பம் முதல் இருந்திருக்கிறது
பிரான்ஸ் தேசத்து லூமினர் சகோதரர்கள் சிடைட்டோகிராப் என்ற கருவியைக் கண்டுபிடிததனர். இக் கருவி மூலம் முதல் சலனப் படிமம் உருவாகியது. 1895 ம் ஆண்டு இவர்கள் பாரிஸில் தமது முதல் படத்தைக் காட்டியதாக வரலாறு கூறுகிறது. முதல் படம் ஓரிரு நிமிடம் மட்டும் ஓடிய குறும் திரைப்படம் அல்லது சினிமாத் துணுக்கு. அது ரயில் வரும் காட்சி. ஒருசில நிமிடங்களில் ஒரு ரயில் வண்டி ஓடி வரும் காட்சி. அசுரத்தனமான புகை வண்டி. புகை கக்கிக் கொண்டு ஓடிவருகிறது.. இது நாடக மேடையில் காணக் கிடைக்காத, நாடக மேடையில் பார்க்க முடியாத காட்சி. அது காட்டப்பட்ட அந்தக் கணத்தில் ரயில் வண்டி தம்மை நோக்கித்தான் வருவதாக மக்கள் அதிர்ச்சி அடைந்து ஓடினார்களாம்.

நான் பார்க்கவில்லை.

வெங்கட் சாமிநாதன் எழுதியுள்ளார். முதல் படத்திலேயே சொல்லப்பட்ட விடயமும் புதிது, சொல்லப்பட்ட முறையும் புதிதாக இருந்தது. ஆரப்பத்திலேயே புதிய ஊடகத்தின் குணம் அந்தக் கலைஞனுக்குப் பிடிபட்டுவிட்டது.

ஆனால் தமிழ் சினிமாவை எடுத்துக் கொண்டால் பவளக்கொடி, சங்கரதாஸ் சுவாமிகள் மேடையில் காட்டியதையே திரைக்கும் கொண்டு வந்தார்கள். நாடகக் காட்சிகளை அப்படியே படமாக்கினார்கள். இன்றுவரை நாடகத்தின் தாக்கத்திலிருந்து விடுபடுவது முடியாதிருக்கிறது. காரணம் திரைப்படக் கலை பற்றிய அறிவும் தெளிவும் அவர்களுக்கு எட்டாததாகவே இருந்திருக்கிறது. இந்நூல் அத் தெளிவை வழங்குகிறது.

திரைப்படக்கலை பற்றிய நூல்கள் இல்லாதிருப்பது ஒருபுறமிருக்க, இலங்கைப் பத்திரிகைகள் சஞ்சிகைகளில் சினிமா என்ற ஊடகம் பற்றிய தெளிவான அறிவோடு எழுதியவர்கள் பேசியவர்களின் எண்ணிக்கையை ஒரு கை விரலுக்குள் அடக்கிவிடலாம். இவர்களில் முன்னோடியும் முக்கியமானவரும் கே.எஸ்.சிவகுமாரன் அவர்கள்தான். அ.ஜேசுராஜா, உமா வரதராஜன், ரஞ்சகுமார், மற்றும் மறைந்து விட்ட சசி கிருஷ்ணமூர்த்தி ஆகியோர் மட்டுமே ஞாபகத்திற்கு வருகிறார்கள்.

ஆயினும் இவர்களுள் முன்னோடி கே.எஸ்.சிவகுமாரன் அவர்கள்தான். தன்னந்தனியனாக 45 ஆண்டுகளுக்கு முன் அவர் ஆரம்பித்த திரைப்படத் திறனாய்வுப் பணியை ஆரம்பித்தார். அவரது பணி காரணமாகவே நல்ல சினிமா என்றால் என்ன? அதனுடைய அம்சங்கள் அவை? அவற்றை நாம் எப்படி இரசிக்க வேண்டும் போன்ற விடயங்களை இலங்கையில் நல்ல வாசகர்களிடையே ஏற்படுத்த முடிந்தது. இன்று முன்னோடியும் முக்கியமானவருமான கே.எஸ்.சிவகுமாரன் அவர்களது பல்லாண்டு காலப் பணியின் ஒரு துளி இந்த நூலாக வருகிறது.

அவரே கூறியபடி இது திரைப்படக் கலையின் இலக்கணம் பற்றிய நூல். அவர் பார்த்த திரைப்படங்கள், பிறமொழிப்படங்களின் மதிப்பீடுகள், ஏனைய கட்டுரைகள் பின்னர் இன்னுமொரு நூலாக வரும். அதன் வெளியீடு நாம் இந்த நூலுக்குக் கொடுக்கிற ஆதரவில் தங்கியிருக்கறது என்று நாம் மனங் கொள்ளலாம்.

அவர்தான் திரைப்படத் திறனாய்வுத் துறையில் தங்கள் முன்னோடி என்பதை திரைப்படக் கலையில் அக்கறை காட்டிய பலரும் எடுத்துக் கூறியுள்ளார்கள்.

அ.யேசுராஜா- "இளமைக்காலத்தில் எங்களுடைய திரைப்ப ரசனை சரியாக வடிவமைக்கப்பட்டிருக்வில்லை. 65,66ம் ஆண்டுகளில் தினகரன் வாரமஞ்சரியில் மனத்திரை என்ற பத்தியை கே.எஸ்.சிவகுமாரன் எழுதி வந்தார்.அதில் சர்வதேச நாடுகளின் பிறமொழித் தரைப்பட விழாக்கள் பற்றி, முக்கியமான திரைப்படங்கள் பற்றி, சிங்கள் நாடகங்கள் பற்றி எல்லாம் எழுதி வந்தார். ...

..அவ்வாறு பார்க்கையில் தமிழ்ப்படங்கள் தொடர்பாக அவற்றினுடைய பலவீனங்கள், யதார்த்தமற்ற போக்குகள் பற்றிய குற்றச்சாட்டுகளை அவர் முன்கொண்டு வந்தார். உண்மையில் நான் கொண்டிருந்த ரசனையில் குறைபாடுகள் இருக்கின்றன என யோசிக்க வேண்டிய முதலாவது அனுபவம் மனத்திரை என்ற பத்தியினூடாகத்தான ஏற்படுகிறது."
யேசுராஜா போன்ற தரமான இலக்கியகர்த்தாக்களின் ரசனையை வளர்பதற்கு அவரது பத்தி எழுத்துக்கள் உதவியுள்ளன என்பதை இது எடுத்துக்காட்டுகிறது.

இன்னுமொரு இடத்தில் ஜேசுராசா இவ்வாறு எழுதுகிறார். ஷ 68ம் ஆண்டில் கே.எஸ்.சிவகுமாரனைத் தற்செயலாகச் சந்தித்தபொழுது பிரஞ்சுத் திரைப்பட விழா நடப்பது பற்றியும் அதனைப் பார்க்கும் படியும் சொன்னார். தனது பத்தி எழுத்துக்கள் ஊடாக மட்டுமின்றி தனிப்பட்ட முறையிலும், நண்பர்களிடையேயும் சினிமா ரசனையை வளர்க்க அவர் எடுத்த ஆரம்ப கால முயற்சிகளை இது எடுத்துக்காட்டுகிறது.

எஸ்.ரஞ்சகுமார்- நல்ல சினிமா என்றால் என்ன? அதன் குணாதிசியங்கள் எவை? ஏன்பன போன்ற விடயங்களை அவர் தமிழ் சமூகத்திற்கு எடுத்துக் கூற ஆரம்பித்தார். நல்ல சினிமாக்களை அவர் சுருக்கமாகவும் தெளிவாகவும் தனது பத்திகளில் அறிமுகப்படுத்தினார். துன்னந்தனியனாக இப்பணியை பல ஆண்டுகளாக ஆற்றி வந்தார். சுpனிமாவி மிக ஆர்வம் காட்டிய அ.ஜேசுராஜா, சசி கிருஷ்ணமூர்த்தி, உமா வரதராஜன் போன்றோருடன் நானும், பிறரும் அவரது விரல் சுட்டிக் காட்டிய வழியில் பயணித்தவர்களே.

திசை, அலை, சரிநிகர், மூன்றாவது மனிதன் போன்ற சஞ்சிகைகள் தரைப்படக் கலைபற்றிய உணர்வை வாசகர்களிடையே ஏற்படுத்த சில முயற்சிகள் எடுத்துள்ளன. வீரகேசரி, தினகரன் ஆகியவற்றின் ஞாயிறு இதழ்களிலும் மல்லிகை சஞ்சிகை ஆகியவற்றிலும் கே.எஸ்.சிவகுமாரனின் சில நல்ல கட்டுரைகள் வெளிவந்திருப்பதை இந்த நூல் மூலம் நாம் அறிந்து கொள்ளக் கூடியதாக இருக்கிறது.

நூலின் பயன்பாடு

1. திரைப்படம் பார்க்கும் அனைவரும் படிக்க வேண்டிய நூல் இது. அவரே பக்கம் 29ல் கூறுவது போல படத்தைப் காண்பது ஒன்று. அதனைப் பிரக்ஞையுடன் நுகர்வது மற்றொன்று. ஒரு திரைப்படததை சரியான முறையில் நுகர்வதற்கான வழிகாட்டி இந்நூல். நூல் முழுவதும் இது பற்றிப் பேசப்பட்டாலும் ஷஒரு திரைப்படத்தை எவ்வாறு நுகர்வது?' என்ற தனிக்கட்டுரையும் உண்டு.
2. திரைப் படங்களை திறனாய்வு செய்யும், செய்ய விரும்புபவர்களுக்கு கை நூலாக உதவக் கூடியது. இந்நூலில் உள்ள 22 கட்டுரைகளில் குறைந்தது 5 கட்டுரைகள் திரைப்படத் திறனாய்வு பற்றிப் பேசுகின்றன.
3. திரைப்படக் கலை பற்றியும். அதன் அணுகுமுறை பற்றியும் அறிய விரும்பும் கலைஞர்களுக்கும் வருங்காலத்தில் அவ்வாறு வர உத்தேசிப்பவர்களுக்கும் உதவும்.
4. முதற்திரைப்படம் மற்றும் திரைப்படத் துறையின் வரலாறு பற்றிய சில கட்டுரைகளை அடக்கியுள்ளது.
5. திரைபடக் கலை பற்றிய சில தமிழ் நூல்கள் சஞ்சிகைகள் பற்றிய தகவல்களையும் அடக்கியுள்ளது. எனவே தகவற் களஞ்சியமாகவும் பயன்னடக் கூடியது.

நூலாசிரியர் பற்றி

கே.எஸ்.சிவகுமாரன் அவர்கள் அக்டோபர் முதலாம் திகதிதான் தனது பிறந்த தினத்தை கொண்டயுள்ளளார். இது அவரது 65வது பிறந்ததினம். ஈழத்து இலக்கிய உலகில் கடந்த 45 வருடங்களாக ஆழமான தாக்கத்தை ஏற்படுத்தி வருபவர் அவர். இன்று அவரை நாம் ஒரு திறனாய்வாளராக அறிந்து கொண்டாலும் இலக்கியத்தில் பல்முறை ஆளுமை கொண்டவர்.

தமிழில் மாத்திரமின்றி ஆங்கிலத்திலும் எழுதுபவர். அவரது முதல் நூல் வெளியீடு ஒரு ஆங்கில நூல்தான். Thamil Writings in Sri Lanka.Tamil அல்ல Thamil என அவர் குறிப்பிட்டது கவனத்தில் எடுக்கப்பட வேண்டிய விடயம். Aspects of culture inSri Lanka என்ற அடுத்த ஆங்கில் நூல் 1992ல் வெளிவந்தது. நல்ல சிறுகதை எழுத்தாளர். உண்மையில் அவரது முதல் தமிழ் நூல் ஒரு சிறுகதைத் தொகுப்புத்தான். 1982ல் அவரது முதல் சிறுகதைத்த தொகுப்பான சிவகுமாரன் சிறுகதைகள் வெளிவந்தது. இருமை என்ற இரண்டாவது சிறுகதைத் தொகுப்பு 1998ல் வெளி வந்தது.

அவரது ஏனைய நூல்கள் அனைத்தும் இலக்கியம், திறனாய்வு சார்ந்தது.
விமர்சனத் துறையில் அவரது பங்களிப்பு மும்முனைப்பட்டது. திறனாய்வாளர், மதிப்புரைகள் வழங்குபவர், பத்தி எழுத்தாளர்.

ஆயினும் அவர் தன்னை பெரும்பாலும் பத்தி எழுத்தாளர் என்றே சொல்லிக் கொள்வார். நானும் அவரை ஆரம்பத்தில் பத்தி எழுத்தாளராகவே கண்டு கொண்டவன். 1980ல் அவர் Island பத்திரிகையில் எழுதிய Cleanings என்ற பத்தியை வாராவாரம் மிகுந்த ஆர்வத்தோடு வாசித்து பல புதிய விடயங்களை அதனுடாக்கக் கற்றுக் கொண்டவன்.

பத்தி எழுத்து என்பது லேசானது அல்ல.

அதற்கு இலக்கியத்தில் முக்கிய இடமும் கடமையும் இருக்கிறது. பரந்து பட்ட ரீதியில் மக்களைச் சென்றடைவது. புலமை சார் திறனாய்வாளர்கள் போல இது பல்கலைக்கழக மட்டத்தில் முடங்கிக் கிடப்பது அல்ல. பல்கலைக்கழக மட்டம் முதல் பாமரன் வரை எல்லோரும் விரும்பி வாசிப்பதுதான் பத்தி எழுத்துக்கள்.

இலங்கையில் பத்தி எழுத்துக்கள் என்றவுடன் கே.எஸ்.சிவகுமாரனனோடு வேறு சிலரும் ஞாபகத்திற்கு வருகிறார்கள். சில்லையூர் செல்வராஜன், சோமகாந்தன், அந்தனி ஜீவா, யேசுராஜா, தெளிவத்தை ஜோசப், இரத்தனவேலோன்.

பத்தி எழுத்துக்கள் எப்படி இருக்க வேண்டும்?

புதியன பற்றி எழுத வேண்டும்
பல்துறை பற்றி எழுத வேண்டும்
எழுத்தில் கவர்ச்சியும், வாசகர்களோடு அந்நியோன்யமான தொடர்பு கொண்டிருப்பது போன்று நேரடியாகப் பேச வேண்டும்.
அவர்களை வாசிக்க, கேட்க, பார்க்கத் தூண்ட வேண்டும். வாசகர்களை தேடலில் ஊக்குவிக்க வேண்டும். அதே நேரத்தில் இது புத்தகம், சினிமா, நாடகம், பத்திரிகை போன்றவற்றை விற்பனையாக்கும் மலிவான தந்திரமக இருக்கவும் கூடாது.
எல்லா மட்டத்தினருக்கும் புரியும் படியான இலகு நடை வேண்டும்.

இதனைச் செய்வதற்கான தகமை கே.எஸ்.சிவகுமாரனுக்கு நிறையவே இருக்கிறது.

1.    பரந்துபட்ட இலக்கியத் தேடலும் அனுபவமும் இருக்கறது. சிறுகதை நூவல் கவிதை திறனாய்வு மாத்திரமின்றி நாடகம், சினிமா, ஓவியம், புகைப்படம், இசை போன்ற பலதுறைகளில் சார்ந்த ஈடுபாடு, பரிச்சியம், புலமை
2.    பரந்த தேடல் உள்ளவர். தமிழில் மாத்திரமின்றி ஆங்கிலத்திலும் தேடுபவர். அவரது பத்திகளைப் படிப்பவர்களுக்கு அவர் எவ்வளவு பரந்த பரப்பில் வாசித்து தன் அறிவை வளர்த்துக் கொள்கிறார் என்பது புரியும். பலரும் வாசிக்கக் கூடும். ஆனால் அதை அவர்தான் வாசகர்களோடு பகிர்ந்து கொள்கிறார்.
3.    நல்ல கல்வித் தகமை- பேராதனைப் பல்கலைக்கழகப் பட்டதாரி. அத்துடன் படைப்பியல் டிப்ளோமா, இதழியலில் டிப்ளோமா
4.    சினிமாத்துறை சார்ந்த பயிற்சி- சினிமா நுகர்வில் மாத்திரமின்றி Film Script writing,Film Direction ஆகியவற்றிலும் Diploma பெற்றிருக்கிறார்.
5.    ஆங்கிலப் புலமை இருக்கிறது. இதனால் வேற்று மொழி இலக்கியங்களையும் சர்வதேச கலை இலக்கிய நடப்புகளையும் தமழில் தரக் கூடிய புலமையும், ஆற்றலும் இருக்கிறது. அதேபோல தமிழ்ப் படைப்புகளை ஆங்கிலத்திலும் தரவல்லவர்.
6.    பரந்த அனுபவம் இருக்கறது. வெறும் வாசகனும் எழுத்தாளனும் அல்ல. வீரகேசரி, நவமணி, Island, Daily News போன்ற பத்திரைகளின் ஆசிரிய பீடங்களில் பணியாற்றிய அனுபவம், உள்நாட்டிலும் வெளிநாடுகளிலும் ஆங்கில இலக்கிய ஆசிரியராகக் கடமையபற்றிய அனுபவம், இலங்கை வானொலி, ரூபவாஹினி ஆகியவற்றில் ஒலிபரப்பாளனாகவும், ஒளிபரப்பாளனபகவும் கடமையாற்றிய அனுபவங்கள்.
7.    தனது திறமையும் புலமையும் புலப்படுமாறு எழுத வேண்டும் என்ற எண்ணமின்றி, மக்ளுக்குத் தேவையானவற்றை இலகு வாசிப்பிற்கு ஏற்றவாறு கொடுக்க வேண்டும் என்ற மனப் பக்குவம் உள்ளவர்.
8.    மென்மையான மனம் கொண்டவர். சுடு சொல்லைத் தாங்க முடியாதவர். அதே போல படைப்பாளியைச் சாகடிக்காமல் படைப்பை விமர்சிக்கும் இலக்கிய நாகரீகம் கொண்டவர்.

கார்த்திகாயினியின் நூல் வெளியீட்டு விழாவில்

இது மீரா பதிப்பத்தின் 25வது வெளியீடு. மீரா பதிப்பகம் இரத்தினவேலோனின் புதிய பயணம் என்ற நூலுடன் ஜூலை 1996ல் ஆரம்பமாகியது. இலக்கியத்தில் தணியாத தாகம் கொண்ட இரத்தினவேலோனின் அயராத உழைப்பில் உருவானது. அவருக்குக் கை கொடுத்து நிற்பவர் பள்ளிப் பருவம் முதல் இன்றுவரை அவரது நண்பனாக இருக்கும் நண்பனான இரஞ்சகுமார். இரண்டு கலைஞர்களின் தயாரிப்பு என்பதால் புத்தகத் தயாரிப்பில் அழகியலும் தொழில் நிபுணத்துவமும் கலந்த முழுக் கவனம் செலுத்தப்பட்டுள்ளதை அவதானிக்க் கூடியதாக உள்ளது.

பாலு மகேந்திராவும் கே.எஸ் சிவகுமாரனும் பின்னணியில் நிற்கும் அழகிய அட்டைப்படம். கண்ணுக்கு இதமான எழுத்துருக்களுடன் நேர்த்தியான தயாரிப்பு.

பாலு மகேந்திராவுடன்

மீரா பதிப்பத்தின் வெளியீடாக வந்த கே.எஸ் சிவகுமாரனது இரு நூல்கள்; மாகாண சாகித்திய பரிசு பெற்றுக் கொண்டதையும் இவ்விடத்தில் நினைவு கொள்ளலாம்.

இறுதியாகச் சொல்வதாயின் எனக்குப் பிடித்த புத்தகம். எனக்கு பல புதிய விடயங்களையும் தகவல்களையும் தந்து எனது பார்வையை விசாலிக்க வைத்த நூல். உங்களுக்கும் நிச்சயம் பிடிக்கும் என நம்புகிறேன்.

'சோக்கவுட்’ 'நிசப்தம்' ஈரானியச் சினிமா

2011-09-30T02:41:00.000-07:00

நிசப்தம் எனும் நாத வெள்ளம் ‘சோக்கவுட்’ (The Silence)

கண்கள் இருந்தும் எம்மைச் சூழவுள்ள உலகைத் தெரிந்து கொள்ளாத மடையர்களாக நாம் வாழ்ந்து கொண்டிருக்கிறோம். காதுகள் இருந்தும் எம்மைச் சூழவுள்ள உலகிலிருந்து எழும் உன்னத ஒலிகளின் லயநயத்தை ரசிக்கத் தெரியாத கலைஞானம் அற்றவர்களாக உழன்று கொண்டிருக்கிறோம்.

இருந்த போதும் காலையில் விழித்து எழும்போது எழுகின்ற பறவைகளின் ஒலியும், தென்றலின் இசையும், பல எழுத்தாளர்களின் மனத்தைத் தொடுவதை படைப்புகளுடாக வாசித்து மகிழ்ந்திருக்கிறோம். ஒவ்வொரு மனிதனுக்குள்ளும் நிச்சயம் ஒரு கலைஞன் ஒளிந்திருக்கிறான். ஒளிந்திருக்கும் அக் கலைஞனை மீட்டெடுத்து சுருதி கூட்ட வேண்டியது அவரவரால்தான் முடியும்.

வீதியில் ஓடும் வாகன இரைச்சலும், தொலைவில் கூவிச்செல்லும் இரயிலின் சக்கரங்கள் தண்டவாளத்தில் அராத்தும் ஒலியும் தூக்கத்தைக் கெடுத்து பலரையும் இம்சைப்படுத்துகின்றனவே ஒழிய மனம் உருக வைப்பதில்லை.
அடுத்த வீட்டில் கதவை அடித்து மூடும் ஓசையும், பைப் நீர் விழுந்து வாளி நிறைக்கிற ஒலியையும், அதிலிருந்து நீரை மொண்டு குளிக்கிற ஓசையிலும் ஒரு இனிய லயம் கலந்திருப்பதை எங்களில் யாராவது, எப்பொழுதாவது உணர்ந்திருக்கிறோமா?

நித்திரையைக் குழப்புகின்றன, அமைதியைக் குலைக்கினறன என்று எரிச்சல்படத்தான் பலருக்கும் தெரிகிறது. இச் சத்தங்களும் ஒலிகளும் சூழலை மாசடையச் செய்து எமது காதுகளை மந்தமாக்குகின்றன என்ற குற்றச் சாட்டுகளுக்கும் குறைவில்லை. அதில் விஞ்ஞான ஆதாரம் இருப்பதை மறுக்க முடியாதுதான். ஆனால் ஓசை இல்லாத ஒரு உலகத்தை உங்களால் கற்பனை பண்ண முடிகிறதா? எவ்வளவு மந்தமான உயிர்ப்பற்ற சவக்காலையின் வெறுமைக் கலவையாக இருக்கும்.

கண்களால் காணும் காட்சிகளாவன, காதில் விழுபவற்றை விட வேகமாக எமது மூளையில் உறைப்பதால்தான் ஒலியை விட ஒளியில் மறந்து, ரசிக்கத் தெரியாது வாழ்கிறோம்.

குர்ஸிட் பார்வையற்ற ஒரு சிறுவன். அவன் எங்களைப் போல கலாஞானசூனியனாக இல்லை. அவனைப் பொறுத்த வரையில் அவனைச் சுற்றி எழுகின்ற ஒவ்வொரு ஒலியிலும் ஏதோ ஒரு இசை இருக்கிறது. லயம் இருக்கிறது. மனத்தை ஈர்க்கும் அமானுச சக்தி இருக்கிறது. வாத்திய ஒலிகளும், இன்னிசையும் மட்டும் அவனை ஈரப்பதில்லை. அவனைப் பொறுத்தவரையில் உலகே ரம்யமான ஒலிகளின் கூடம்தான். ஆனால் அதில் நல்லதையும் கெட்டதையும் பிரித்தறிந்து ரசிப்பவன்.

காலையில் இவனது வீட்டுக் கதவை கோபத்தோடு ஓங்கி அறைந்து தட்டும் ஒலியும், தொடர்ந்து அவர்களைத் துயில் எழுப்பி வாடகைப் பணத்தை அறவிடச் சத்தமிடும் வீட்டு சொந்தக்காரனின் கோபக் குரலிலும் கூட ஏதோ ஒரு ஓசை நயத்தை அவனால் ரசித்து மகிழ முடிகிறது.

பும் பும் பூம்… பும் பும் பூம்…

இசைக்கு அப்பாலும் அவனது உணர்திறன் விசாலித்திருக்கிறது. வேலைக்குச் செல்லும் வழியில் தாம் சுட்ட பிரட்டுகளை விற்பதற்காகப் பெண்கள் நிற்பார்கள். தனது விரல்களின் தொடு உணர்வுகள் மூலம் அவர்களது பிரட்டின் தரத்தை இவனால் சொல்லிவிட முடிகிறது. ஆனாலும் ஒருவளது பிரட் சற்றுக் காய்ந்ததாக இருந்தபோதும் அவளிடம் வாங்கிச் சாப்பிடுகிறான். காரணம் அவளது குரல் இனிமையானது என்கிறான். அவனைப் பொறுத்தவரை உணவின் சுவையை விட இசை மாண்புடையது.

10-12 வயது மதிக்கத்தக்க சிறு பையன் அவன். ஒலிகளின் நயத்தைக் கூர்த்தறியும் அற்புத ஆற்றல் இயல்பாகவே அவனுக்கு வாய்த்திருந்தது. தனது தாயுடன் வாடகை வீட்டில் குடியிருந்து வருகிறான். தகப்பனற்றவன் எனச் சொல்ல முடியாது. ஏதோ தேவைக்காக ரசியாவிற்கு சென்ற தகப்பனிடமிருந்து எந்தத் தகவலோ உதவியோ கிடையாது. இதனால் மிகவும் வறுமையிலிருக்கும் அவனது குடும்பத்தின் வயிற்றுப்பாட்டிற்கு அவனது உழைப்பு அவசியமாக இருக்கிறது.

அவனது ஆற்றல் அவனுக்கு ஒரு தொழிலைத் தேடிக் கொடுத்திருந்தது. இசைக் கருவிகள் விற்பனை செய்யும் ஒரு கடையில் அவன் அவற்றிக்கு சுருதி மீட்டிக் கொடுப்பவனாகத் தொழில் பார்க்கிறான். ஆனால் எல்லா முதலாளிகளையும் போலவே இவனது முதலாளியும் காசு ஒன்றே குறியானவன். இவனது திறமையை மதிப்பவனாக இல்லை. யாராவது அவன் விற்ற வாத்தியத்தைக் குறை கூறினால், சுருதி சேர்த்துக் கொடுத்த இவனே குற்றவாளியாக ஏச்சு வாங்க வேண்டியவனாகிறான்.

வேலைக்குச் செல்லும்போது பஸ்சில் பயணிக்க நேருகிறது. போகும் வழியெல்லாம் இவன் சூழலிருந்து எழும் ஒலிகள் கேட்காதவாறு, தனது காதுகளைப் பொத்திக் கொண்டே பயணிக்கிறான். அவனாக விரும்பி இதைச் செய்வதில்லை. நல்ல இசை கேட்டால் இவன் தனது சூழலையும், தன்னைக் காத்திருக்கும் பணிகளையும் மறந்து விடுவான். இவனது கால்கள் தன்னிச்சையாக இசை ஒலியைப் பின் தொடரும். எங்கோ செல்ல வேண்டியவன் அதை மறந்து வேறெங்கோ சென்றுவிடுவான்.

இவனது பயணத்தில் உதவுவது ஒரு குட்டித் தோழி நதீரா. ஆனால் இவனிலும் சற்றுப் பெரியவள். பார்வையற்றவனின் கண்களாக அவள் இயங்குகிறாள். அத்துடன் இவன் வாத்தியங்களைச் சுருதி மீட்டும் போது, அது சரியாக இருக்கிறதா எனச் சரிபார்ப்பதும் அவள்தான். அவன் சுருதி மீட்டும் போது மெல்லியதாக அவளது காது வளையம் ஆட ஆரம்பிக்கும், பின் தலை முடி, முகம், கைகள் எனத் தொடர்ந்து இறுதியில் உடலே தாளலயத்திற்கு ஏற்ப ஆடத் தொடங்கிவிடும். அந்த அழகை ரசித்திக் கொண்டே இருக்கலாம். அற்புதமாக நடிக்கிறாள் அந்தப் பெண்.

அவளது உலகம் குர்ஸிட் மட்டுமே. இவனது கவனம் அங்கும் இங்கும் அலையவிடாது கவனமாகக் கூட்டிச் செல்பவள் அவள்தான். அவளால்தான் அது முடியும். தெருப் பாடகனின் இசையில் மயங்கி அவனது ஓசையைப் பின் தொடர்ந்து செல்வதால், வேலைக்குச் செல்லத் தாமதமாகி ஏச்சு வாங்காஙாகாது காப்பாற்றுவது அவள்தான்.

அவன் எல்லா அழகையும் ஆராதிப்பவன். அவளின் புற அழகை அல்ல. அவளின் உள்ளொளியைப் புரிந்து வைத்திருக்கிறான்.

குர்ஸிட் ஒரு வண்டு போன்றவன். அவற்றின் ஓசை இவனுக்குப் பிடித்தமானது. ஆயினும் சாணியில் மொய்க்கும் வண்டுகளின் ரீங்காரம் அபசுரம் என்பான். ஆனால் மலர்களில் தேன் தேடும் தேனீக்களின் ரீங்காரம் அற்புதமானது என ரசிப்பான். தேனீக்களுடன் பாசம் கொண்டவன். அவற்றோடு பேசுவதும் இவனுக்குப் பிடித்தமானது. அவை பற்றிப் பேசுவதில் மகிழ்வு கொள்பவன்.

ஆனால் அவற்றைப் போலவே இவனும் நெறிப்படுத்தப்படாத தேனீ. பதவி, பணம், அந்தஸ்த்து போன்றவை இவனது இசை ரசனையைப் பாதிப்பதில்லை. தெருப் பிச்சைக்காரன் எழுப்பும் இசை லயத்துடன் அமைகையில் அதில் ஆழ்ந்துவிடுவான். அந்த கானகக் கானமும் இவனை வாவென அழைக்கும்.

நெரிச்சல் மிகுந்த கடைத் தெருவில் இசையின் வழியே பயணிக்கிறான். இளைஞன் கையிலிருக்கும்; ரேடியோவிலிருந்து அற்புதமான இசை வருகிறது. நெருக்கமான சனங்களிடையே, இசையின் நீக்கல்களின் இடையே நெளிந்து வளைந்து புகுந்து பயணிக்கும் இவன் வழி தவறிவிடுகிறான். கூட வந்த நதீரா இவனைக் காணாது பயந்து தேடுகிறாள். என்னவானானோ என நாமும் கலங்கிவிடுகிறோம்.

ஆனால் அவள் எப்படி இவனைக் கண்டுபிடிக்கிறாள் என்பது அற்புதமான காட்சியாகிறது. அவள் தன் இரு கண்களையும் மூடிக் கொண்டு தேடியலைகிறாள். எங்கோ தொலை தூரத்தில் மங்கலாக இசை ஒலி கேட்கிறது. அதில் தன் மனத்தை ஆழச் செலுத்துகிறாள். கண்களை மூடியபடியே அது வரும் திசையில் தட்டுத் தடுமாறிப் பயணிக்கிறாள். அவள் அடைந்த இடம் ஒரு இசைக் குழு கானம் எழுப்பிக் கொண்டிருக்கும் கடையாகும். அங்கு வெளியே மதிலோரம் இசையில் மயங்கி, சுவரில் சாய்ந்தபடி தன் தனியுலகில் இருக்கிறான் குர்ஸிட்.

படம் முழுவதும் இசை பொங்கி வழிகிறது. காற்றில் பறந்தலையும் கடதாசிச் சுருள் போல நாம் அந்த இசையின் ஓட்டத்தில் அள்ளுண்டு பயணிக்கிறோம். மழை ஓசை இசையாகிறது. நாயின் குரைப்பிலும், குதிரையின் குளம்பொலியிலும், பறவைகளின் சிறகடிப்பிலும், செம்மறி ஆடுகளின் கனைப்பிலும் கூட இசை இருக்கிறது என்பதை உணர்ந்து அதிசயிக்கிறோம். ஒருதடவை வாத்தியத்துடன் சென்று கொண்டிருக்கும்போது மழை ஆரம்பிக்கிறது. அதில் குதித்து விளையாடி ஆனந்திக்கிறான். மழை விடவில்லை. நனைந்து தெப்பமாக குளிர்பிடிக்கிறது. ஓடும்போது தடக்கி விழுகையில் வாத்தியம் கை நழுவித் தூரப் போய் விழுகிறது. எங்கென பார்வையற்றவன் கண்டு கொள்வது எப்படி? மிகுந்த துயரம் ஆட்கொள்கிறது. ஏற்கனவே முதலாளி இவனை வேலையிலிருந்து கலைக்க முற்பட்டிருக்கிறான். இப்பொழுது வாத்தியமும் தொலைந்து விட்டால்?

ஆச்சரியம் காத்திருக்கிறது. வாத்தியத்தின் மேல் விழும் மழைத்துளிகள் ஓசையை எழுப்புகின்றன. அது ஒரு சீரான ஒலிலயத்தில் அவன் காதில் பாய்கிறது. இசைத்துளி பொழிகிறது. அதுவே அவன் மனத்திற்கு ஒளதடமாகிறது. வாத்தியமும் கிடைத்து விடுகிறது.

எமக்கென்று தனிப்பாதை கிடையாது. வானை எட்டும் முகில்களாகப் பறந்தும், ஆழ்கடல் சிறுமீன்களாக நீந்தியும் இசையுடன் இரண்டறக் கலந்து பயணிக்கிறோம். சுட்டெரிக்கும் தீயும் இல்லாத, குத்தி வலிக்க வைக்கும் முற்களும் இல்லாத ஆனந்தப் பெருவெளி. சண்டை, சச்சரவு, குரோதம் ஏதுவும் எம்மைச் சஞ்சலப்படுத்தாத படம்.

அவன் வாழும் வீடு நதியுடன் இணைந்தது. பாலத்தால் வீதிக்கு வர வேண்டும். அவன் வேலையிலிருந்து வரும்போதும் மரங்களின் நிழல் அமைதியான நீரில் பிம்பமாக விழும் தோற்றம் அற்புதமானது. அதிசயிக்க வைக்கிறது. கை தேர்ந்த ஓவியனின் கன்வஸ் ஓவியம் போல கலைநயம் மிக்கது.

அதேபோல Tajikistan நகரின் கடைத் தெருக்களிலும், வீதிகளிலும் எம்மை கைபிடித்து அழைத்துச் செல்கிறது கமரா. மிகச் சிறப்பான படப்பிடிப்பு. அலங்காரமான கடைகள், அழகான முகங்கள், இவை யாவும் வித்தியாசமான கோணங்களில். நாம் காண்பது அவ்வாறாக இருந்தபோதும், அவர்களின் மொழியும், கலாசாரமும் அந்நியமாக தோன்றியபோதும், அந்த மனிதர்களின் அடிப்படை உணர்வுகள் மற்றெல்லா மனிதர்களுடையது போலவே இருப்பதால், அதில் எங்களையும் அடையாளம் காண முடிகிறது. இதனால் படத்துடன் ஒன்றச் செய்கிறது.

மிகவும் மாறுபட்ட பார்வையில்; மனித வாழ்வின் மறக்கவொண்ணா கணங்களையும், மனத்தில் எழும் கவித்துவ உணர்வுகளையும் இசையில் குழைத்து அள்ளிச் சொரிகிறது இப்படம். உள்ளத்தை அள்ளிப்பிடிக்கும் ஓவியம் போன்றிருக்கிறது. உலகம், மனித வாழ்வு, இசை இவற்றை வெறுமனே சித்தரிப்பதற்கு அப்பாலும் பயணிக்கிறது. கனதியில் எம்மனத்தை ஆழ்த்தியபடியே படம் நிறைவுறுகிறது.

ஈரானின் புகழ்பெற்ற Mohsen Mahmalbaf ன் படைப்பு இது. அவர் திரைப்படத் துறையில் மிகப் பெரிய ஆளுமையாவார். நெறியாளர் மட்டுமல்ல நல்ல கதாசிரியரும் கூட. ஈரானிய சினிமாவில் புதிய அலை இவருடனேயே ஆரம்பிக்கிறது எனலாம். இவரது மிகப் பிரபலமான முதற் சினிமா கந்தஹர் ஆகும்.

இவரது வாழ்க்கை இவருக்கு நிறையவே கற்றுத் தந்திருக்கிறது. இந்தத் திரைப்படத்தின் நாயகனான குர்ஸிட் போலவே மிகச் சிறுவயதிலேயே குடும்பச் சுமையைத் தனது தோளில் ஏந்த வேண்டியதாயிற்று. 8 வயதிலேயே தந்தை இழந்து பல சின்னசின்னத் தொழில்களைச் செய்து, 15 வயதளவில் விடுதலைப் போராளியாகி, துப்பாக்கிச்; சூடுபட்டு சிறைப்பட்டவராவார். 4 ½ வருட தண்டனையில் தன்னைப் புடம்போட்டுக் கொள்கிறார். தீவிர அரசியலில் இருந்து விடுபட்டு இலக்கியத்தில் தன்னை ஆழ்த்திக் கொண்டு படிப்படியாக வளர்ந்தவர் ஆவார். இப்பொழுது பிரான்ஸ்சில் வசிக்கிறார்.

25 சினிமாக்களுக்கு மேல் இயக்கிய இவரது 5 திரைப்படங்கள் அவரது தாய் நாடான ஈரானில் தடைசெய்யப்பட்டுள்ளன. அதில் நிசப்தம் என்ற இந்தத் திரைப்படமும் அடங்கும்.

ஏன் இது தடைசெய்யப்பட்டது என்பதை படத்தை மனத்துள் மீள்வாசிப்பு செய்தேன்.

குர்ஸிட்டும், நதீராவும் பாதை வழி போகையில் அவள் திடீரென நிற்கிறாள். கையைப் பற்றி அவனையும் நிறுத்துகிறாள். அவள் முகம் பயத்தால் உறைந்திருப்தைக் காண்கிறோம். “அந்த வழியில் துவக்கோடு இளைஞன் நிற்கிறான். பெண்கள் முக்காடின்றி வந்தால் தாறுமாறாக ஏசுவான்” போகிற போக்கில் சொல்லிப் போகும் வசனமாக முதலில் தோன்றியது. அவள் வேறுபாதையால் செல்வோம் என்கிறாள். இது போன்ற வேறு ஓரிரு காட்சிகளும் இடம்பெற்றுள்ளன.

ஆனால் இரை மீட்கையில் மிகவும் முக்கியமான காட்சியாகப்படுகிறது. தீவிரவாதிகளும், மத கலாசார அடிப்படைவாதிகளும் மாற்றுக் கருத்துகளுக்கு இடமளிப்பதில்லை. துப்பாக்கி, பொல், கடும்சொல் போன்ற ஆயுதங்களால் மக்களை பயமுறுத்தி அடிமைப்படுத்துகிறார்கள். தங்கள் கருத்தை ஆயதமுனையில் திணிக்கிறார்கள். இவற்றைப் பொறுத்துக் கொள்ள முடியாத மக்கள் வேறுபாதையைத் தான் நாடமுடியும். நதீரா தெருப்பாதையை மாற்றுவது ஒரு குறியீடாக ஒலிப்பதாகவே நான் கருதுகிறேன். மிக நாச+க்காக தன் கருத்தைத் தெளிவித்திருக்கிறார். இப்படம் ஈரானில் தடை செய்யப்படுவதற்குக் இதுதான் காரணமாக இருந்ததோ தெரியவில்லை.

படம் முழுவதும் இசை அள்ளி அணைக்கிறது. வருடிக் கொடுத்து இதமளிக்கிறது. கிளுகிளுப்பூட்டிச் சிரிக்கவும் வைக்கிறது. மோனத் துயரில் ஆழவும் வைக்கிறது. இறுதிக் காட்சியில் பீத்தோவனின் 5வது சிம்பனி கம்பீரமாக ஒலிக்கிறது. மேற்கத்தைய உலகின் நாதமும், ஈரானிய கலாசாரத்தின் வாழ்வும், இசையாலும் அற்புதமான கமராக் கண்களாலும் இணையும் உன்னதம் அது.

மங்கிய ஒளி, அமைதியான ஆற்று நீர், அதில் மிருதுவான பூவாக மிதக்கும் ஓடம், தொலைவிலிருந்து அது மெதுவாக நகர்ந்து வருகிறது இவனையும் ஏற்றி வேறிடம் செல்ல. தொலைவில் அவர்கள் வாழ்ந்த வீடு அந்நியமாகி எட்டாத தூரத்தில் மறைந்துகொண்டு வருகிறது.

வேலை போய்விட்டது. வீட்டு வாடகை கட்ட முடியாததால் பொருட்களை தூக்கி எறிந்து அவர்களையும் வீட்டிலிருந்து வெளியேற்றி விடுகிறான் சொந்தக்காரன். நிர்க்கதியாகி நிற்கிறார்கள் அவர்கள். ஆனால் வாழ்வு என்றுமே அஸ்தமித்துப் போய்விடுவதில்லை. ஏனெனில் அஸ்தமனங்ளையும் உதயமாக்க வலு கொடுக்கும் இசை அவனது கைவசம் இருக்கிறது. அவனது கைகள் அசைகின்றன. தலை தாளம் போடுகிறது. லயநயத்துடன் உடல் அசைந்தாடுகின்றது. ஒரு இசை ஞானிக்குரிய நுட்பத்துடன் இசையைப் பிறக்க வைக்கின்றன.

அவனது கையசைவிற்கு ஏற்ப கடைத்தெருவே இசை எழுப்புகிறது. பானை, சட்டி, இசை கருவிகள், வாளால் மரமரிதல் என யாவும் வாத்தியங்களாகின்றன. தொழிலாளிகள் தாள லயத்துடன் தட்டி இசையாக எழுப்புகிறார்கள. சந்தை இசைக் கூடமாகிறது.

இசையில் மயங்கி மனக்கண் மூடிக் கிடந்த நாம் ஏதோ அருட்டுணர்வில் மடல் திறக்கையில் படம் முடிந்திருக்கிறது.

எம்.கே.முருகானந்தன்.

ஞானம் சஞ்சிகையில் வெளி வந்த எனது கட்டுரை.

0.0.0.0.0.0.0.0

கழிவகற்றும் கால்வாயின் துர்நாற்றம்

2011-09-15T03:15:00.000-07:00

சுடுவெயில் எரித்தழிக்க
கதிர் நீட்டும்.
மறுத்துரைத்து
நிழல் பரப்பி
களியாடும்
கரையோரத் தாவரங்கள்.
கட்டங்கள் இணை சேரும்
தம் நிழல் சேர்க்க.

சிறு குழாயால்
சிதறடித்துச் சீறி வந்து
பெரும் ஓடையில்
சங்கமிக்கும்
நீரிது.
சிறுநீரல்ல..

பற்றற்ற ஞானி
பற்றுடன் பற்ற நாடும்
பரமோன நிலை
சித்தமுடன் பற்றி வர
சத்தமின்றி சலனமின்றி
இசைந்தோடும்
கழித்த நீர்

கழிவகற்றும் கால்வாயின்
நீரடியில் மறைந்திருக்கும்
கரும் சேற்றின் துர்நாற்றம்
உள்ளுறையும்
வஞ்சனையை மறைத்தொழுகும்
கயமை நெஞ்சினும்
மேலானது.

எம்.கே.முருகானந்தன்.

0.0.0.0.0.0.0

'தகவம்' சிறுகதைகளுக்கான (2010)பரிசளிப்பு விழா

2011-09-03T05:58:00.000-07:00

சிறந்த சிறுகதைகளுக்கான பரிசுகளை வழங்குவதை தகவம் கடந்த பல ஆண்டுகளாகச் செய்து வருகிகிறது.

சென்ற ஆண்டிற்கான பரிசுகளைப் பெற்றோர் விபரம் மல்லிகை, ஞானம் உட்பட பல சஞ்சிகைகளிலும் பத்திரிகைகளிலும் வெளியாகியிருந்தன.

தகவம் எனச் சுருக்கமாக அழைக்கப்படும் தமிழ் கதைஞர் வட்டம் தனது வருடாந்த பரிசளிப்பு விழாவை எதிர்வரும் 4ம் திகதி செப்டெம்பர் 2011 அன்றுநடாத்த இருக்கிறது.

இவ்விழா கொழும்பு தமிழ் சங்கத்தின் சங்கரப்பிள்ளை மண்டபத்தில் மாலை 5.15 மணிக்கு தகவத்தின் தலைவர் திரு மாத்ளை கார்த்திகேசு தலைமையில் நடைபெறும்.

நிகழ்ச்சிகள் யாவும் குறித்த நேரத்தில் ஆரம்பமாகும் என அறிவிக்கப்பட்டுள்ளது.

இலக்கியத்திலும் குறிப்பாக சிறுகதைத் துறையில் ஈடுபாடு கோண்டோருக்கும் மகிழ்ச்சியளிக்கும் விழாவாக இருக்கலாம் என நம்பலாம்.

அனைவரும் அன்புடன் அழைக்கப்படுகிறார்கள்

நிவேதினி மற்றும் பெண்ணிய எழுத்துக்கள்.

2011-09-01T19:22:00.000-07:00

நிவேதினி மற்றும் பெண்ணிய எழுத்துக்கள்.

'பெண்ணியம் சார்ந்த தரமான கட்டுரைகள் கிடைக்கவில்லை. இதனால் பெண்ணியம் சம்பந்தமான தரமான சஞ்சிகையை வெளிக் கொணர்வதில் சிரமம் ஏற்படுகிறது' என்ற கருத்தைப் பார்த்தபோது எனக்கு ஆச்சரியமாக இருந்தது.

இணையத்தில் படிக்கும்போது பெண்ணியம் பற்றிப் பேசும் எழுத்துக்கள் பரவலாக இடம்பெறுவதைக் காண்கிறோம். புத்திரிகைகளிலும் சஞ்சிகைகளிலும் கூட நிறையவே இடம் பெறுகின்றன.

ஆனால் நிவேதினி ஆசிரியை கூறுவது வேறு விடயம்.

"நிவேதினிக்கு ஆய்வு நிலைக் கட்டுரைகள் வருவது குறைந்து கொண்டே வருகிறது. இரண்டு மூன்று கட்டுரைகளுடன் ஒரு தரமான சஞ்சிகையை கொண்டு வர முடியாது" என்பது அவரது ஆதங்கம்.

உண்மைதான் பெண்ணியம் பற்றிய பேச்சுக்களும் கருத்துரையாடல்களும் நிறைந்து வழிந்தாலும் அது சம்பந்தமான ஆழமான ஆய்வு நிலைக் கட்டுரைகள் குறைவுதான்.

நிவேதினி என்பது பெண்கள் கல்வி ஆய்வு நிறுவனத்தால் வெளியிடப்படும் சஞ்சிகையாகும் பால்நிலைக் கற்கை நெறிச் சஞ்சிகை எனச் சொல்லப்படுகிறது. 2009-2010ம் ஆண்டுக்கான இதழ் அண்மையில் கிடைத்தது. இது இச் சஞ்சிகையின் 13வது இதழாகும்.

கட்டுரைகள் கிடைக்காத நிலையில் அவர்கள் கைக்கொண்ட வழி என்ன? பால்நிலைக் கருப்பொருளை உள்ளடக்கிய கட்டுரைகளை அவர்கள் சேமித்து வைப்பது வழக்கம். உதிரியாகக் கிடந்த நல்ல கட்டுரைகளை ஒன்றாகத் திரட்டி ஆவணப்படுத்தும் தொகுதியாக இம்முறை நிவேதினி இதழ் வெளிவந்துள்ளது.

உண்மைதான் அருமையான பல கட்டுரைகள் இத்தொகுப்பில் இடம் பெறுகின்றன. கட்டுரைகளின் தலைப்பும் ஆசிரியர் விபரமும் வருமாறு

1.    இரண்டு பெண்கவிதைகளின் விழித்துயரம்- தீபச்செல்வன்
2.    பல குரல்கள் ஒரு பதிவு- அம்பை
3.    சுகந்தி சுப்பிரமணியன் பெண்மையின் வழித்தடம் பெண்ணுடலின் ஆரம்பச் சொல்- கடற்கராய்
4.    யாழ் மாவட்டத்தில் பதிவான பால்நிலை அடிப்படையிலான வன்முறைகள் பிரதேச செய்லதிகாரியாக- உதயணி நவரத்தினம்
5.    அம்மனுக்கு மனைவியாகும் சிறுமிகள்- ரவிக்குமார்.
6.    'சமூகத்தில் பெண்கள் உதிர்நோக்கும் பிரச்சினைகள்' நற்பிட்டிமுனை தமிழ்ப் பிரதேசத்தை அடிப்படையாகக் கொண்ட ஒரு சமூகவியல் ஆய்வு- ஜெனிதா மோகன்
7.    இலங்கை தோட்டப் பெண்களும் அயலவர் பெண்கள் குழுக்களும்- லோகாஷினி தங்கையா
8. SansMaison- பிரஞ்சு திரைப்படம் பற்றிய ஒரு விமர்சனக் கண்ணோட்டம்- எம்.கே.முருகானந்தன். ஒரே இனக் காலாசார முரண்களுக்குள் பெண்கள் பிரெஞ்சு சினிமா Sans Maison
9.    நவீன இலக்கியக் கொள்கைகளை தமிழ் சூழலுக்கு ஏற்ப வடிவமைத்து இலக்கியம் படைக்க வேண்டும்- அகில்
10.    சங்கப் பாடல்களில் பெண்ணின் உடல்- தி.சு.நடராசன்

பெண்ணியம், பால்நிலை பாகுபாடு ஆகியவற்றில் ஈடுபாடுள்ளவர்கள் கட்டாயம் படிக்க வேண்டிய இதழ் என்பதில் ஐயமில்லை.

ஆனால் பெண்ணியம், பால்நிலை பாகுபாடு ஆகியவவை பற்றித் தேடி வாசியுங்கள், தீர விவாதியுங்கள். கட்டுரைகளாகப் பதிவு செய்யுங்கள்.

பிரதம ஆசிரியர்
•    செல்வி திருச்சந்திரன்

ஆசிரியர் குழு
•    தேவகௌரி மகாலிங்கசிவம்
•    மகேஸ் வைரமுத்து
•    சிவமணி பரராஜசிங்கம்
ஆகியோர் ஆகும்.

தொடர்புகளுக்கு:-
Women’s Education and research center
58,Dharmarama road
Wellawatta
Cololmbo 0.6
Sri Lanka

புலம்பெயர் இலக்கிய வளர்ச்சிக்கு வடமராட்சியின் பங்களிப்பு

2011-08-25T03:09:00.000-07:00

புகலிட இலக்கியம் என்றால் என்ன? புலம்பெயர் இலக்கியம் என்றால் என்ன? இவற்றிற்கிடையே வேறுபாடு இருக்கும் என்பதை பலர் சிந்திப்பதே இல்லை. அவற்றிடையே மிக முக்கியமான வேறுபாடுகள் உள்ளன.

பேராசிரியர் செ.யோகராசா

"அரசியல் தஞ்சம் கோரிப் புலம் பெயர்ந்து சென்ற ஈழத் தமிழர் படைப்பதே 'புகலிட இலக்கியம்' (Diasporic literature) எனலாம். தொழில் நிமித்தமான ஈழத்தமிழர் புலப்பெயர்வு செய்தோர் எழுதுவது புலம்பெயர் இலக்கியம் (Expatriate literature) இந்த வேறுபாட்டை முதலில் தெளிபடுத்திய பின் "புலம்பெயர் இலக்கிய வளர்ச்சிக்கு வடமராட்சியின் பங்களிப்பு" என்ற தனது நினைவுப் பேருரையின் முக்கிய பகுதிக்குள் நுழைகிறார் செ.யோகராசா.

பருத்தித்துறை வேலாயும்மகாவித்தியாலய ஸ்தாபகரான அமரர் உயர்திரு.வை. வேலாயுதம்பிள்ளை அவர்களின் முன்னோடிப் பணியை கெளரவப்படுத்தப்படும் நிகழ்வான 'நிறுவனர் தின நினைவுப் பேருரை' சென்ற 07.08.2011 ஞாயிறு மாலை கொழும்பு தமிழ் சங்கத்தின் சங்கரப்பிள்ளை மண்டபத்தில் நடைபெற்றது. அந்த உரை சிறு கைநூல்நூலாக அன்று வெளியிடப்பட்டு விநியோகிக்கப்பட்டது.

ஆர்ப்பாட்டமில்லாமல் அரிய பணிகளைச் செய்பவர்கள் தமிழ் இலக்கிய உலகில் குறைவு என்றே சொல்ல வேண்டும். வெற்றுத் தகர டப்பாக்களின் காதை செவிடுபட வைக்கும் ஓசைகளின் மத்தியில் மெளனமாக ஆழமான ஆய்வுப் பணிகளை செய்கிறவர்கள் மிகக் குறைவு என்றே சொல்லலாம்.

இவர்களிடையே வித்தியாசமான ஒருவர்தான் செ.யோகராசா. தப்பு!! பேராசிரியர் செ.யோகராசா என்று சொல்ல வேண்டும். தமிழ்ப் பேராசிரியரான அவர் கிழக்குப் பல்கலைக் கழகத்தின் தமிழ்துறைத் தலைவராகவும் பணிபுரிகிறார்.

200 கட்டுரைகள், 50 ஆய்வுக் கட்டுரைகள், 8 நூல்கள், 6 தொகுப்பு நூல்கள் என இவரது தமிழ் இலக்கியப் பணி பலமானது.

புலம்பெயர் இலக்கிய வளர்ச்சிக்கு வடமராட்சியின் பங்களிப்பு என்ற இந்த நூல் நிறையத் தகவல்களை உள்ளடக்கியுள்ளது. இந்த நூலின் உள்ளடக்கம் அதனைத் தெளிவுபடுத்தும். முன்னணி எழுத்தாளர்களை மட்டுமின்றி இளம் தலைமுறையினர் பலரையும் தேடிக் கண்டுபிடித்துத் தகவல் தந்த அவரது பணி பாராட்டத்தக்கது.

புலம்பெயர் இலக்கியமும் புகலிட இலக்கியமும்
சிறுகதைத் துறையில்
கவிதைத்துறையில்
மொழிபெயர்புத் துறையில்
கட்டுரைத் துறையில்
நாடகத்துறையில்
ஓவியத்துறையில்
ஒலபரப்புத் துறையில்
சஞ்சிகைத் துறையில்
நூல் வெளியீட்டுத்துறையில்
மதிப்பீடு

ஆகிய தலைப்புகளில் அவரது ஆய்வுத் தகவல்கள் கட்டுரையாகப் பரிணமிக்கின்றன.

கரவெட்டியைச் சேர்ந்த இவர் இளமைக் காலத்தில் கருணை யோகன் என்ற புனை பெயரில் கவிதைகளும், சிறுகதைகளும் எழுதியுள்ளார்.

'ஈழத்து நவீன கவிதை புதிய உள்ளடக்கங்கள்- புதிய தரவுகள்- புதிய போக்குகள்' என்ற தனது நூலிற்காக தேசிய சாகித்திய விருது 2007ல் பெற்றுள்ளார்.
'பண்டிதமணி சி.கணபதிப்பிள்ளை - பிரதேச சாகித்திய விருது 2007
ஈழத்து நாவல் வளர்ச்சியும் வளமும்- பிரதேச சாகித்திய விருது 2008

பெற்றுள்ளமை குறிப்பிடத்தக்கது.

இரு ரவீந்திரன்களின் நூல் அறிமுக விழாக்கள்

2011-08-19T03:26:00.000-07:00

இரு ரவீந்திரன்களின் நூல்களின் அறிமுகம் மற்றும் ஆய்வரங்கங்கள் எதிர் வரும் ஞாயிறுகளில் நடைபெற இருக்கின்றன.

வதிரி.சி.ரவீந்திரனின் 'மீண்டு வந்த நாட்கள்'

வதிரி.சி.ரவீந்திரனின் 'மீண்டு வந்த நாட்கள்' கவிதைத் தொகுதியின் அறிமுக விழா எதிர்வரும் 21.08.02011 ஞாயிறு மாலை 4.15 மணிக்கு நடைபெற உள்ளது.

கொழும்பு தமிழ் சங்க சங்கரப்பிள்ளை மண்டபத்தில் நடைபெற இருக்கிறது.

தலைமை:- பேராசிரியர் மா.கருணாநிதி (கொழும்பு பல்கலைக் கழகம் கல்வியியல் துறை)

முதற்பிரதி பெறுநர்:- புரவலர் ஹாசிம் உமர்

தமிழ்தாய் வாழ்த்து

வரவேற்புரை :-
திரு.செ.கணேசன்

நூல் அறிமுகம்:-
திருமதி M.S.தேவகெளரி (சிரேஷ்ட விரிவுரையாளர் ஊடகவியல் கல்லூரி)

வாழ்த்துரைகள் :-

பேராசிரியர் சபா.ஜெயராஜா
திரு டொமினிக் ஜீவா(மல்லிகை)
தி.ஞானசேகரன்(ஞானம்)

கருத்துரை:-

பேராசிரியர் செ.யோகராசா (கிழக்கு பல்கலைக் கழகம் தமிழ்துறை)

நயவுரை:- மத்திய கிழக்கு நாட்டிலிருந்து சிறிஸ்கந்தராஜா

ஏற்புரை:- நூலாசிரியர்

தொகுப்புரை:- மேமன்கவி

0.0.0.0.0.0.0

ந.இரவீந்திரனின் 'முற்போக்கு இலக்கிய எழுச்சி'

ந.இரவீந்திரனின் 'முற்போக்கு இலக்கிய எழுச்சி' நூல் ஆய்வரங்கும் கலந்துரையாடலும் எதிர்வரும் 28.08.02011 ஞாயிறு மாலை 4.30 மணிக்கு நடைபெற உள்ளது.

நான்கு முன்னொடி முற்போக்கு எழுத்தாளர்களான

என்.கே.ரகுநாதன்

கே.டானியல்

டொமினிக் ஜீவா

நீர்வை பொன்னையன்

ஆகியோர் படைப்புகள் பற்றி

இடம்:-

பெண்கள் கல்வி ஆய்வு நிறுவன கேட்போர் கூடம் (WERC)

58,தர்மாரா வீதி

கொழும்பு 0.6

தலைமை:- கலாநிதி.செல்வி திருச்சந்திரன்

ஆய்வாளர்கள்

திக்குவல்லை கமால்- என்.கே.ரகுநாதன்
லெனின் மதிவாணம்- கே.டானியல்
எம்.தேவகெளரி- டொமினிக் ஜீவா
வ.மகேஸ்வரன்- நீர்வை பொன்னையன்

கலந்துரையாடல் நடைபெறும்.

0.0.0.0.0.0.0

'திறனாய்வின் புதிய திசைகள்' மு.பொ வின் நூல் வெளியீடு

2011-08-11T02:53:00.000-07:00

மு.பொ அவர்கள் இலங்கைத் தமிழ் இலக்கிய உலகில் மிக முக்கிய ஆளுமைகளில் ஒருவர். கவிதை, சிறுகதை, நவீனம், விமர்சனம், எனப் பல துறைகளிலும் தனது திறமைகளைக் காட்டியவர். இதழ் ஆசிரியரும் கூட. இரவல் வாங்காத சுயசிந்தனைதான் அவரது பெரு முதல்.

இலங்கையில் தமிழ் இலக்கியத் துறை முற்போக்கு நற்போக்கு பிரிந்து நின்று வரிந்து கட்டி முரண்பட்டு நின்ற போது, இலக்கியச் சிந்தனை மரபில் இற்றைவரை இல்லாத புது வீச்சைப் பாச்சிய மு.தளையசிங்கத்தின் மரபில் வந்தவர் மு.பொ. கருத்து முதல்வாதம் பொருள் முதல் வாதம் என இரு முனைப்பட்ட சிந்தனை நிலவியபோது ஆத்மார்த்தம் சார்ந்த புதிய சிந்தனை ஊற்றை பிரவாகிக்க விட்டவர் மு.த. மெய்யுள் என்ற அவரது எண்ணக்கரு இலங்கையை விட தமிழகத்தில் கூடிய வரவேற்பைப் பெற்றது.

மு.பொ படைப்புகளிலும் விமர்சனங்களிலும் இந்தக் கருத்து உள்ளுறைந்து நிற்பதை தீவிர வாசகர்கள் அறிவர்.

'திறனாய்வின் புதிய திசைகள்' என்பது மு.பொன்னம்பலம் அவர்களின் புதிய நூலாகும். அவர் பல வருடங்களாக எழுதிய விமர்சனக் கட்டுரைகளின் தொகுப்பாக இந் நூல் வெளிவந்துள்ளது.

400 பக்கங்களுக்கு மேல் வரும் இந்த நாலில் உள்ள படைப்புகள் நான்கு பெரும் பிரிவுகளாகப் பிரிக்கப்பட்டுள்ளன.

அறிமுக விமர்சனம்
விமர்சனம்
ஆய்வு நிலை சார்ந்த விமர்சனம்
எதிர்வினை விமர்சனம்

இந்த நூலின் வெளியீட்டு விழா எதிர்வரும் 14.08.2011 ஞாயிறு மாலை நடைபெற உள்ளது.

வெள்ளவத்தை உருத்திரா மாவத்தையில் உள்ள கொழும்பு தமிழ் சங்கத்தின் வினோதன் மண்டபத்தில் நடைபெற இருக்கிறது.

மாலை 4.45 மணிக்கு பேராசிரியர்.சோ.சந்திரசேகரன் தலைமையில் கூட்டம் ஆரம்பமாகும்.

தலைமையுரை, வரவேற்புரையைத் தொடர்ந்து புரவலர் ஹாசிம் உமர் சிறப்புப் பிரதியைப் பெறுவார்.

நூல் பற்றிய உரைகள்

திரு.குணரத்தினம் செந்தீபன்.
வைத்திய கலாநிதி. எம்.கே.முருகானந்தன்
திரு.க.சண்முகலிங்கம் (ஆசிரியர்- பிரவாதம்)

ஏற்புரையை நூலாசிரியர் மு.பொன்னம்பலம் வழங்குவார்

நன்றியுரையுடன் கூட்டம் நிறைவுபெறும்.

நண்பர்கள் வட்டம் ஒழுங்கு செய்துள்ள இக் கூட்டத்தில் கலந்து கொள்ளுமாறு அனைவரையும் அழைக்கிறார்கள்.

இன்றைய தமிழ் இலக்கியத்தின் புதிய சிந்தனைப் பாய்சல்களை அவாவும் நண்பர்களுக்கு இக் கூட்டம் அாருவிருந்தாக அமையும் என நம்புகிறேன்.

0.0.0.0.0.0.0

கூடிக் களிப்பது...

2011-08-05T23:16:00.000-07:00

கூடிக் களிப்பதில்

குழந்தையர்க்கின்பம்

நடன மாடிப் பரவலில்

நர்தனியர்க்கு இன்பம்

பாடிப் பரவசமாதலில்

பாவலர்க்கின்பம்- வெயிலில்

ஆடிக்களிப்பதில்

அணிதுணிகளுக்கு

அளவிலா ஆனந்தம்

கூடவே பசுங்கொடி தழுவலில்

தாண்டமாடும்

ஆனந்தம் பேரானந்தம்.

ஆட்சியிலிருப்பது அரசியலர்க்கின்பம்

எதோட்சிகாரம் செய்தல்

அதிலும் இன்பம்.

எதிரணியர் சிறையடை படல்

கடையணித் தொண்டனுக்கும்

பரவச இன்பமாகும்.

மறுகுழு எழுத்தனைத்தும்

பழிப்பதில் இன்பம்.

கவைக்குதவாது

காலவதியாகிடுமென

இழித்துரைத்தல்

அதனிலும் இன்பம்.

ஒட்டக் கூத்தன் பரம்பரையின்

இன்பம் இனியொறொன்றிலும்

கிட்டவே கிட்டாது.

படைப்புலகில்

மற்றெல்லாம்

துச்சம் துச்சமே!

0.0.0.0.0.0.

எம்.கே.முருகானந்தன்.

மண்ணிலிருந்து பிடுங்கி எறியப்பட்ட பாலஸ்தீனியர் வாழ்வு மிரால்

2011-07-30T03:17:00.000-07:00

மண்ணிலிருந்து பிடுங்கி எறியப்பட்ட பாலஸ்தீனியர் வாழ்வு

மிரால் (Miral) ஆங்கில சினிமா

மண்ணிலிருந்து வேரோடு பிடிங்கி எறியப்பட்ட மரம் தன் பசிய இலைகள் ஊடாக வியர்வை சிந்திக் கருகுவதைப் போல மனித உயிர்கள் அடாவடித்தனமாக பறிக்கப்படுவதைக் கண்டும் மனம் கலங்காத கல் மனம் கொண்டவர்களாக வாழ்ந்து கொண்டிருக்கிறோம்.

உயிரைப் பறிப்பது மட்டுமல்ல தன் மண்ணிலிருந்து தூக்கி எறியப்படுவதும் அத்தகையதே. ஒருவர்; காலாகாலமாக வாழ்ந்த பூமியை மற்றொருவர் அடாவடித்தனமாக பிடித்து அமுக்கித் தமதாக்கி, அதன் பூர்வீக உரிமையாளர்களை அடிக்கி ஒடுக்கி இரண்டாந்தரப் பிரஜைகளாக்குவது அநியாயமான செயல்பாடு என்பதைச் சொல்லித் தெரிய வேண்டும் என்றில்லை. தான் மாத்திரமல்ல தனது பெற்றோர், பேரன் பீட்டிகள் எனப் பரப்பரை பரம்பரையாக வாழ்ந்த மண்ணை இழப்பதன் சோகத்தை வார்த்தை சிறைகளுக்குள் அடக்க முடியாது.

பாலஸ்தீனர்கள் தமது மண்ணிலிருந்து வெளியேற்றப்பட்டார்கள். மிகுதி மண்ணில் அடையாள அட்டை, வேலை செய்வதற்குப் பாஸ், இஸ்ரேலியர்களை எதிர்த்துப் பேசினால் கடும் தண்டனை எனக் கடுமையான அடக்கு முறைகளுக்கு ஆளானார்கள். இந்த நிலையை அவர்கள் எவ்வாறு எதிர் கொண்டார்கள் என்பதை நாம் அறிவோம். பலஸ்தீன விடுதலை இயக்கம் பற்றியும், இனவெறி பிடித்த இஸ்ரேலிய அரசின் வெறித்தனமான செயற்பாடுகளையும், அதற்குத் துணை போகும் மேலைத் தேச அரசுகள் எனப் பலதையும் அறிந்து வைத்திருக்கிறோம்.

ஆயினும் றீமிக்சிங் செய்யும் ஊடக ஒலிகளுக்கு அப்பால், அங்கு வாழும் சாதாரண மக்களின் குரலை இயல்பாகக் கேட்டது அரிது. நான்கு பெண்களின் வாழ்வின் நாதமாக, போரினால் பாதிக்கப்பட்ட அந்த மக்களின் குரல் இத் திரைப்படத்தில் ஒலிக்கிறது. ஆனால் அந்த நான்கு குரல்களும் ஒரே லயமானவை அல்ல. சுரதிபேதம் கொண்டவை. அவர்களது பார்வைகள் ஒரே விதமான பார்வைகள் அல்ல. வௌ;வேறு கோணங்களில் தெறிக்கும் பார்வைகள். ஒரே அடிப்படைப் பிரச்சனையை, வஞ்சிக்கப்பட்ட அந்த ஒரே வாழ்வை நால்வரும் அனுபவித்தாலும் அவர்களது எண்ணம், எதிர்பார்ப்புகள், எல்லாம் பல்வேறு விதங்களாக இருக்கின்றன.

மிரால் என்ற இச் சினிமா அமெரிக்க தயாரிப்பாளரால், அமெரிக்க நெறியாளர் ஊடாக அமெரிக்க சமுதாயத்திற்காக எடுக்கப்பட்டது. இருந்தபோதும் ரூலா ஜெப்ரியல் என்ற பெண்ணினது சுயசரிதை நூலை அடிப்படையாக வைத்து எடுக்கப்பட்டது என்பதால் பலாஸ்தீனக் குரல் அடிநாதமாக ஒலித்தபடியிருப்பதைத் தடுக்க முடியவில்லை எனலாம். ஆங்கிலப்படம். ஆயினும் இடையிடையே அரபி மொழி கலந்திருக்கிறது. முக்கியமாக அவர்களின் கலை, பண்பாட்டு அம்சங்கள் காட்சிப்படுத்தப்படும்போது. இதனால் ஆங்கில உபதலைப்பின்றியும் புரிவதில் சிரமமிருக்கவில்லை.

படத்தின் பிரதான பாத்திரம் மிரால் என்ற இன்றையப் பெண். இவள் வாழ்வே படத்தின் முக்கிய பகுதி. இவளது வாழ்க்கைப் பாதையைச் செதுக்குவதில் ஏதொவொரு வழியில் உதவியவர்கள் ஏனைய மூவருமாகும். பிரதான பாத்திரம் திரையில் வருவதற்கு முன்னர் கிட்டத்தட்ட படத்தின் மூன்றில் ஒரு பகுதி ஓடி முடிந்துவிடுகிறது. பாலஸ்தீனியப் பிரச்சனையை ஓரளவு புரிந்து கொள்ள இது அவசியம்தான். ஆனாலும் கருவின் மையத்துள் நுளைவதற்கு இவ்வளவு நேரம் எடுப்பது சற்றுச் சோர்வு அளிக்கிறது. அத்துடன் ஆரம்பக் காட்சிகளைப் புரிந்து கொள்வதில் சற்று சிக்கல் இருந்தது. வேறு விதமாக எடிட் பண்ணியிருக்க முடியாதா என எண்ணத் தோன்றுகிறது.

முதல் பெண் ஹின்ட் ஹீசெனி. இவள் முதலாமவள். பாலஸ்தீனத்திலிருந்து ஒரு பகுதியைப் பிய்த்தெடுத்து இஸ்ரேல் உருவாக்கப்பட்டபோது அறிமுகமாகிறாள். இஸ்ரேல் உருவானபோது ஏற்பட்ட போரில் அனாதைகளான, வாழ வழியில்லாத மக்களின் பெண் குழந்தைகளைக் காப்பாற்றி, வளர்த்து, கல்வியூட்டி நல்ல பிரஜைகளாக்குவதற்காக தனது சொந்த வீட்டையே பள்ளியாக்குகிறாள். அது Tifl Al-Arabi Institute என்ற பெயரோடு அரசியல் சாயல் படியாத மனிதாபிமான கல்வி நிறுவனமாகத் தொண்டாற்றுகிறது.

இரண்டாமவள் நடியா. இவள்தான் மிராலின் தாய் ஆகும். பாலியல் ரீதியாக வஞ்சிக்கப்பட்டவள். ஒரு இஸ்ரேலியப் பெண்ணை பஸ்சில் வைத்து அடித்தற்காகச் சிறை செல்கிறாள். அங்கு மூன்றாமவளான பற்றிமாவைச் சந்திக்க்pறாள். பற்றிமா இஸ்ரேலியரின் அடாவடித்தனமான நடவடிக்கைளில் கோபமும், இன உணர்வும் தாய் நாட்டில் பற்றும், கொண்ட பெண். தீவிரவாதி எனலாம். இஸ்ரேலியர்கள் சினிமா பார்க்கும் அரங்கில் வெடி குண்டு வைத்ததால் அகப்பட்டுச் சிறை செல்கிறாள். சிறையில் இருவரும் அறிமுகமாகிறார்கள்.

நான்கு பெண்களின் கதையாக இருந்தபோதும் ஹின்ட் ஹீசெனி, அவளது பள்ளிக்கூடம், அவளது நம்பிக்கைகள் என்ற அத்திவாரத்தில் எழுப்பப்பட்ட மாளிகையாக சினிமா அமைகிறது. மாளிகையாக இருப்பது முக்கிய கதாபாத்திரமான மிராலின் வாழ்க்கை.

ஆக்கிரமிப்பு இஸ்ரேலிய இராணுவத்தினரின் மூர்க்கத்தனமும், எதேச்சிகார நடவடிக்கைகளும், அடாவடித்தனங்களும் கோபப்பட வைக்கின்றன. தமது வீட்டில் வாழ்ந்தவர்களை ஒரு சிலநிமிட அறிவித்தலுடன் வெளியேற்றி வீதியில் கலைத்துவிட்டு அவர்களது வீட்டை பாரிய இயந்திரங்களால் நிர்மூலமாக்கும் காட்சி மனதைக் குடைகிறது. மனதில் இயலாமையும் கோபமும் கொப்பளிக்க எதுவும் செய்ய முடியாது ஏக்கத்திடன் பார்த்திருக்கும் காட்சி மனதைத் தொடுகிறது. வீதியில் நின்று கல்லெறிந்து தமது எதிர்ப்பைக் காட்டும் சாமானியர்கள் துப்பாக்கி குண்டுகளால் தண்டிக்கப்படுகின்றனர்.

மற்றொரு காட்சியில் பற்றிமாவுக்கு ஆயுற்காலச் சிறைத் தண்டனை வழங்கப்படுகிறது. குண்டு வைத்ததற்காக இரண்டு, இஸ்ரேலிய நீதிபதிக்கு முன் எழுந்து நின்று மரியாதை செய்யாததற்காக மூன்றாவது. சட்டமும், நீதியும் கூட எதேச்சிகார ஆட்சிகளுக்கு முண்டுக் கொடுப்பதற்காக பாகுபாடு காட்டுகின்றன. ஈவிரக்கமின்றியும் தான்தோன்றித்தனமாகவும் நடந்து கொள்கின்றன. இவை வெறுக்க வைத்தாலும், நாம் அறியாதது அல்ல.

மிராலின் அன்புக்குரியவன் பாதையால் செல்லும்போது சடுதியாக பாதுகாப்புச் சாவடியுள் இழுத்து ஓசையின்றி கொன்று முடிக்கிறார்கள். அவன் குற்றவாளியாக இருக்கலாம். இல்லாமலும் இருந்திருக்கலாம். ஆனால் கைது செய்தல், விசாரணை, நீதிமன்றம், வழக்கு என எதுவும் இல்லாது மறைவாகக் கொன்று தடயமின்றி அழிக்கப்படுகிறான். பல வருடங்களின் பின் புதைகுழியிலிருந்து மீட்கப்படக் கூடிய இனங்காணப்படாத உடலின் எச்சங்களில் இவனதும் அடங்கியிருக்கலாம்.

இனவாத அரசுகள் இவ்வாறுதான் தமது இராணுவங்களுக்கு புனிதக் கடமையெனப் பெயர் சூட்டி அளப்பற்ற அதிகாரங்களை வழங்குகின்றன. தட்டிக்கேட்க யாருமில்லை.

ஆனால் அதே நேரம் விடுதலை இயக்கங்கள் இனவிடுதலை என்ற பெயரில் தமது மக்கள் மனங்களை மூளைச்சலவை செய்கின்றன. பொது இடங்களில் குண்டு வைத்து அப்பாவி மக்களைக் கொல்லுதல் ஆட்கடத்தல் என பயங்கரச் செயல்களில் ஈடுபடுகின்றன. தாம் செய்யும் ஜனநாயக விரோத, தனிமனித சுதந்திரத்தை ஒடுக்கும் நடவடிக்கைகள் சரியானவை என நம்ப வைக்கும் செயற்பாடுகளில் முனைகின்றன.

முரணான இந்த இரு பக்கங்களையும் இத் திரைப்படம் காட்சிப்படுத்த முனைகின்றது. அதனால் இஸ்ரேல் சார்பான அமெரிக்க மற்றும் மேற்குலக மக்கள் இது பலஸ்தீனக் குரலாக மட்டுமே ஒலிக்கிறது. பக்க சார்பானது எனக் கடுமையாக விமர்சிக்கின்றனர். ஆனால் பாலஸ்தீன பக்கம் சார்பானவர்கள் இது தமது போராட்டத்தை கொச்சைப்படுத்துகிறது என கோபப்படுகின்றனர்.

அன்பு, அமைதி, விட்டு;கொடுத்தல், கல்வியால் சமுதாயத்தை முன்னேற்றலாம் என்ற நம்பிக்கைளின் சின்னமாக ஹின்ட் ஹீசெனி இருக்கிறாள். நடியா பாதிக்கப்பட்ட அபலையாக இருக்கிறாள். பற்றீமா விட்டுக் கொடுக்காத முரட்டுப் போராட்டத்தை நாடுகிறாள். இவர்களுக்கிடையே வந்த புதிய பரம்பரையின் சின்னமான மிரால் வருகிறாள். அவள் தேர்ந்தெடுக்கும் பாதை என்ன? அதைத்தான் இப்படம் பேசுகிறது.

பாலஸ்தீனியப் போராளியான ஹனி, மிராலின் மனத்தில் இடம் பிடிக்கிறான். ஹனி மீதான ஈர்ப்பும், பாலஸ்தீனியப் விடுதலை இயக்கம் மீதான பற்று ஒரு புறமும் கல்வி, சச்சரவற்ற எதிர்காலம், தகப்பன் மேலோன அன்பு ஆகியவை மறுபுறமும் அலைக்கழிக்கின்றன. போதாக்குறைக்கு சந்தேகத்தின் மேல் கைது செய்யப்பட்டு கடுமையான விசாரணைக்கு ஆட்படுகிறாள். மிருதுவான அவளது முதுகுப்புறம் புண்படுமாறு அடிவாங்குகிறாள்.

ஒருவாறு விடுபட்டு வெளிவந்தபோது அவளது அன்புக்குரியவனே அவள் மீது சந்தேகப்படகிறான். காட்டிக் கொடுத்தவள் எனக் குற்றம் சாட்டுகிறான். குற்றம் செய்யாத அவள் மனம் துய்ந்து போகிறது. விடுதலை இயக்கம் மீதான முரட்டுப் பற்றுதலால் தமது அன்புக்குரியவர்களையே சந்தேகிக்கும், கொலையும் செய்யத் துணிந்த மனிதர்களைக் கண்ட எமக்கு இது ஆச்சரியமானதல்ல, ஆயினும் மனம் நோகிறது.

மிராலின் தகப்பனாக வரும் ஜமால் அற்புதமான பாத்திரம். Siddig கின் மிகையில்லாத நடிப்பில் சாதாரண அப்பனின் மனநிலையை உணரமுடிகிறது. தீவிரவாத இயக்கங்களிலிருந்து தனது மகளை காப்பாற்றி நல்ல நிலையில் வாழ வைக்க வேண்டும் என்ற தந்தையின் பாத்திரத்தை அழகாகச் செய்கிறார். மனத்தில் நிலைக்கிறார்.

படத்தை நெறியாழ்கை செய்திருப்பவர் Julian Schnabel ஆகும். ஏற்கனவே Before Night Falls, The Diving Bell and the Butterfly போன்ற சினிமாக்கள் மூலமாகக் கவனிப்பைப் பெற்றவராவார்.

Slumdog Millonaire Gfo; Fredia Pinto புகழ் ; Fredia Pinto பிரதான பாத்திரத்தில் நடித்திருக்கிறார். நன்றாக நடித்திருக்கிறார். ஆயினும் அவரது உருவம் அரபுப் பெண்கள் போலாக இல்லை என்பதையும் குறிப்பிட்டே ஆகவேண்டும். கமெரா Eric Gautier பல காட்சிகள் மனதை அப்பிக் கொள்கின்றன.

இலங்கையில் திரையிடப்படவில்லை. படம் டிவீடியில் கிடைக்கிறது. முடிந்தால் பாருங்கள். எமது வாழ்வுடனான ஒற்றுமை வேற்றுமைகளை அசைபோட்டுப் பார்க்கலாம்.

ஞானம் சஞ்சிகையிலும், பதிவுகள் ( http://www.geotamil.com/pathivukalnew/) இணைய இதழிலும் வெளியான எனது கட்டுரை

எம்.கே.முருகானந்தன்

0.0.0.0.0.0.0

புலம் பெயர் அரசியலில் இலங்கைத் தமிழர் தேசியம்

2011-07-20T01:54:00.000-07:00

இலங்கைத் தமிழர்களின் அரசியலில் புலம் பெயர்ந்த தமிழர்களின் பங்களிப்பு தவிர்க்க முடியாததாகிவிட்டது. காலத்திற்கு காலம் இதன் தாக்கம், வேகம் ஆகியன மாறுபட்டு வந்தாலும் அதன் முக்கியத்துவத்தை மறந்து விட முடியாது.

"இங்கு வாழும் மக்களின் இன்றைய நிலை புரியாமல் எமது நிகழ் வாழ்வில், எமது அரசியலில், எதிர்காலத்தில் தேவையில்லாமல் தலையிடுவதற்கு இவர்கள் யார் ?" என இவர்களது பங்களிப்பை ஏற்றுக் கொள்ளாதவர்கள் எம்மிடையே இருக்கிறார்கள்.

அதே நேரத்தில் "இலங்கைத் தமிழ் அரசியலில் வெற்றிடமும், கையாலாகாத்தனமும் நிலவுகின்ற இன்றைய நிலையில் இவர்கள்தான் எம்மைக் காப்பாற்றப் போகிறவர்கள்" என நம்புகிறவர்களும் இருக்கவே செய்கிறார்கள்.

இத்தகைய சூழலில் புலம் பெயர்ந்த தமிழர்களின் உண்மையான நிலைப்பாடு என்ன? பத்திரிகைகளிலும் இணையத்திலும் எழுதப்படுபவை எந்தளவிற்கு உண்மை நிலையைப் பிரதிபலிக்கின்றன என்ற கேள்வியும் எழுகின்றன. அங்கு வாழும் சாதாரண மக்களின் கருத்து என்ன?

இந்த நிலையில் இது பற்றிய ஒரு கருத்துரைக்காக புலம் பெயர்ந்து வாழ்கின்ற தமிழர் ஒருவரை அழைக்க இலங்கை முற்போக்கு கலை இலக்கிய மன்றம் முன் வந்துள்ளது.

திரு.சிவா.சுப்பிரமணியம் தலைமையில் ஒரு கருத்தரங்கு ஒழுங்கு செய்யப்பட்டுள்ளது.

முன்பு தினகரன் பத்திரிகையில்பணியாற்றியவரும் தற்பொழுது புலம் பெயர்ந்து கனடா நாட்டில் வசிப்பவருமான திரு.எஸ்.மனோரஞ்சன் "புலம் பெயர் அரசியலில் இலங்கைத் தமிழர் தேசியம்" என்ற தலைப்பில் உரையாற்ற இருக்கிறார்.

எதிர்வரும் ஞாயிறு (24.07.2011) மாலை 4.30 மணிக்கு நடைபெறும்

இடம்:- பெண்கள் கல்வி ஆய்வு நிறுவன கேட்போர் கூடம்
58,தர்மாராம வீதி
கொழும்பு 06.

கலந்துரையாடலும் இடம்பெறும்.
ஆர்வமுள்ள அனைவரையும் கலந்து கொள்ள அழைப்பதாக இலங்கை முற்போக்கு கலை இலக்கிய மன்ற அழைப்பிதழில் குறிப்பிடப்பட்டுள்ளது.

தினசரிப் பத்திரிகைகள் - தேவைகள், எதிர்பார்ப்புகள், சவால்கள்.

2011-07-01T02:50:00.000-07:00

எனது உறவினர் ஒருவர் இருந்தார் வயதானவர். நான் பள்ளிச் சிறுவனாக திரிந்தபோது அவருக்கு எழுபது வயதிருக்கும். அவர் கழிப்பறை சென்றால் வெளியே வர குறைந்தது ஒரு மணிநேரமாகும். அவ்வளவு நேரம் அதற்குள் என்ன செய்கிறார் சில குறும்புப் பையன்கள் ஆராச்சி செய்ய முனைவார்கள். ஆனால் அதன் இரகசியம் உள்வீட்டுப் பையனான எனக்குத் தெரிந்திருந்தது. முதல் நாள் வெளிவந்த ஆங்கிலத் தினசரியுடன் உள்ளே சென்றால், அதில் கரை கண்டு முடியவும் அவரது கழிப்புக் கடன் தீரவும் சரியாக இருக்கும். அதன் பின்தான் மிகுதி வேலை எல்லாம்.

அவரைப் போலவே பலருக்கும் தினசரிகள் இல்லாமல் காலை விடிவதில்லை.

மற்றொரு வயதானவரையும் எனக்குத் தெரியும். பத்திரிகையின் முற் பக்கத்தில் அச்சிடப்பட்டுள்ள வெளியூர்ப் பதிப்பு என்ற வசனத்தில் படிக்க ஆரம்பித்தால், எந்த நிறுவனத்தில் அச்சிடப்பட்டு வெளியிடப்பட்டது என்ற கடைசி வரி படித்து முடியும் வரை சார்மனைக் கதிரையிலிருந்து எழுந்திருக்கவே மாட்டார்.

இவை அந்த நாள்கதைகள். இப்பொழுது காலையில் ரீவி ஒலிபரப்பில், பத்திரிகை நியூஸ் வாசிப்பதை அவ்வப்போது அரைக் காது கொடுத்துக் கேட்பது மாத்திரமே பலருக்கு பத்திரிகை படிப்பதாகிட்டது.

சில தகவல்கள்

இத் தருணத்தில் பத்திரிகை என்ற ஊடகத்தின்; தோற்றம் பற்றியும் சில தகவல்களை நினைத்துப் பார்ப்பது சுவார்ஸமாக இருக்கும்.
2009 ஆண்டு செய்யப்பட்ட ஒரு ஆய்வின் பிரகாரம் உலகளாவிய ரீதியில் 12,297 பத்திரிகைகள் பிரசுரமாகின்றன என World press trends அறிக்கைகள் கூறுகின்றன.

இதில் மிக அதிகமான எண்ணிக்கையில் பிரசுரமாகும் பத்திரிகை ஜப்பானிலிருந்து வெளிவரும் Yomiuri Shimbun என்பதாகும். தினமும் 10,020,000 பிரதிகள் அச்சிடப்படுகின்றன என அறியும்போது ஆச்சரியம் மேவுகிறது.

உலகில் முதன் முதலில் ஆரம்பிக்கப்பட்ட பத்திரிகை எது என்பதில் பல சந்தேகங்கள் உள்ளன. பத்திரிகைகளின் முன்னோடியான வடிவங்கள் ஜேர்மனியில் தொடங்கியதாகத் தெரிகிறது. கையால் எழுதப்பட்ட அந்தப் பிரதிகளாவன அங்குள்ள வர்த்தகர்களிடையே பரவியிருந்தன. நாட்டு நடப்பு, போர் செய்திகள், பொருளாதார வர்த்தகச் செய்திகள் எனப் பல அவ்வாறு அவர்களிடையே பகிரப்பட்டன. இது கிட்டத்தட்ட 700 ஆண்டுகளுக்கு முன்பே ஆரம்பித்தது.

அச்சில் முதலில் வெளிவந்ததும் ஜேர்மனியில்தான். கைப்பிரசுங்கள் வடிவில் வந்த அவை பெரிதும் பரப்பான விடயங்களைப் பேசின. இவை 1400களின் பிற்பகுதியில் தோற்றம் பெற்றன.

லண்டன் கஸட் என்ற பத்திரிகையே ஆங்கிலத்தில் முதல் முதலாக வந்த செய்திப் பத்திரிகையாகும். இத 16666ம் ஆண்டு வெளியான போதும் அதற்கு முன்னரே இதற்கு முன்னோடியான 1662 The Weekly Newes ல் வெளிவர ஆரம்பித்துவிட்டது.

பணிகள்

செய்திப் பத்திரிகைகள் என்றால் என்ன என்பது பற்றி எங்கள் எல்லோருக்கும் தெரியும். உள்நாட்டு வெளிநாட்டுச் செய்திகள், உபயோகமான தகவல்கள் இவற்றோடு பத்திரிகைகளை வாசகர் வாங்கும் அளவில் குறைந்த விலையில் விற்பதற்கு உதவியாக விளம்பரங்களும் நிறைய இடம் பெறும். நூல்களைப் போல உயர்தரக் கடதாசியாக அல்லாமல் சாதாரண நியூஸ் பிரிண்ட் பேப்பரில் வெளியாவதும் விலை உயராமல் தடுப்பதற்கே ஆகும்.

இப்பொழுது பத்திரிகைகளின் எல்லைகள் அகன்றுவிட்டன. தனியே செய்திகள் என்றில்லாமல் இலக்கிய ரீதியாக கதை, கட்டுரை, கவிதைகள், விஞ்ஞானத் தகவல்கள், பொழுதுபோக்கு அம்சங்கள் என் பலவற்றையும் சேர்க்க வேண்டிய கட்டாயம் ஒரு காலகட்டத்தில் இணைந்தது. இப்பொழுது அவற்றுக்காக தனி இணைப்புகளை சஞ்சிகைகள் வடிவில் வழங்க வேண்டியும் இருக்கிறது.

தினசரிப் பத்திரிகைகள் எதிர்நோக்கும் போட்டிகளும் இத்தகைய மாற்றங்களுக்குக் காரணமாகின்றன. போட்டி என்பது பத்திரிகைகளுக்கு இடையே என்ற நிலையையும் தாண்டி, வானொலி, தொலைக்காட்சி, இணையம் என புதிய சவால்களையும் எதிர்கொள்ள நேர்ந்திருக்கிறது. ஆனால் இவற்றால் வாசகர்கள் மேலதிக பயன்பெறுகிறார்கள் என்பதை மறுக்க முடியாது.

தினக்குரல்

தினக்குரலும் இத்தகைய போட்டிகளுக்கு ஈடுகொடுத்து தனது தனித்தன்மையைத் தொடர்ந்து தக்கவைத்திருக்கிறது.

இலங்கைத் தமிழ் மக்களிடையே மிகவும் பிரபலமான பத்திரிகையாக தினக்குரல் இன்று இருக்கிறது. தமிழ் மக்களின் வாழ்வு மிகவும் நெருக்கடியான நிலையிலிருந்த ஒரு இருண்ட காலகட்டத்தில் இது ஆரம்பிக்கப்பட்டது. தமிழ் மக்களின் அவலங்களை வெளிப்படுத்தவும், அவர்களது குரலைத் தேசிய அளவில் ஒலிக்கச் செய்யவும், தமிழ்தேசிய உணர்வுக்கு ஆதரவாகவும் ஆரம்பிக்கப்பட்டதால் மிகுந்த இக்கட்டான நிலைகளைச் சமாளிக்க வேண்டியிருந்தது. ஆனாலும் அந்தச் சவால்களைத் தாண்டி கட்டிளம் பருவமான 15 வருட காலத்தை வெற்றிகரமாக எட்டிப்பிடித்து இருக்கிறது.

எனது விருப்புகள்

தினக்குரலை எடுத்ததும் முற்பக்கச் செய்திகளை மேய்ந்துவிட்டு நான் தாவிப் பாய்வது அதன் நடுப்பக்கத்திற்கே ஆகும். முக்கியமாக கவனத்தை ஈர்ப்பது அங்கு நாலாம் பக்கத்தில் இடம்பெறும் ஆசிரியர் தலையங்கம் ஆகும். கவனத்தில் எடுக்க வேண்டிய விடயங்கள் அதில் அலசப்படுவது வழக்கம். மிகவும் சிறப்பாகவும், பரந்த பார்வையுடன், நல்ல தமிழில் அமைந்திருப்பது அதன் சிறப்பாகும்.

நல்ல பல புதிய தமிழ்ச் சொற்களை அங்கு ஆசிரியர் பயன்படுத்துவது வழக்கம். தமிழ் எழுத்துத்துறையில் இருப்பவர்களுக்கு பயனுடையாக இருக்கிறது. அவற்றில் தேர்ந்தெடுக்கப்பட்ட பல தலையங்கங்கள் ‘ஊருக்கு நல்லதைச் சொல்வேன்’ என்ற தலைப்பில் நூலாக வெளிவந்ததும் அறிஞர்களின் பாராட்டுக்களைப் பெற்றதும் அறிந்ததே.

5ம் 6ம் பக்கங்களில் வெளியாகும் சிறப்பான கட்டுரைகள் என்னைக் கவரும் மற்றொரு அம்சமாகும். உள்நாட்டு அரசியல், உலக அரசியல், பொருளாதாரம், விஞ்ஞான முன்னேற்றம் போன்ற பல்வேறு விடயங்களில் தேர்ந்தெடுத்த கட்டுரைகள் அங்கிருக்கும். அவற்றிடையே முற்போக்குச் சிந்தனையுள்ள கட்டுரைகளும் இடம்பெறுவது ஏனைய பத்திரிகைகளில் காண முடியாத விடயமாகும். மறைந்த எழுத்தாளர் டேவிட் ராஜ் அவர்களது இதழ்க் கீற்றான ‘ஒளிவு மறைவின்றி….’ கருத்துச் சித்திரம் ஆகியவற்றை ரசிக்காதவர்கள் எவரும் இருக்க முடியாது.

ஞாயிறு தினக்குரலில் வெளியாகும் நேர்காணல்கள், நூல் விமர்சனம், என்னைக் கவரும் பல சிறந்த சிறுகதைகளையும் அது தொடர்ந்து தருகிறது. பெண்ணியம், உளவியல் சார்ந்த கட்டுரைகளும் அதில் சிறப்பானவையாகும்.

தமிழ்ப் பத்திரிகைகள்

தமிழ்ப் பத்திரிகைகள் பலவும் விடயத்திற்கு அளிக்கும் முக்கியத்துவத்தை வெளியிடும் முறைக்கு அளிப்பதில்லை. பக்க வடிவமைப்பில் நிறைய முன்னேற்றங்களுக்கு இடம் உண்டு. விடயங்கள் எவ்வளவு சிறப்பாக இருந்தாலும் கண்களுக்கு இதமாக, வாசிப்புக்கு கவர்ச்சியான தோற்றத்தில் இருந்தால்தான் உள்ளடக்கம் வாசகனைச் சென்றடையும். பத்திரிகைத்தாளின் தரத்திற்கும் வாசக நுகர்ச்சியைத் தூண்டுவதற்கும் நிறையத் தொடர்பு உண்டென்பதையும் மறக்கக் கூடாது.

முற்பக்கத் தலைப்புச் செய்தி வாசகனைக் கவருமாறு எல்லாப் பத்திரிகைகளும் தலைப்புக் கொடுக்கின்றன. இது போலவே ஏனையவற்றிக்கும் கவனம் அளிப்பது அவசியமாகும். கவர்ச்சியும் கொச்சைத்தனமான இரண்டாம் தரத் தலைப்புகள் பொதுவாக இலங்கைத் தமிழ்ப் பத்திரிகைகளில் இல்லையென்றே சொல்லலாம். ஆயினும் வாசிக்கத் தூண்டும் ஆவலை விதைக்காவிட்டால் அவை வாசகனைச் சென்றடையப்போவதில்லை.

இப்பொழுது பத்திரிகைகள் அதிகரித்துவிட்ட அளவிற்கு தேவையான விடயதானங்கள் கிடைப்பதில்லை போலிருக்கிறது. இதனால் பல பத்திரிகைகளும் இணையத்தில் இருந்தும் விடயங்களைப் பகிர்ந்து கொள்கின்றன. பல கட்டுரைகளும் தகவல்களும் எங்கிருந்து பெறப்பட்டன, யாரால் எழுதப்பட்டன என்ற தகவல்கள் இல்லாமல் அனாதைப் பிள்ளைகள் போல சிதறி வெளியாகின்றன. இதனால் அவற்றின் நம்பகத்தன்மை கெடுகிறது. பகுத்தறிந்து வாசிக்கத் தெரியாத வாசகனை மாயையில் சிக்க வைப்பதுமுண்டு.

உதாரணத்திற்கு நலவியல் தொடர்பான கட்டுரைகள் செய்திகளைச் சொல்லலாம். என்னிடம் வரும் நீரிழிவு நோயாளர்களில் சிலர் சீனியின் அளவு அதிகரித்த நிலையில் வந்தபோது அவர்களது உணவு முறையயைத் தீர விசாரிக்க நேர்ந்தது. பலர் பேரீச்சம் பழம் அதிகம் சாப்பிடுவதாகக் கூறியதுண்டு. “நீரிழிவுக்கு நல்லது” எனப் பத்திரிகைளில் படித்ததாகச் சொல்லுவார்கள். பத்திரிகைச் செய்தி என்பது உண்மையா பொய்யா என்பது தெரியாது.

அது கலோரிச் செறிவுள்ள பழம் என்பதால் மிகக் குறைவாகவே நீரிழிவு நோயாளர்கள் சாப்பிட வேண்டும். தகமையற்றவர்கள் எழுதியதைப் பகிர்ந்து கொள்வதால் வரும் வினை இது. யாரால் எழுதப்பட்டது, அவர் மருத்துவராயின் அவர் எத்துறை சார்ந்தவர், நவீன மருத்துவத்துறை சார்ந்தவரா சுதேசிய மருத்துவ துறை சார்ந்தவரா, அவரது கல்வித்தகமை என்ன அல்லது அது கை வைத்தியமா, என்பது போன்ற விடயங்களை தெளிவாகத் தெரிவிக்க வேண்டும். வாசகன் தனக்கேற்றதைத் தெரிவு செய்து படிக்க உதவும்.

மருத்துவக் கட்டுரைகள் இணையத்தில் இருந்து பெறப்பட்டதாயின் அது எந்தத் தளத்திலிருந்து பெறப்பட்டது. அது நம்பிக்கையான தளம்தானா? அது தகுதியானர்களால் எழுதப்பட்டதா என்பது தெளிவு படுத்தப்பட வேண்டும். ஏனெனில் இணையம் கட்டுப்பாடுகள் அற்றது. யார் வேண்டுமானாலும் எதைப்பற்றியும் எழுதலாம்.

நலவியல் கட்டுரைகள் மாத்திரமின்றி எத்துறை சார்ந்த தகவல்களுக்கும் இது பொருந்தும்.

எதிர்காலம்

பத்திரிகைகளுக்கு சவால்கள் பல காத்திருக்கின்றன. வாசகர் எதிர்பார்ப்புகளை நிறைவேற்ற வேண்டிய அவசியமிருக்கிறது. நடுநிலைமையுடன் செயற்பட வேண்டிய தார்மீகக் கடப்பாடு உண்டு. ஆனால் சுதந்திரமான செயற்பாடுகளுக்கு மறைவான தடைகளும், உயிராபத்து அடங்கலான அச்சுறுத்தல்களும் முன் நிற்கின்றன. தினக்குரலுக்கு இது புதிய சவால் அல்ல. பொறுப்புகளை நிறைவேற்ற திறமையும், சாதுர்யமாக செயற்படும் வழிமுறையும் தெரிந்திருக்கிறது.

எனவே வளமான எதிர்காலம் தினக்குரலுக்கும் அதன் வாசகர்களுக்கும் காத்திருக்கிறது என்பது நிச்சயம்.

தினக்குரல் 15 அகவை விசேட மலரில் என்னால் எழுதப்பட்ட கட்டுரை.

எம்.கே.முருகானந்தன்

0.0.0.0.0.0.0

சிறந்த வலைப் பதிவாளருக்கான விருது

2011-06-10T03:24:00.000-07:00

கொழும்பு பல்கலைக் கழக தமிழ் சங்கத்தினர் சிறந்த தமிழ் வலைப் பதிவாளருக்கான விருதை இவ்வருடம் எனக்குக் கொடுத்து கௌரவப்படுத்தியுள்ளார்கள்.

மேற்படி சங்கத்தினரின் முத்தமிழ் விழாவானது 'தேமதுரத் தமிழோசை உலகமெலாம் பரவும் வகை செய்தல் வேண்டும்' என்ற பாரதியின் குரலைத் தொனிப் பொருளாக கொண்டு நடந்தேறியது.

சென்ற ஆண்டு வெற்றி எவ்எம் பணிப்பாளர் லோஷன் அவர்களுக்கு இவ் விருது கிடைத்தது குறிப்பிடத்தக்கது.

கடந்த 5 வருடங்களாக வலைப் பதிவு உலகில் நான் இயங்கிக் கொண்டிருக்கின்றேன்.

மருத்துவத்திற்காக ஹாய் நலமா?

இலக்கியம் சினிமா கலையுலகம் ஆகியவற்றிற்கான மறந்து போகாத சில
மருத்துவத்துறை சார்ந்த அனுபவங்களை பகிர்ந்துகொள்ள Steth இன் குரல்
என எனது பதிவுலகம் விரிந்துள்ளது. இவற்றைக் கருத்தில் கொண்டு போலும் இந்த விருதை அளித்துள்ளார்கள்.

பதிவுலகில் தடம்பதிக்க கைகொடுத்து ஆதரவு தந்த பதிவுலக நண்பர்கள் அனைவரும் இவ் விருதின் பங்காளிகளே. அன்பு நெஞ்சங்கள் அனைவருக்கும் உள்ளம் நிறைந்த நன்றிகள்.

சென்ற ஞாயிறு 5ம் திகதி மாலை கொழும்பு இராமகிருஷ்ண மண்டபத்தில் நடைபெற்ற முத்தமிழ் விழாவின் போது கொழும்பு பல்கலைக் கழக தமிழ் சங்க பெரும்பொருளாளர் திருமதி சாந்தி செகராஜசிங்கம் (சிரேஸ்ட விரிவுரையாளர் சட்டபீடம்) அவர்களால், சங்கத் தலைவர் தியாகராஜா சுகந்தன் முன்னிலையில் இவ் விருது வழங்கப்பட்டது.

சுமார் 35 வருடங்களுக்கு முன்னர் கொழும்பு மருத்துவ பீட மாணவனாக இருந்தபோது (1970-75) நானும் இச் சங்க அங்கத்தவராக இருந்த இனிய நாட்கள் மனதில் நிழலாடுகிறது. அதன் பல செயற்பாடுகளிலும் முன் நிற்கக் கூடியதாக இருந்தது.

இதே மேடையில் அப்பொழுது 1974ம் ஆண்டு மார்ச் மாதம் 16ம் 17ம் திகதிகள் என இரு நாட்களாக இளம் தென்றல் கலைவிழா நடபெற்றது. அவ் விழாவில் 'நெடும் பயணம் நிறையும் வரையில் நெஞ்சேயுனக்கு ஓய்வில்லை' தலைப்பிலான கவிதை அரங்கிற்கு தலைமை தாங்கும் வாய்ப்புக் கிடைத்தது. இந்த கவிதை அரங்கில் முற்போக்கு கலை இலக்கியப் பேரவைச் சார்ந்த திரு.சோ.தேவராஜா சட்டத்துறை மாணவனாக இருந்த அந் நேரத்தில் கவிதை படித்ததும் சந்தோசமான நிகழ்வாகும்.

அன்று மேடையேறிய மருத்துவபீட மாணவர்களின் 'தழும்பிய நெஞ்சம்' என்ற நாடகத்தில் வேலுவாக நடித்துப் பாராட்டுப் பெறக் கூடியதாக இருந்தது.

இத்தகைய நினைவலைகளை மீண்டுக்கொண்டு, கொழும்பு பல்கலைக் கழக தமிழ் சங்கத் தமிழ் விழாவில் இப்பொழுது மேடையேறக் கிடைத்தமை மகிழ்ச்சியளிக்கிறது.

கொழும்பு பல்கலைக் கழக தமி்ழ் சங்கத்தினருக்கு எனது நன்றிகளைத் தெரிவித்துக் கொள்கிறேன்.

அவர்களின் தமிழ்ப் பணி தொடர்ந்து சிறப்பாக நடைபெற எனது வாழ்த்துக்கள்.

பனங்கொட்டை முளைவிட்டு வடலியென...

2011-06-01T03:02:00.000-07:00

அனல் காற்றில் விசவாயு
கலந்தெரித்த பூமி
அதில் விளைந்த இளந்துளிர்கள்
தீய்ந்தழிந்து
கனகாலம் ஆகவில்லை.

முதுமரங்கள் விழிவரளச்
சுரசரக்கும் காவோலையாகும்.
துயர்வாய்வில்
மணல் கூடத்
தீய்ந்தெரிந்து
கரியாகச் சாகும்.

பிணம் தின்னிக் கரும்பறவை
கரைந்தழுது
தேனொழுகப் பேசும்.
பொய்யான உறுதி பலவுதிர்த்து
உள்ளரங்கில்
தலை நுளைக்கப் பார்க்கும்.
தரை தின்ன கறையானாய்
அரித்தரித்துப் பரவும்.
பிறர் மண்ணை ஏப்பமிடும்
வழியனைத்தும் நாடும்.

துயர் சிந்தி வாழ்வொடுங்கி
தலை சாய்க்கும்
சேற்றெருமை அல்ல.
துளிநீரும் கடலாகப்
பரந்தெழுப் படகாகி மிதப்பர்.

பனங்கொட்டை முளைவிட்டு
வடலியென வளரும்.
இவர் வாழ்வு கருகாது
வளவெங்கும் நிமிரும்.

ஜீவநதி இதழ் 33 (ஆனி 2011) இதழில் வெளியான என் கவிதை

எம்.கே.முருகானந்தன்

0.0.0.0.0.0.0.0